Ol Yangpela, Wokabaut Long Pasin Jehova i Laikim
SAMPELA yangpela Kristen i bin i go stap longwe long papamama na kongrigesen bilong ol inap sotpela taim. Sampela i bin mekim olsem bilong mekim bikpela wok moa bilong autim tok. Sampela narapela ol i bin lusim ples bilong ol, long wanem, ol i no laik insait long ol samting bilong dispela graun. (Aisaia 2:4; Jon 17:16) Long sampela hap, “Sisar” i bin makim ol yangpela i stap gut long God long i go kalabus o long mekim sampela wok bilong komiuniti.a—Mak 12:17; Taitus 3:1, 2.
Taim ol i stap long kalabus long wanem ol i no laik insait long ol samting bilong dispela graun, ating ol dispela yangpela bai stap longpela taim wantaim ol narapela yangpela i save bikhet. Na i gat sampela narapela as na sampela yangpela i mas lusim papamama, ol tu i mas mekim wok namel long ol man i no save bihainim stretpela pasin. Olsem wanem ol dispela yangpela Kristen o ol narapela em kain samting olsem i painim ol, ol inap sanap strong na karim ol hevi taim ol i wok strong long “wokabaut long pasin inap tru long pasin bilong God yet?” (1 Tesalonaika 2:12) Olsem wanem ol papamama bilong ol inap helpim ol long redi long kain samting olsem i kamap?—Sindaun 22:3.
Sampela Hevi
Wanpela yangpela man i gat 21 krismas nem bilong em, Tákis.b Em i bin i stap longwe long papamama inap 37 mun, em i tok: “Taim ol samting i kamap na mi bin stap longwe long papamama bilong mi na ol elda husat i save gut long mi, dispela i hatwok tru.” Na em i tok moa: “Sampela taim mi pilim olsem i no gat man bilong helpim mi.” Pétros em i gat 20 krismas na em i mas stap longwe long papamama inap 2-pela yia. Em i tok: “Em namba wan taim long laip bilong mi long mi yet i mas makim ol samting mi bai mekim bilong amamas na ol poroman, na i no olgeta taim ol samting mi makim bilong mekim i gutpela.” Na em i tok: “Sampela taim mi pret liklik long bikpela wok moa mi gat nau taim mi yet i ken makim ol samting mi laik mekim.” Tássos, em wanpela elda Kristen na planti taim em i save bung wantaim ol yangpela Kristen em dispela kain samting i bin painim ol, na em i tok: “Ol yangpela husat i no save was gut na ol i no gat strongpela bel, ol pasin olsem pasin bilong mekim tok i doti, bikhet, na pasin bilong kros pait em ol yangpela i no stap long tok i tru i save mekim, dispela inap bagarapim tingting bilong ol.”
Taim ol yangpela i stap na wok namel long ol manmeri i no save bihainim ol stiatok bilong Baibel, ol dispela yangpela Kristen i mas was gut na bai ol i no bihainim pasin bilong ol wankrismas bilong ol em ol i no save bihainim tok bilong Baibel. (Song 1:1; 26:4; 119:9) Ating pasin bilong stadi, go long ol miting, na autim tok i hatwok long mekim. (Filipai 3:16) Na tu, ating em i no isi long putim ol mak bilong spirit na mekim ol samting bilong winim ol dispela mak.
Ol yangpela Kristen i stap gut long God, ol i laik mekim Jehova i amamas long pasin na toktok bilong ol. Ol i wok strong long bihainim singaut bilong Papa bilong ol long heven: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Ol i save olsem bilas na pasin bilong ol bai stiaim ol man long i gat wanem kain tingting long Jehova na ol lain bilong em.—1 Pita 2:12.
Em i gutpela tru olsem planti bilong ol dispela yangpela i save wok strong long bihainim wankain pasin olsem bilong ol brata long taim bilong ol aposel, em aposel Pol i bin beten long ol olsem: “Yupela inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela. Na bai yupela i mekim planti kain gutpela wok . . . na bai yupela i stap isi na wetim taim ol hevi i pinis. Na bai yupela i amamas.” (Kolosi 1:9-11) Baibel i kamapim stori bilong sampela yangpela i save pret long God em ol i bin wokabaut long pasin God i laikim, na ol i bin stap namel long ol lain i narapela kain, ol lain i save lotuim god giaman na ol lain i save mekim pasin nogut.—Filipai 2:15.
Jehova i Stap Wantaim Josep
Taim Josep, pikinini bilong Jekop na Resel, i yangpela yet, em i stap longwe long papa bilong em i save pret long God. Ol brata bilong em i bin salim em olsem wanpela wokboi nating long Isip. Josep i gat nem olsem em i wanpela strongpela wokman, na em i man bilong tok tru, na man bilong bihainim stretpela pasin. Maski em i mekim wok olsem wokboi bilong Potifar—man i no save lotuim Jehova—Josep i save mekim gut ol wok bilong em na em i save wok strong, olsem na bos bilong em i givim wok bilong bosim haus na olgeta samting bilong en long Josep. (Stat 39:2-6) Josep i stap gut long Jehova na dispela i mekim na ol i putim em long kalabus, tasol em i no gat kain tingting olsem: “Bilong wanem mi mas stap gut long God?” Taim em i stap long kalabus em i kamapim yet ol gutpela pasin, na i no longtaim em i bosim planti wok bilong haus kalabus. (Stat 39:17-22) God i blesim em na olsem Stat 39:23 i tok, “Bikpela i stap wantaim Josep.”
Josep i stap longwe long famili bilong em i save pret long God, olsem na em bai isi tru long Josep i senisim pasin bilong em na bihainim pasin bilong ol haiden em i stap namel long ol! Tasol em i no mekim olsem, em i bihainim ol stiatok em God i as bilong en na em i stap klin maski bikpela traim i painim em. Taim meri bilong Potifar i wok long tokim em long slip wantaim em, em i tok olsem: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.”—Stat 39:7-9.
Ol yangpela Witnes long nau i mas bihainim ol tok lukaut long Baibel long sakim ol poroman nogut, ol amamas nogut, ol piksa bilong pasin sem, na ol musik nogut. Ol i save olsem: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.”—Sindaun 15:3.
Moses i Sakim “Amamas Bilong Sotpela Taim Tasol”
Moses i go bikpela insait long haus king bilong Fero, em dispela hap i pulap long ol lain i save lotuim ol god giaman na ol i tingting tasol long painim amamas. Baibel i tok long em olsem: “Moses i bilip long God . . . em i no laik bai ol i kolim em pikinini bilong pikinini meri bilong king bilong Isip. Nogat. Em i ting, mobeta em i kisim hevi wantaim ol lain bilong God. Em i no laik bihainim pasin bilong sin na kisim amamas bilong sotpela taim tasol.”—Hibru 11:24, 25.
Pasin bilong laikim ol samting bilong graun inap helpim yumi long sampela samting, tasol ol dispela samting i bilong sotpela taim tasol na ol bai pinis taim pasin bilong dispela graun i pinis. (1 Jon 2:15-17) Em i gutpela yu bihainim pasin bilong Moses, a? Baibel i tok olsem “Moses i mekim wankain pasin olsem man i bin lukim God, na em i stap strong tru.” (Hibru 11:27) Em i tingting strong long ol samting bilong spirit em ol tumbuna bilong em i save pret long God i bin kisim. Em i mekim samting Jehova i tingting pinis long mekim i kamap olsem samting em yet i laik mekim; em i wok long bihainim laik bilong God.— Kisim Bek 2:11; Aposel 7:23, 25.
Taim ol yangpela i save pret long God i stap wantaim ol man i no save mekim stretpela pasin, ol inap strongim pasin bilong ol long pas gut wantaim Jehova long rot bilong mekim stadi na kisim save gut long God em yumi ol man i no inap lukim long ai. Pasin bilong insait tru long ol wok Kristen—go oltaim long ol miting na autim tok—bai helpim ol dispela yangpela long tingim ol samting bilong spirit. (Song 63:6; 77:12) Ol i mas wok long kisim strongpela bilip na wetim ol gutpela samting bai kamap bihain olsem Moses i bin mekim. Ol i mas wok long tingim Jehova na mekim wok bilong em na amamas long i stap pren bilong em.
Em i Yusim Maus Bilong Em Long Litimapim Nem Bilong God
Narapela yangpela husat i stap gutpela piksa taim em i stap longwe long papamama, em dispela yangpela meri Israel ol Siria i bin kisim i go kalabus long taim bilong profet bilong God, em Elisa. Em i kamap wokmeri bilong meri bilong kepten bilong ami bilong Siria i gat sik lepra, nem bilong em Naman. Dispela yangpela meri i tokim bosmeri bilong em olsem: “I gutpela sapos man bilong yu i go long dispela profet i stap long Samaria. Dispela profet inap long mekim sik bilong en i orait gen.” Dispela yangpela meri i autim tok, olsem na Naman i go lukim Elisa long Israel na skin bilong em i kamap gutpela gen. Na tu, Naman i kirap lotuim Jehova.—2 King 5:1-3, 13-19.
Pasin bilong dispela yangpela meri i kamapim klia olsem ol yangpela i mas yusim maus bilong ol long pasin i litimapim nem bilong God, na ol i ken mekim olsem tu long taim ol i stap longwe long papamama bilong ol. Sapos dispela yangpela meri i save “mekim tok kranki” o “tok pilai nogut,” ating em bai i no inap pilim gutpela long mekim gutpela wok long maus bilong em taim rot i op long mekim olsem, a? (Efesus 5:4; Sindaun 15:2) Níkos, em wanpela yangpela man i gat 23 krismas samting, na ol i bin putim em long kalabus long wanem em i no laik insait long pait, em i tok: “Taim mi wantaim sampela narapela yangpela brata i stap long kalabus—mipela i stap longwe long ol papamama na ol elda—mi luksave olsem toktok bilong mipela i wok long go nogut. Toktok bilong mipela i no givim biknem long Jehova.” Tasol gutpela tru, ol i bin helpim Níkos na ol dispela yangpela long bihainim tok bilong Pol long dispela samting: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin.”—Efesus 5:3.
Long Ol Jehova i Stap Tru Tru
Ekspiriens bilong tripela poroman Hibru bilong Daniel long Babilon bilong bipo i kamapim klia dispela stiatok em Jisas i bin mekim olsem, sapos man i save lukaut gut long ol liklik samting, orait em bai i lukaut gut long ol bikpela samting. (Luk 16:10) Taim hevi i painim ol long ol i mas kisim kaikai em lo bilong Moses i tambuim, ol inap kisim tingting olsem ol i stap kalabus long narapela ples, olsem na ol i no gat rot bilong mekim wanpela samting. Tasol ol i bin kisim gutpela blesim tru, long wanem, ol i tingim liklik samting i bikpela samting! Bodi bilong ol i strongpela na gutpela na ol i gat gutpela save winim ol narapela yangpela em ol i kaikai ol gutpela kaikai bilong king. Ol i bin i stap gut long God long ol liklik samting na dispela i bin strongim ol, olsem na taim bikpela traim i painim ol long ol i mas brukim skru long wanpela imis, ol i no laik mekim olsem.—Daniel 1:3-21; 3:1-30.
Long ol dispela tripela yangpela, Jehova i stap tru tru. Maski ol i stap longwe long ol papamama na ples bilong lotuim God, ol i tingting strong long i stap klin na ol i no larim pasin bilong dispela graun i mekim ol i kamap doti. (2 Pita 3:14) Pasin bilong pas gut wantaim Jehova i bikpela samting long ol, olsem na ol i redi long lusim laip bilong ol na bai ol inap pas gut wantaim em.
Jehova Bai i No Inap Lusim Yu
Taim ol yangpela i stap longwe long ol lain ol i laikim na bilip long ol, ating bel bilong ol bai i no stap isi, na ol i no save ol bai mekim wanem na ol bai pret liklik. Tasol ol i ken bilip tru olsem taim traim na hevi i painim ol, Jehova ‘i no inap lusim ol.’ (Song 94:14) Sapos ol dispela kain yangpela ‘i mekim stretpela pasin, na ol i karim pen long dispela,’ Jehova bai helpim ol long wokabaut yet long “stretpela pasin tasol.”—1 Pita 3:14; Sindaun 8:20.
Oltaim Jehova i bin strongim na mekim gut tru long Josep, Moses, dispela yangpela meri Israel, na tripela yangpela Hibru. Long nau, em i yusim holi spirit bilong em, Tok bilong em, na oganaisesen bilong em bilong helpim ol man husat i “ran strong long dispela gutpela resis,” na em bai givim ol “laip i stap gut oltaim oltaim.” (1 Timoti 6:11, 12) Tru tumas, yu inap wokabaut long pasin Jehova i laikim, na dispela em i gutpela samting yu ken mekim.—Sindaun 23:15, 19.
[Ol Futnot]
b Mipela i bin senisim sampela nem.
[Blok long pes 25]
OL PAPAMAMA—REDIM OL PIKININI BILONG YUPELA!
“Ol pikinini man bilong yangpela man i olsem ol spia i stap long han bilong wanpela soldia.” (Song 127:4) Wanpela spia i no inap kamap nating long mak bilong en, nogat. Man i mas makim gut na sutim spia. Olsem tasol, ol pikinini bai i no inap redi long karim ol hevi bilong i stap longwe long papamama sapos papamama i no skulim ol.—Sindaun 22:6.
Ol yangpela inap kirap wantu tasol na mekim sampela samting o ol inap larim ol “laik nogut i save kamap long bel bilong ol yangpela” i stiaim ol. (2 Timoti 2:22) Baibel i tok: “Sapos yu stretim pikinini na givim kanda long em, orait em bai i kisim gutpela tingting na save. Tasol sapos pikinini i bihainim laik bilong em yet oltaim, orait em bai i mekim mama bilong en i sem.” (Sindaun 29:15) Sapos papamama i no putim sampela mak long ol pikinini i mas bihainim, dispela inap mekim na pikinini i no inap redi long mekim ol samting taim em i stap longwe long papamama.
Ol papamama Kristen i mas tokaut klia long ol pikinini bilong ol long ol hevi i stap long nau. Long pasin i no bagarapim bel bilong pikinini, ol i ken stori long ol samting nogut inap painim wanpela yangpela husat i mas stap longwe long papamama. Dispela samting ol i lainim pikinini long en wantaim gutpela save i kam long God, bai givim “gutpela tingting . . . long ol yangpela man, na soim ol long gutpela pasin bilong wokabaut.”—Sindaun 1:4.
Ol papamama husat i helpim ol pikinini bilong ol long kisim ol pasin God i laikim na ol gutpela pasin long bel bilong ol, ol dispela pikinini bai inap long karim ol hevi. Pasin bilong mekim famili-stadi oltaim, toktok gut wantaim, na tingim tru ol pikinini, ol dispela samting i bikpela samting bilong helpim pikinini. Ol papamama i mas bihainim stretpela tingting na gutpela pasin isi long skulim ol pikinini long bihainim ol tok bilong God, na redim ol long lukautim ol yet bihain. Papamama yet i mas i stap gutpela piksa na long dispela rot ol inap skulim ol pikinini olsem maski ol i stap namel long ol man bilong dispela graun, i no olsem ol i mas insait long ol samting bilong en, nogat.—Jon 17:15, 16.
[Piksa long pes 23]
Sampela yangpela Kristen i mas lusim ples bilong ol
[Ol Piksa long pes 24]
Taim ol yangpela i sakim ol traim, ol i bihainim pasin bilong Josep long i stap klin
[Ol Piksa long pes 26]
Bihainim pasin bilong yangpela meri Israel, em i bin mekim wok long maus bilong em bilong givim biknem long Jehova