Ripot Long Wok Bilong Kingdom

Program Long Televisen i Kirapim Em Long Givim Biknem Long God

APOSEL Pol i tok olsem “sampela i lukim ol man i givim biknem long mi, na ol i bel nogut long mi, na ol i laik daunim mi, na long dispela as tasol ol i autim tok bilong Krais. Tasol sampela i gat gutpela tingting na ol i autim tok.” (Filipai 1:15) Sampela taim, ol man em ol i laik bagarapim nem bilong lain bilong Jehova, ol i bin kirapim ol man i gat gutpela bel long kisim tok i tru, maski ol i no bin tingting long mekim olsem.

Long Novemba 1998, wanpela stori i kamap long televisen bilong Frans i soim sampela piksa bilong Betel, em brens-ofis bilong ol Witnes Bilong Jehova long Louviers, Frans. Maski ol man i gat kain kain tingting long dispela program, ol gutpela samting i kamap long rot ol i no ting bai kamap.

Wanpela bilong ol lain i lukim dispela program em wanpela meri nem bilong em Anna-Paula, em i stap 60 kilomita longwe long Betel. Anna-Paula em i wanpela mama wanpis i gat tupela pikinini, na em i wok long painim wanpela wok mani. Olsem na long moningtaim long de bihain, em i ring long Betel bilong painim wok. Em i tok: “Ol samting mi lukim long dispela program long televisen i mekim na mi ting dispela em i gutpela ples na wok ol i mekim long dispela hap i gutpela.” Tasol em i kirap nogut tru taim em i kisim save olsem olgeta lain i wok long Betel ol i mekim wok olsem ol volantia! Ol i stori liklik long em long wok bilong ol Witnes Bilong Jehova, na em i orait long wanpela Witnes i go lukim em.

Taim Léna, em i save mekim wok bilong God fultaim long kongrigesen i stap klostu, em i go lukim Anna-Paula, tupela i stori inap longpela taim, na Anna-Paula i kisim buk Save i Bringim Man Long Laip Oltaim.a Taim Léna i go lukim em gen, Anna-Paula i bin ritim dispela buk olgeta na em i gat planti askim. Em i orait long stadi long Baibel. Anna-Paula i tok: “Mi tingim dispela olsem rot bilong kisim save long Tok Bilong God. Mi no bin gat Baibel bipo.”

Long Janueri 1999, Anna-Paula i go raun lukim Betel, na long wik bihain em i go namba wan taim long miting Kristen. Bihain liklik, em i kirap stadi wantaim ol pikinini bilong em long Baibel na em i autim tok long ol pren bilong em. Em i tok: “Mi no inap pasim ol tok i tru bilong Baibel mi wok long lainim. Mi laik tokim ol man long ol tok i tru bilong Baibel na mekim gut bel bilong ol.” Anna-Paula i wok strong long daunim sampela hevi bilong em yet, na bihain long dispela em i go oltaim long ol miting. Em i kamap strong hariap na em i kisim baptais long Me 5, 2002.

Na tu, gutpela pasin bilong Anna-Paula na pasin bilong em long givim bel long autim tok i mekim na mama bilong em i kirap stadi long Baibel na i no longtaim em i kisim baptais. Anna-Paula i tok: “Mi amamas tru. Na mi save tenkyu long Jehova long olgeta de long em i opim rot bilong mi long kisim save long em na lotuim em na mi tenkyu long olgeta gutpela samting em i givim mi.”

[Futnot]

[Ol Piksa long pes 8]

Antap: Anna-Paula

Daunbilo: Rot i go insait long brens-ofis long Frans