Askim
Jop i bin karim ol hevi inap longpela taim o olsem wanem?
Sampela man i ting olsem ol hevi i painim Jop i bin i stap inap planti yia, tasol buk bilong Jop i no stori olsem.
Namba wan hap bilong ol hevi i painim Jop—olsem olgeta pikinini bilong em i dai na ol lain bulmakau samting i lus—i bin kamap insait long sotpela taim tasol. Baibel i tok: “Wanpela de ol pikinini bilong Jop i go mekim bikpela kaikai long haus bilong namba wan brata bilong ol.” Insait long sotpela hap taim tasol Jop i kisim toksave long ol hevi i kamap—ol bulmakau, donki, sipsip na kamel bilong em i lus na ol birua i kilim i dai ol wasman bilong ol dispela animal. Bihain tasol long em i kisim toksave long ol dispela samting, narapela wokman i kam na tokim em olsem olgeta pikinini bilong em, em ol i ‘mekim bikpela kaikai long haus bilong namba wan brata bilong ol,’ olgeta i dai. I luk olsem olgeta dispela samting i bin kamap insait long wanpela de tasol.—Jop 1:13-19.
Ating namba tu hap bilong ol hevi i painim Jop i bin kisim sampela hap taim moa. Satan i go tokim Jehova olsem Jop bai givim baksait long em sapos hevi i painim em yet—olsem skin bilong Jop yet. Olsem na Satan i mekim na “ol strongpela sua i kamap long olgeta hap bilong bodi bilong Jop.” Yumi ken ting olsem sampela hap taim i bin lus pastaim na ol sua i kamap long olgeta hap bilong bodi bilong Jop. Na tu, sampela hap taim i bin lus na bihain ol pren bilong em i harim tok long “dispela samting nogut” i kamap long em na ol i kirap i go lukim em.—Jop 2:3-11.
Elifas em i bilong Teman long hap bilong Idom, na Sofar em i bilong wanpela hap long not-wes bilong Arebia, olsem na ples bilong ol i stap klostu long ples bilong Jop long Us, long hap not bilong Arebia. Tasol Bildat em i bilong kantri Suha, na ol man i ting ol lain bilong em i save sindaun long nambis bilong wara Yufretis. Sapos Bildat i bin i stap long ples bilong em long dispela taim, ating sampela wik o sampela mun i mas lus pastaim na em i harim tok long ol hevi bilong Jop na go kamap long kantri Us. Tasol yumi ken ting olsem tripela man hia ol i bin i stap klostu long Jop taim ol dispela hevi i painim em. Tasol maski ol i stap we we, taim tripela pren bilong Jop i kamap pinis, ol i “sindaun wantaim em long graun, inap 7-pela de olgeta” na ol i no mekim wanpela tok.—Jop 2:12, 13.
Orait nau namba tri hap bilong ol hevi i painim Jop i kamap, na stori bilong en i inapim planti sapta bilong Buk Jop. Ol dispela tripela pren giaman, ol i sutim ol tok long Jop na planti taim em i bekim tok long ol. Taim ol i mekim pinis ol tok bilong ol, yangpela man Elihu i givim tok bilong stretim ol, na Jehova tu i mekim tok bilong stretim Jop.—Jop 32:1-6; 38:1; 40:1-6; 42:1.
Olsem na dispela hevi bilong Jop na gutpela samting i kamap long en, dispela i kamap insait long sampela mun, ating i no winim wanpela yia. Ating long ol samting i painim yu yet, yu save olsem sapos wanpela bikpela hevi i painim yu i olsem em i stap longpela taim na i no laik pinis. Tasol yumi no ken lusim tingting olsem ol hevi bai pinis, olsem ol hevi bilong Jop i bin pinis. Maski yumi karim hevi inap sotpela taim o longpela taim, yumi mas tingim olsem God bai helpim yumi, olsem Baibel i tok: “Mipela i save, ol dispela hevi na pen mipela i save karim, ol i no bikpela tumas, na ol bai i stap sotpela taim tasol. . . . Na mipela i save, ol dispela gutpela samting mipela bai i kisim, ol i winim tru olgeta arapela samting.” (2 Korin 4:17) Aposel Pita i tok: “God em i as bilong olgeta marimari. Em i bin singautim yupela long Krais Jisas, bai yupela i ken i stap wantaim em long gutpela lait bilong en i save stap oltaim. Olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim.”—1 Pita 5:10.