Ol Hevi Bilong Ol Man—Yu Ting Bihain Ol Bai Pinis?
“PLANTI bilong olgeta manmeri bilong graun (inap 25 pesen) ol i stap rabis, 1.3 bilion manmeri i save kisim olsem 3 kina tasol long wan wan de bilong baim kaikai samting, 1 bilion manmeri i no save long rit rait, 1.3 bilion manmeri i no gat gutpela wara bilong dring, na 1 bilion manmeri i stap hangre long olgeta de.” Em tok bilong wanpela ripot bilong Aialan long ol samting i kamap long graun.
Sori tru! Ol man i no inap stretim tru ol hevi bilong dispela graun! Ol dispela hevi i moa nogut taim yumi tingim olsem bikpela lain tru bilong ol dispela manmeri i kisim hevi em ol meri na pikinini i no inap lukautim ol yet. Long nau tu, bihain long yia 2000, ‘planti meri na pikinini i no inap kisim ol samting ol i mas kisim long olgeta de.’ Em samting nogut tru, a?—The State of the World’s Children 2000.
“Nupela Pasin Insait Long Liklik Hap Taim Tasol”
Lain United Nations Children’s Fund i tok ol i bilip tru olsem “ol man inap pinisim ol samting nogut tru ol dispela hevi . . . i bin kamapim long ol manmeri long olgeta hap bilong graun.” Dispela lain i tok, ol bikpela hevi ol dispela planti bilion taranguman i save karim “i no samting ol man i mas karim o ol i no inap senisim.” Dispela lain i bin singautim “olgeta manmeri long helpim ol man long kamapim wanpela nupela pasin insait long liklik hap taim tasol.” Ol i laik bai wanpela nupela pasin i kamap long graun we olgeta manmeri “i no stap rabis moa, na i no gat pasin bilong daunim narapela, na i no gat moa pasin bilong pait na ol sik.”
Samting i strongim bel bilong ol man i kamapim ol dispela tingting, em pasin bilong sampela man long nau i save tingim tru ol man na ol i mekim bikpela wok tru bilong daunim ol samting nogut i save kamap long rot bilong “ol pait na ol kain kain hevi i no save pinis.” Olsem: Insait long 15 yia i go pinis, wanpela lain (Chernobyl Children’s Project) “i bin helpim planti handet pikinini long daunim pen na hevi ol i karim long sik kensa ol i bin kisim long smok nogut bilong nuklia.” (Nius The Irish Examiner, Epril 4, 2000) Wok bilong ol bikpela na ol liklik lain bilong helpim ol rabisman i mekim bikpela samting long i stap bilong planti man i bin kisim bagarap long ol pait na ol bikpela bagarap.
Tasol ol man i insait long ol dispela wok bilong helpim ol narapela ol i save olsem ol hevi ol man i mas karim long nau “i wok long kamap long planti hap moa na i bikpela moa, winim 10-pela yia i go pinis.” David Begg, nambawan bos bilong wanpela lain bilong helpim ol man (Concern) long Aialan, em i tok “ol wokman, na ol man i helpim dispela wok na ol man i givim mani samting, ol i bin helpim gut tru ol man” taim bikpela tait wara i bagarapim Mosambik. Em i tok moa: “Tasol yumi yet tasol i no inap winim ol kain bikpela bagarap olsem.” Em i stori long wok bilong ol man long helpim ol lain long Afrika na em i tokaut stret olsem: “I gat wan wan as tasol long wetim gutpela samting i kamap, na dispela i olsem ol liklik lait bilong kandel i laik i dai na i no lait strong.” Planti i ting, dispela tok i stret tu long ol samting i kamap long olgeta hap bilong graun.
Olsem wanem? I stret yumi ken ting olsem yumi inap lukim dispela “nupela pasin insait long liklik hap taim tasol”? Tru, ol man i save mekim bikpela wok bilong helpim ol man, tasol i stret yumi skelim narapela rot bilong kamapim stretpela nupela graun i gat bel isi i stap long en. Baibel i stori long dispela gutpela samting, olsem stori i kamap bihain long dispela bai toktok long en.
[Piksa Kredit Lain long pes 2]
Page 3, children: UN/DPI Photo by James Bu