Wok Ol Man i Mekim Bilong Amamasim God

“LONG olgeta lain i bin kamap, i gat bilip long God, olsem em Man bilong bosim heven na graun na wokim ol samting. Dispela tok i stret tu long ol kantri we lotu na gavman i no pas wantaim.” John Bowker i bin tok olsem long buk God​​—⁠A Brief History. Long kain kain rot ol man i bin wok long painim God​—⁠ol i laik bai em i ken orait long ol. Long olgeta hap bilong graun, planti man i gat laik tru long mekim ol samting God i laikim. Tasol samting ol i mekim i no wankain, long wanem, ol i gat narapela narapela bilip.

Sampela i ting, bilong God i ken orait long ol, ol i mas bihainim stretpela pasin na em tasol. Na sampela i ting olsem God bai orait long ol sapos ol i mekim sampela gutpela wok bilong helpim ol man i stap rabis. Na long planti milion manmeri, ol bilaspasin bilong lotu i bikpela samting.

Tasol sampela i ting olsem God i stap longwe tumas o i gat planti samting tumas em i mas mekim, olsem na em i no ken tingim ol man nating. Saveman Epicurus bilong kantri Grik bilong bipo i bin bilip olsem ‘ol god i stap longwe tumas, olsem na ol i no inap helpim ol man.’ Planti man i gat dispela kain tingting ol i man bilong lotu. Sampela i mekim ol ofa na mekim kain kain bilaspasin bilong mekim kol bel bilong ol tumbuna bilong ol i dai pinis.

Wanem tingting bilong yu? Tru God i lukim ol wok yumi mekim bilong em i ken orait long yumi? Yumi inap mekim sampela pasin em God i pilim tru long bel na i mekim em i amamas?

[Piksa Kredit Lain long pes 2]

COVER: Courtesy of ROE/Anglo-Australian Observatory, photograph by David Malin