Ol Bagarap Bilong Skin i Save Painim Olgeta Lain
WANPELA man nem bilong em Christian, em i sindaun long wanpela kantri long Afrika, na wanpela taim ol soldia i go kisim em na ol i subim em long insait long ami, tasol em i no laik, long wanem, em i bihainim maus bilong bel em Baibel i skulim pinis. Ol soldia i kisim em i go long wanpela kem bilong ol ami na inap 4-pela de ol i paitim em, na bihain wanpela bilong ol i sutim em long lek. Christian i go long haus sik, tasol ol dokta i mas katim lek bilong em daunbilo long skru. Long narapela kantri long Afrika, ol bikhetman i katim hanlek bilong ol liklik pikinini. Long Kambodia, Bolkan, Afganistan, Angola, na planti hap moa, ol bom ol i planim long graun i bagarapim hanlek bilong planti man, em ol yangpela na lapun wantaim.
Narapela samting tu i kamapim bagarap long skin, em ol birua na sik samting, olsem sik suga. Ol marasin nogut i stap long win, wara, na graun, dispela tu inap kamapim bagarap long skin. Olsem: Long sampela hap klostu long wanpela taun long Isten Yurop, planti pikinini em mama i karim ol long dispela hap ol i no gat hap han daunbilo long skru. Ol i gat sotpela han tasol daunbilo liklik long skru. I gat ol samting i makim olsem ol marasin nogut i kamapim dispela bagarap long skin. Planti manmeri moa ol i gat ol hanlek, tasol sik bilong bun i dai o sampela sik moa i kamapim bagarap long skin. Tru tumas, kain kain bagarap bilong skin i save painim olgeta lain.
Maski wanem samting i kamapim bagarap bilong skin, dispela inap bagarapim tru bel bilong man. Taim Junior i gat 20 krismas, ol i mas katim hap lek daunbilo long skru long han kais. Bihain em i tok: “Planti taim bel bilong mi i bagarap. Mi krai planti, long wanem, mi save mi no inap kisim bek lek bilong mi. Mi no save wanem samting mi mas mekim. Tingting bilong mi i paul.” Tasol bihain tingting bilong Junior i senis. Em i kirap stadi long Baibel na ol samting em i lainim i helpim em long karim hevi bilong em, na tu, dispela i helpim em long wetim gutpela taim i kamap long graun. Orait, sapos yu tu i gat bagarap bilong skin, yu laik wetim gutpela samting i kamap bihain?
Sapos olsem, orait plis ritim stori i kamap bihain long dispela. Mipela i laik bai yu skelim ol skripsa long Baibel bilong yu yet, na bai yu ken save long ol samting em Man bilong wokim yumi bai mekim long ol man i kisim save long laik bilong Em na bihainim long i stap bilong ol.