Famili Bilong Jisas—Ol i Husat?

LONG planti hap bilong graun, long mun Disemba ol man i lukim planti piksa bilong bebi Jisas em mama bilong em, Maria, na waspapa bilong em Josep, ol i mekim gut long em. Kain piksa bilong famili inap pulim tu ai bilong ol lain i no tok ol i Kristen. Long ol dispela piksa Jisas em i bikpela samting, olsem na Baibel i tok wanem long famili bilong em long graun?

Jisas i kamap long wanpela famili i narapela kain. Wanpela meri i no bin slip wantaim man, nem bilong em Maria i karim em, olsem na Jisas i kamap long wanpela famili bilong graun. Baibel i tok, long rot bilong holi spirit, God i kisim laip bilong em long heven na putim long bel bilong Maria. (Luk 1:​30-​35) Paslain long ensel i tokaut long Maria bai i gat bel long Jisas, Maria na Josep i bin pasim tok long marit, olsem na bihain Josep bai kamap waspapa bilong Jisas.

Bihain long Maria i karim pinis Jisas, em na Josep i gat ol narapela pikinini, em ol brata na susa bilong Jisas. Ol tok lain Nasaret i mekim i kamapim klia dispela samting, ol i tok: “Yumi save, dispela man em i pikinini bilong wanpela kamda, na Maria em i mama bilong en. Na Jems na Josep na Saimon na Judas, ol i brata bilong en. Na olgeta susa bilong en, ol i stap wantaim yumi.” (Matyu 1:​25; 13:​55, 56; Mak 6:⁠3) Yumi ken save olsem insait long famili bilong Jisas, i gat papamama, 4-pela brata, na 2-pela susa samting.

Tasol sampela man long nau i ting olsem ol brata na susa bilong Jisas, ol i no pikinini bilong Josep na Maria. Bilong wanem ol i ting olsem? Buk New Catholic Encyclopedia i tok: “Kirap long taim Misin i bin kamap, em i bin skulim ol man olsem i no gat wanpela taim Maria i bin slip wantaim man. Olsem na yumi ken save tru olsem Maria i no bin karim ol narapela pikinini.” Dispela wankain buk i tok olsem dispela tok “brata” na “susa” inap makim “wanpela man o ol man i wanlotu o narapela samting i mekim na ol i pas gut wantaim” o ol i wanblut, ating ol i kasen samting.

Yu ting dispela tok i stret? Sampela tisa bilong lotu Katolik ol i no wanbel wantaim dispela bilip bilong Misin, na ol i helpim dispela tingting olsem Jisas i gat ol brata na susa bilong em. John P. Meier, bipo em presiden bilong wanpela lain (Catholic Bible Association of America), em i tok: “Long Nupela Testamen i gat dispela tok adelphos [brata], na taim ol i no kolim dispela tok olsem wanpela tok piksa tasol, ol i kolim dispela tok bilong makim olsem wanem man i pas wantaim narapela, dispela tok i makim brata o susa tru, i no gat narapela mining bilong en.”a Yes, Baibel i kamapim olsem Jisas i gat ol brata na susa bilong em, em Josep na Maria i bin kamapim.

Ol Gutnius i kolim ol narapela wanblut bilong Jisas, tasol nau yumi ken stori long famili tru bilong Jisas na ol samting yumi ken lainim long ol.

[Futnot]