Ol Yangpela—Yupela i Wok Long Kamap Strong Long Ol Samting Bilong Spirit?

“TRU mi wok long go long ol miting, tasol mi no gat strongpela tingting long mekim wok bilong Jehova,” em tok Hideo i mekim taim em i tingim bek i stap bilong em long haiskul. “Planti taim mi tingim mi yet olsem planti wanklas i save laikim mi na mi wokabaut raun long rot wantaim wanpela gelpren. Mi no bin save long ol mak mi laik winim, na mi no gat laik long kamap strong long ol samting bilong spirit.” Olsem Hideo, planti yangpela i mekim nating ol samting, ol i no gat laik long putim sampela gutpela mak bilong winim o kamap strong long ol samting bilong spirit.

Sapos yu yangpela, ating yu amamas taim yu insait long ol pilai spot o ol samting yu gat laik long mekim. Tasol taim yu mekim sampela wok bilong spirit, ating yu no amamas olsem, a? Yu ting yumi inap kisim amamas long ol mak bilong spirit yumi putim? Tingim tok bilong man bilong raitim song: “Tok bilong Bikpela em samting yumi inap bilip tru long en. Em i save givim gutpela tingting long ol man i no gat planti save. . . . Lo bilong God i nambawan tru, na i givim gutpela save long yumi.” (Song 19:​7, 8) Tok Bilong God inap stiaim “man i no gat planti save” long bihainim gutpela tingting na i ‘givim gutpela save long em.’ Tru tumas, yu ken amamas tru long ol samting bilong spirit. Tasol yu mas mekim wanem na bai yu inap pilim olsem? Wanem samting i mas kirapim yu?

Bel i Mas Kirapim Yu Long Mekim Wok Bilong God

Namba wan samting, em bel i mas kirapim yu. Tingim yangpela King Josaia bilong Juda. Taim ol i painim buk bilong Lo bilong Jehova insait long tempel, Josaia i tokim ol long ritim na bel bilong em i pilim tru ol tok em i harim. Long dispela as ‘Josaia i rausim olgeta samting bilong god giaman.’ (2 Stori 34:​14-21, 33) Josaia i harim ol Tok Bilong God ol i ritim na dispela i bin kirapim em long mekim sampela samting moa bilong strongim lotu i tru.

Yu tu yu inap kisim laik bilong mekim wok bilong Jehova sapos oltaim yu ritim Baibel na tingim tingim ol tok yu ritim. Em dispela samting i bin kirapim bel bilong Hideo. Em i kirap prenim wanpela painia i bikpela long em, em wanpela Witnes Bilong Jehova i save autim tok fultaim. Dispela painia i givim bel tru long stadi long Baibel na i wok strong long bihainim ol tok bilong Baibel long laip bilong em. Pasin bilong dispela painia i strongim tru Hideo na em i kirap long mekim wankain pasin na em i kisim strongpela laik long mekim wok bilong God na helpim ol narapela. Em i kamap strong long ol samting bilong spirit na dispela i mekim i stap bilong em i gat as bilong en.

Pasin bilong ritim Baibel long olgeta de i ken kirapim ol yangpela. Takahiro i tok: “Taim mi laik slip na mi tingim olsem mi no bin ritim yet Baibel long dispela de, mi bin kirap na ritim. Long dispela rot mi pilim olsem Jehova i stiaim mi. Pasin bilong ritim Baibel long olgeta de i helpim mi long kamap strong long samting bilong spirit. Mi tingting long mekim bikpela wok moa bilong Jehova, olsem na bihain liklik long mi pinisim haiskul mi kirap mekim wok painia. Na mi amamas tru long mekim dispela wok.”

Sapos yu ritim pinis Baibel long olgeta de, wanem narapela samting i ken strongim laik bilong yu long litimapim nem bilong Jehova? Mama i bin skulim Tomohiro long tok i tru bilong Baibel. Em i tok: “Taim mi gat 19 krismas mi stadi gut long buk Life Does Have a Purpose, na nau bel bilong mi i pilim tru pasin sori bilong Jehova na ofa bilong Krais Jisas. Dispela i kirapim mi long mekim sampela wok moa bilong Jehova.” (2 Korin 5:​14, 15) Olsem Tomohiro, planti yangpela taim ol i wok long givim bel long mekim stadi bilong ol yet long Baibel, dispela i helpim ol long kamap strong long ol samting bilong spirit.

Sapos yu mekim olsem pinis, tasol bel bilong yu i no gat laik yet long mekim wok bilong Jehova, bai yu mekim wanem? I gat wanpela yu inap kisim helpim long em? Aposel Pol i tok: “God i save wok insait long bel bilong yupela. Em yet i kirapim laik bilong yupela bilong mekim ol pasin em i laikim, na em i givim yupela strong bilong mekim ol dispela pasin.” (Filipai 2:13) Sapos yu beten long Jehova long helpim yu, em bai amamas long givim holi spirit long yu, na dispela bai givim strong long yu long “mekim” ol samting, na tu, bai yu gat “laik” long mekim. Dispela i makim olsem holi spirit bilong God bai strongim laik bilong yu long wok strong long wok bilong Jehova na em bai helpim yu long kamap strong long ol samting bilong spirit. Olsem na bilip long strong bilong Jehova na strongim bel bilong yu!

Putim Ol Mak Yu Laik Winim

Taim yu tingting pinis long mekim bikpela wok moa bilong Jehova, yu mas putim ol mak yu laik winim na bai yu inap kamap strong moa long ol samting bilong spirit. Mana, wanpela yangpela meri Kristen, em i tok: “Pasin bilong putim ol mak mi laik winim i helpim mi tru. Mi no wok long slek i go bek, nogat, mi strongim bel na mekim wok i go het. Mi tingim ol mak mi laik winim, na mi bin beten strong long Jehova long stiaim mi, na dispela i helpim mi long kamap strong na i no gat samting i pulim nabaut tingting bilong mi.”

Ol mak yu putim i mas stret long yu na yu inap long winim. Pasin bilong ritim wanpela sapta bilong Baibel long olgeta de em wanpela gutpela mak yu inap winim. Na tu, yu ken skelim sampela buk na nius bilong kisim sampela save moa. Olsem: Long ol buk na nius i stap long tok Inglis, ating yu ken stadi long ol pasin bilong Jehova em ol i stap aninit long het-tok “Jehovah” na long liklik het-tok “Qualities by Name” long Watch Tower Publications Index. I gat olsem 40 pasin ol i putim na yu ken skelim, na dispela wok bilong skelim ol buk na nius bilong kisim save bai helpim yu long go klostu moa long Jehova na i kirapim yu long mekim sampela wok moa bilong em. Sampela narapela mak yu inap putim em bekim wanpela tok o moa long hap bilong miting i gat ol askim na bekim, na wok long kisim gut save long wanpela brata o sista insait long kongrigesen long olgeta miting, na beten long Jehova long olgeta de na autim tok bilong em long ol narapela.

Sapos yu no insait yet long Skul Tiokratik, em wanpela gutpela mak yu ken putim bilong winim. Olsem wanem? Yu insait long wok autim tok? Sapos nogat, yu ken wok long stretim ol samting bambai yu ken kamap pablisa i no baptais yet. Narapela samting em yu mas tingting strong long en em olsem: Yu mas stap gut long Jehova na dediketim yu yet long em. Planti yangpela i wok strong long truim dediket bilong ol taim ol i autim tok fultaim.

Em i gutpela long putim ol mak bilong winim long laip bilong yu, tasol lukaut nogut yu kisim pasin bilong resis wantaim narapela. Yu bai kisim bikpela amamas moa long ol samting yu mekim sapos yu no skelim yu yet wantaim ol narapela.​​—⁠Galesia 5:​26; 6:⁠4.

Ating yu pilim olsem yu no gat bikpela save na yu hatwok long putim sampela gutpela mak bilong winim. Orait bihainim tok bilong Baibel i tok: “Nau mi laik skulim yu long toktok bilong ol man i gat gutpela tingting na save. Yu mas putim yau gut long dispela tok.” (Sindaun 22:17) Kisim helpim long papamama bilong yu o ol narapela strongpela Kristen. Ol papamama na ol narapela i mas bihainim gutpela tingting na ol i mas i stap gutpela helpim long dispela samting. Taim ol narapela i putim sampela mak na subim ol yangpela long winim ol, dispela i ken pinisim amamas bilong ol na i no stret wantaim as na yangpela i mas putim sampela mak bilong winim. Dispela samting i painim wanpela yangpela meri, em i tok: “Papamama bilong mi i putim planti mak mi mas winim, olsem mi mas insait long Skul Tiokratik, autim tok, kisim baptais, na kamap wanpela painia. Mi taitim bun tru long winim olgeta wan wan bilong ol. Taim mi winim wanpela mak, papamama bilong mi i no tok amamas long mi, nogat, ol i putim narapela mak bilong winim. Olsem na long olgeta taim mi pilim olsem ol i subim mi long winim ol mak. Skin bilong mi i bin les, na mi no bin amamas long ol mak mi winim.” Wanem samting i mekim na em i pilim olsem? Olgeta dispela mak em ol gutpela mak, tasol ol i no ol mak em yet i bin putim. Bilong kisim amamas, bel bilong yu yet i mas kirapim yu long putim ol mak yu yet i laik winim!

Tingim Jisas Krais. Taim em i kam long graun, em i save long ol samting Papa bilong em, Jehova, i laik em i mas mekim. Mekim laik bilong Jehova i no wanpela mak tasol Jisas i putim bilong winim, nogat, em wanpela wok em i mas mekim. Jisas i gat wanem tingting long dispela wok? Em i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Jisas i amamas long mekim laik bilong Jehova na em i mekim ol samting Papa bilong em i laik em i mas mekim. Em i olsem kaikai bilong Jisas​—⁠em i kisim amamas na i bel gut long pinisim wok em i mas mekim. (Hibru 10:​5-10) Yu tu inap kisim amamas taim stretpela tingting i kirapim yu long mekim ol samting em papamama i strongim yu long mekim.

No Ken Les Long Mekim Ol Gutpela Pasin

Taim yu putim wanpela mak, wok hat long winim dispela mak. Galesia 6:9 i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.” Yu no ken tingting tasol long strong o save bilong yu. Planti taim hevi inap painim yu na sampela taim bai yu kisim tingting olsem yu no inap mekim gut ol wok. Tasol Baibel i strongim yumi na i tok: “Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:⁠6) Jehova bai i helpim yu taim yu wok hat long winim ol mak bilong spirit yu putim.

Yes, taim yu wok long kisim laik bilong lotuim Jehova na yu wok long putim ol mak bilong spirit long winim, yu inap mekim na “olgeta manmeri i lukim pasin bilong yu yet i kamap gutpela tru.” (1 Timoti 4:15) Na bai yu amamas long mekim wok bilong God na i stap bilong yu bai i gat as bilong en.

[Piksa long pes 9]

Pasin bilong ritim Baibel na tingim tingim long bel ol samting yu ritim bai kirapim yu long mekim wok bilong Jehova

[Piksa long pes 10]

Jisas i mekim ol samting Papa bilong em i laik em i mas mekim