Ripot Long Wok Bilong Kingdom
Painim Ol Man i Gat Gutpela Bel Long Ol Ples Bus Bilong Australia
BIKPELA hap graun i stap long namel bilong Australia, ol man i save laikim na kolim olsem ol ples bus. Sampela ples bilong dispela hap i stap longwe tru, ol i no bin harim gutnius insait long 12-pela yia. Olsem na ol Witnes Bilong Jehova long Darwin, em biktaun bilong Northern Territory, ol i stretim rot bilong mekim bikpela wok autim tok inap 9-pela de bilong painim ol man i gat gutpela bel.—Matyu 10:11.
Ol i kirap stretim ol samting bilong dispela wok 12-pela mun paslain long wok i kirap. Na tu, ol i skelim na makim ol teritori—inap 800,000 skwe kilomita—em bikpela hap winim kantri Nu Silan inap 3-pela taim. Bilong save long dispela bikpela hap teritori i stap longwe olsem wanem, tingim olsem olgeta wan wan han rot i lusim bikrot i go insait long ol fam bilong ol bulmakau, em i longpela tru winim 30 kilomita, kirap long geit i go olgeta long haus! Na tu, sampela fam bilong bulmakau i stap longwe longwe long narapela olsem 300 kilomita o moa.
Inap 145 Witnes ol i amamas long insait long dispela wok. Sampela i kam longwe tru long Tasmania. Sampela i kam long ol 4-wil draiv ka i pulap long ol samting bilong dispela wok, ol speapat, na bensin. Sampela i pulapim ol samting long wanpela karis na ka i pulim long baksait. Na tu, ol i haiarim tupela bikpela bas i save karim 22 pasindia, bilong kisim ol arapela em ol 4-wil draiv ka bilong ol i no gutpela long ol dispela rot. Ol bratasista i raun long bas ol i autim tok tasol long ol liklik taun ol i makim.
Paslain long ol i go, ol brata i lukautim dispela wok i kamapim sampela tok na soim long pasin bilong autim gutnius long dispela narakain teritori. Olsem: Bilong autim gut tok long ol ples bilong ol Aborijini, i gat ol lo we ol i mas bihainim na ol i mas save long ol kastam bilong ol Aborijini. Ol i toktok tu long ol i mas lukautim ol animal bilong bus.
Planti gutpela samting i kamap long wok ol i bin mekim. Olsem, long wanpela ples bilong ol Aborijini, ol brata i stretim rot long mekim wanpela pablik tok em Baibel i as bilong en. Bikmeri bilong ples em yet i go toksave long ol man long dispela pablik tok. Bihain long pablik tok, ol i tilim 5-pela buk na 41 buklet long ol man i kam harim tok. Long narapela ples ol i bungim wanpela Aborijini. Em i gat Baibel bilong em yet, King James Version, tasol em i olpela na i bruk bruk. Taim ol i askim em sapos em i save long nem bilong God, em i tok yes na em i kamautim wanpela olpela nius Wastaua long saket bilong em. Em i ritim long Wastaua tok bilong Mak 12:30, i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela.” Em i tok, “Mi laikim tru dispela skripsa.” Ol i stori longpela taim liklik na em i amamas long kisim wanpela nupela Baibel na ol arapela buk samting em Baibel i as bilong en.
Klostu long Gulf of Carpentaria, bosman bilong wanpela fam bilong bulmakau—inap olsem 400,000 hekta—i kamapim olsem em i laikim tok bilong Kingdom. Taim ol i soim em buk Baibel Stori Buk Bilong Mi na Save i Bringim Man Long Laip Oltaim,a em i askim ol sapos i gat ol buk samting long tok Kriol bilong ol Aborijini. Dispela askim bilong em i narakain, long wanem, maski planti Aborijini i mekim tok Kriol, wan wan tasol inap ritim. Tasol ol i kisim save olsem olgeta 50 wokman bilong dispela fam inap ritim tok Kriol. Dispela bosman i amamas long kisim ol buk na nius samting bilong Baibel long tok Kriol, na em i givim telefon namba bilong em long ol brata bambai ol i ken toktok gen wantaim em.
Long dispela 9-pela de bilong bikpela wok autim tok, ol i tilim 120 Baibel, 770 buk, 705 magasin, na 1,965 buklet. Na tu, ol i mekim 720 gobek, na kirapim 215 Baibel stadi.
Tru tumas, planti man i gat gutpela bel em ol i stap nabaut long dispela bikpela ples, ol i kisim ol samting i inapim hangre bilong ol long ol samting bilong spirit.—Matyu 5:6.
[Futnot]
a Ol Witnes Bilong Jehova i wokim.
[Mep long pes 30]
(Bilong save ol dispela rait i stap we long pes, lukim buk o magasin)
AUSTRALIA
NORTHERN TERRITORY
Darwin
Gulf of Carpentaria
Sydney
TASMANIA