Taim Ol Bilip Nating i Bosim Sindaun Bilong Man
YU LUSIM haus na klostu yu bamim wanpela man. Ston i sutim lek bilong yu. Wanpela kain pisin i krai long nait. Oltaim yu kisim wankain driman. Long planti man, ol dispela samting i no gat mining bilong en. Tasol long tingting bilong sampela lain long Wes Afrika, ol dispela samting i olsem mak i gat mining bilong en na i kam long ples spirit. Ol inap makim olsem gutpela samting o samting nogut bai kamap.
Tasol i no long Afrika tasol ol man i bihainim ol bilip nating, nogat; long ol narapela kantri tu. Planti man long Saina na ol ripablik em bipo ol i insait long Soviet Yunion ol i save bihainim yet bilip bilong ol tumbuna, maski inap planti yia gavman long ol dispela kantri i bin tok i no gat God i stap. Long ol kantri long hap bilong Wes, planti man i save lukim horoskop, pret long Fraide namba 13, na ol i save abrusim ol blakpela pusi. Sampela lain bilong Hap Not ol i ting ol gutpela lait i gat kala kala i kamap long skai i makim olsem bikpela pait na bikpela sik i laik kamap. Long India, sik AIDS i go bikpela long rot bilong ol draiva bilong trak, em ol i ting ol i mas slip wantaim meri na bai skin bilong ol i no ken hat tumas taim ol i draiv long bikpela san. Long Japan, ol man bilong katim rot insait long graun ol i ting olsem sapos meri i go insait long rot taim rot i no pinis yet, dispela bai kamapim samting nogut. Long pilai spot tu ol man i save bihainim ol bilip nating. Wanpela man i pilai volibal i tok, em i win, long wanem, em i werim blakpela sokis—waitpela sokis, nogat. Tasol i gat planti bilip nating moa i stap, em yumi no inap kaunim.
Olsem wanem long yu yet? I gat wanpela samting yu pret nating long en? I gat wanpela bilip o pasin bilong ples i olsem i no gat as bilong en na dispela i bosim yu? Sapos yu tok yes, dispela inap makim olsem ol bilip nating i save bosim sindaun bilong yu.
Taim man i larim ol bilip nating i bosim ol samting em i laik mekim long olgeta de, i olsem em i larim ol samting em i no save gut long en i bosim em. Yu ting em pasin bilong gutpela tingting? Yu ting i gutpela sapos yumi aninit long samting em inap mekim nogut long yumi? Ol bilip nating i olsem samting nating tasol o ol i samting bilong mekim nogut long yumi?