Askim

Long Hibru 2:​14, bilong wanem Baibel i kolim Satan olsem “dispela man i gat strong bilong mekim ol manmeri i dai”?

Tok bilong Pol i makim olsem Satan​—⁠em yet o long rot bilong lain bilong em​—⁠em inap mekim ol samting bilong kilim i dai ol man. Jisas i mekim tok i stret long dispela, na em i kolim Satan olsem “man bilong kilim ol man i dai.”​—⁠Jon 8:⁠44.

Ating sampela man bai paul long mining bilong dispela tok bilong Hibru 2:​14, long wanem, long sampela Baibel ol man i tanim dispela tok olsem Satan i gat “pawa bilong indai” o em i gat “strong bilong bosim indai.” (King James Version; Revised Standard; New International Version; Jerusalem Bible) Ol dispela pasin bilong tanim tok inap givim tingting olsem i no gat wanpela samting i pasim Satan long kilim i dai olgeta man em i makim bilong mekim olsem. Tasol, i no olsem. Sapos i olsem, ating longtaim yet em i kilim i dai pinis olgeta man i lotuim Jehova.​—⁠Stat 3:⁠15.

Tok Grik em ol i tanim olsem “strong bilong bosim indai” long sampela Baibel, na long Baibel New World Translation ol i tanim olsem “inap mekim ol samting bilong kilim i dai ol man,” em “kraʹtos tou tha·naʹtou.” Tou tha·naʹtou em i wanpela pasin bilong kolim tok i makim “indai.” Kraʹtos i makim “pawa, strong.” Buk Theological Dictionary of the New Testament i tok dispela tok i makim olsem “strong i stap; na em i no stori long wok dispela strong inap mekim.” Olsem na long Hibru 2:​14, Pol i no makim olsem Satan i gat namba bilong bosim indai, nogat. Em i makim olsem Satan inap mekim ol samting bilong kilim i dai ol man.

Olsem wanem Satan i mekim wok long dispela “strong bilong mekim ol manmeri i dai”? Long Buk Jop, i gat stori bilong wanpela samting we i no save kamap planti taim na i gat as na em i bin kamap. Dispela stori i kamapim olsem Satan i bin mekim wok long bikpela win long ‘kilim i dai’ ol pikinini bilong Jop. Tasol bilong mekim dispela samting, Satan i mas kisim tok orait long God, na God i bin mekim olsem bilong stretim wanpela bikpela tok. (Jop 1:​12, 18, 19) Satan i no inap long kilim i dai Jop. God i no bin givim em tok orait bilong mekim olsem. (Jop 2:⁠6) Dispela i soim olsem maski sampela taim Satan i bin mekim ol samting bilong kilim i dai ol gutpela man, yumi no ken pret long em bai kilim yumi i dai long laik bilong em yet.

Na tu, Satan i bin mekim wok long sampela man bilong graun bilong kilim i dai narapela. Olsem na planti Kristen ol i bin i dai, long wanem, ol i bin strong long holimpas bilip bilong ol. Sampela ol i dai long han bilong ol bikpela lain i bung bung na i kros o ol i dai, long wanem, kot nogut bilong sampela bikman bilong gavman o jas nogut i makim dai olsem strafe ol i mas kisim.​—⁠KTH 2:⁠13.

Sampela taim Satan i mekim wok long ol laik nogut bilong skin long kilim i dai ol man. Long taim bilong ol Israel long bipo, profet Balam i bin tokim lain Moap long pulim ol Israel long “givim baksait long Bikpela.” (Namba 31:16) Dispela i mekim na winim 23,000 manmeri bilong lain Israel ol i dai. (Namba 25:9; 1 Korin 10:⁠8) Long nau tu, sampela ol i pundaun long ol “trik na giaman” bilong Satan na ol i kirap insait long pasin pamuk o ol narapela pasin nogut. (Efesus 6:11) Tru, ol kain man olsem ol i no i dai kwiktaim. Tasol ol inap lus long kisim laip oltaim, na long dispela rot i olsem Satan i mekim na ol i dai.

Yumi save olsem Satan inap mekim ol samting bilong bagarapim yumi, tasol yumi no ken pret nating long em. Taim Pol i tok olsem Satan i gat strong bilong mekim ol manmeri i dai, em i tok tu olsem Krais i bin i dai bambai “em i ken bagarapim Satan,” na “ol manmeri ol i save pret long dai, na olgeta taim ol i stap long graun, dispela pret bilong ol i mekim ol i stap olsem ol kalabus bilong Satan. Tasol Jisas em i dai bilong lusim ol long dispela kalabus.” (Hibru 2:​14, 15) Yes, Jisas i bin givim pe bilong baim bek yumi na long dispela rot em i helpim ol manmeri i bilip long lusim kalabus bilong sin na indai.​—⁠2 Timoti 1:⁠10.

Tru, Satan inap mekim ol samting bilong kilim yumi i dai, tasol yumi bilip olsem Jehova inap stretim bek olgeta samting Satan na lain bilong em i mekim bilong bagarapim yumi. Jehova i tokim yumi olsem Jisas em i kirap bek pinis, em bai “bagarapim na rausim wok bilong Satan.” (1 Jon 3:⁠8) Long strong bilong Jehova, Jisas bai kirapim bek ol man i dai pinis na long dispela rot em bai pinisim dai. (Jon 5:​28, 29) Jisas bai kamapim long ples klia olsem strong bilong Satan i sot taim em i kalabusim em long hul i no gat as. Bihain em bai bagarapim Satan na pinisim em olgeta.​​—⁠KTH 20:​1-​10.