Ripot Long Wok Bilong Kingdom

Ol i “Harim” Tok Bilong Kingdom Long Brasil

BILONG autim gutnius bilong Kingdom long ol yaupas, planti Witnes Bilong Jehova long Brasil i kirap mekim samting i hatwok long mekim, ol i lainim pasin bilong wokim han bilong helpim ol yaupas, Brazilian Sign Language. Hatwok bilong ol i kamapim gutpela samting, olsem ol dispela ekspiriens i kamapim.

Eva,a em wanpela yaupas meri long São Paulo, i kirap lainim tok ples bilong ol yaupas taim em na tripela pikinini bilong em i go sindaun wantaim wanpela yaupas man. Long wanpela bikpela haus i gat planti stua long en, Eva na boipren bilong em i bungim wanpela lain Witnes em ol i yaupas na ol dispela Witnes i singautim tupela long go long miting long Haus Kingdom. Ol i orait long go, long wanem, ol i ting em wanpela bung tasol bilong amamas samting.

Eva i gat liklik save tasol long tok ples bilong ol yaupas, olsem na em i no klia long planti ol tok i kamap long miting. Bihain, tupela Witnes i singautim em i go long haus bilong ol long dring ti samting. Ol i mekim wok long ol piksa long buklet Stap Amamas Oltaim Long Graun!, na ol i stori gut long tok promis bilong God long kamapim Paradais long graun long bihain. Eva i laikim samting em i lainim na em i kirap go long ol miting long olgeta wik.

I no longtaim na Eva i lusim boipren bilong em, bambai sindaun bilong em i mas stap stret wantaim ol tok bilong Baibel. Maski famili bilong em i birua nogut tru long em, em i wok long kamap strong na em i kisim baptais long 1995. Sikspela mun bihain, Eva i insait long wok painia, o autim tok bilong Kingdom fultaim. Kirap long dispela taim em i bin helpim 4-pela yaupas long dediket na kisim baptais.

Carlos, em i yaupas taim mama i karim. Taim em i liklik yet em i insait long kisim drak, mekim ol pasin nogut, na stil. Sampela birua bilong em i kros na i laik bagarapim em, olsem na em i ranawe i go long São Paulo na stap wantaim João inap liklik taim. Olsem Carlos, João tu i yaupas na em i save mekim ol pasin nogut.

Sampela yia bihain, Carlos i lainim tok bilong Kingdom, na dispela i kirapim em long stretim sindaun bilong em na stretim gut marit bilong em. Taim Carlos i inapim pinis ol mak bilong Baibel, em i kisim baptais bilong makim olsem em i dediket long Jehova. Long dispela taim, Carlos i no save olsem João tu i kisim save long gutnius, na em tu i senisim ol pasin bilong em. Taim João i lainim olsem Jehova i no orait long pasin bilong mekim wok long imis, em i tromoi olgeta imis bilong ol “santu” em i bin bungim. Taim João i lusim pinis ol olpela pasin bilong em, em tu i kisim baptais.

Bikpela amamas tru Carlos na João i kisim taim ol i bin bung long wanpela Haus Kingdom na lukim olsem narapela narapela i bin senis! Nau tupela i mekim wok bilong ol olsem het bilong famili na ol i wok strong long autim tok bilong Kingdom.

Long Brasil i gat 30 kongrigesen na 154 grup bilong ol yaupas long nau, na winim 2,500 pablisa i stap insait long ol, na 1,500 bilong ol i yaupas. Long “Ol Tisa Bilong Tok Bilong God” Kibung Distrik bilong ol yaupas long Brasil long yia 2001, bikpela lain i winim 3,000 i bung, na 36 i kisim baptais. Jehova bai blesim ol na planti moa yaupas bai kisim tok bilong Kingdom.

[Futnot]