Samting Bilong Mekim Gut Bel Long Taim Nogut
LONG nau ol nius long redio televisen samting i wok long bagarapim bel bilong yumi. Wanpela man i tok: “Ol samting nau i kamap long graun i nogut tru, olsem na planti taim mipela i tingting planti, bai mipela i lukim ol nius long 6 klok o nogat.” Long olgeta hap i gat pait, pasin teroris, pen na hevi, pasin raskol, na sik—em ol hevi inap painim yumi tu o ol i painim yumi pinis.
Baibel i tokaut stret olsem ol dispela samting bai kamap. Taim Jisas i stori long taim bilong yumi, em i tokaut olsem ol bikpela pait, ol bikpela sik, hangre, na guria bai kamap. (Luk 21:10, 11) Na tu, aposel Pol i tok “planti hevi nogut tru bai i kamap,” na long dispela taim ol man bai pait na bagarapim ol man nabaut, laikim tumas mani, na ol bai i birua long olgeta gutpela pasin. Em i kolim dispela taim olsem “taim bilong las de.”—2 Timoti 3:1-5.
Olsem na taim ol nius long redio televisen samting i stori long ol samting i wok long kamap long graun, ol i kamapim ol stori i wankain long ol samting Baibel i tokaut long en. Tasol Baibel i tokaut long sampela samting moa. Baibel i tokaut long ol samting ol nius i no tokaut long en. Long rot bilong Baibel yumi ken kisim save long as na planti samting nogut i wok long kamap, na tu, long ol samting bai kamap bihain.
Tingting Bilong God Long Pasin Nogut
Baibel i stori long tingting bilong God long ol bikpela hevi i painim yumi long nau. Tru, em i bin luksave olsem ol dispela hevi bai kamap, tasol em i no orait long ol na em i no tingting long larim ol i stap inap oltaim oltaim. Aposel Jon i tok, ‘God em i as bilong pasin bilong laikim ol arapela.’ (1 Jon 4:8) Jehova i save tingim tru ol manmeri na em i nolaik tru long ol pasin nogut. I stret yumi go long God bambai em i ken strongim bel bilong yumi, long wanem, em i gat pasin sori na em i pilim tru hevi bilong yumi na em i gat strong long pinisim ol pasin nogut long dispela graun. Man bilong raitim song i tok: “[King bilong heven em God i bin makim] i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:12-14.
Olsem wanem? Yu sori long ol man i karim pen na hevi? Ating yu sori long ol, a? Jehova i putim long bel bilong yumi pasin bilong pilim hevi bilong narapela, long wanem, em i wokim yumi i kamap kain olsem em yet. (Stat 1:26, 27) Olsem na yumi ken save tru olsem Jehova i save pilim tru pen na hevi bilong ol man. Jisas, em i bin save gut tru long Jehova winim ol narapela, em i skulim ol man olsem Jehova i save tingim tru yumi na em i sori long yumi.—Matyu 10:29, 31.
Ol samting God i bin wokim i kamapim klia olsem God i save tingim tru ol manmeri. Jisas i tok, God “i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:45) Aposel Pol i tokim ol manmeri bilong taun Listra olsem: “[God] i no bin hait olgeta bai ol man i no ken save long em. Nogat. Oltaim em i save mekim gutpela pasin long yupela. Em i mekim ren i lusim skai na i kam daun long yupela, na em i mekim planti gutpela kaikai i kamap. Em i givim yupela planti kaikai na i mekim bel bilong yupela i amamas.”—Aposel 14:17.
Asua Bilong Husat?
Na tu, aposel Pol i tokim ol manmeri long Listra: “Long taim bilong ol tumbuna [God] i bin larim olgeta lain manmeri i wokabaut long pasin bilong ol yet.” Olsem na ol manmeri yet i gat asua long planti hevi i painim ol. I no asua bilong God.—Aposel 14:16.
Bilong wanem Jehova i larim ol samting nogut i kamap? Em bai mekim wanpela samting bilong pinisim ol dispela samting nogut? Yumi inap painim bekim bilong ol dispela askim long Baibel tasol. Em i olsem, long wanem, i gat narapela spirit i insait long bekim bilong en, na dispela spirit yet i bin kamapim wanpela bikpela tok long ples bilong ol spirit.
[Ol Piksa long pes 4]
Ol man i save sori long ol narapela. Olsem wanem? Yu ting God i no save tingim pen na hevi bilong ol man?
[Ol Piksa Kredit Lain long pes 2]
COVER: Tank: UN PHOTO 158181/J. Isaac; earthquake: San Hong R-C Picture Company
[Ol Piksa Kredit Lain long pes 3]
Upper left, Croatia: UN PHOTO 159208/S. Whitehouse; starving child: UN PHOTO 146150 BY O. MONSEN