Yumi Bihainim Rot i Go We?

OLGETA LAIN I STAP WANBEL. Em wanpela gutpela tok. Olgeta man i laik dispela samting i kamap, a? Tru tumas, i gat planti tok long kamapim pasin wanbel. Planti taim ol hetman bilong dispela graun i stori long dispela samting long ol bung bilong ol. Long Ogas 2000, winim 1,000 hetman bilong lotu i holim wanpela bikpela bung (Millenium World Peace Summit) long Yunaitet Nesen long New York. Ol i toktok long ol rot bilong stretim sampela hevi bilong dispela graun. Tasol dispela bung i kamapim long ples klia ol hevi bilong dispela graun. Wanpela loya i save skelim ol lo bilong ol Muslim, em i bilong Jerusalem, em i no kam, long wanem, wanpela tisa bilong lotu Juda i stap. Sampela i bel hevi, bikos ol i no singautim Dalai Lama long kam long namba wan na namba tu de, ol i ting nogut em bai skrapim bel bilong ol Saina.

Long Oktoba 2003, ol kantri long Esia em ol i stap klostu long solwara Pasifik ol i mekim wanpela bung, em Asia-Pacific Economic Cooperation (APEC), bilong toktok long pasin bilong ol man long i stap bel isi. Ol 21 kantri i bung wantaim ol i tok promis olsem ol bai pinisim ol lain teroris na ol i pasim tok long helpim olgeta man bilong graun long i stap bel isi moa. Tasol long dispela bung sampela hetman i toktok planti long ol tok bilong wanpela praim minista. Ol i tok dispela tok i nogut tru na i sutim ol lain Juda.

Bilong Wanem Ol i No Stap Wanbel?

Tru ol i mekim planti tok long helpim olgeta lain bilong graun long i stap wanbel, tasol yumi no lukim olsem dispela samting i wok long kamap. Maski planti man i wok strong long kamapim pasin wanbel namel long olgeta lain, bilong wanem dispela i no kamap yet long nau?

Hap bekim bilong dispela askim i stap long tok bilong wanpela praim minista i bin stap long bung bilong APEC. Em i tok: “Wanpela samting em pasin bilong ol lain long litimapim kantri bilong ol yet.” Tru tumas, ol lain manmeri i tingim tumas kantri bilong ol. Olgeta kantri na olgeta lain i gat strongpela laik long ol i ken bosim ol yet. Laik bilong ol long bosim kantri bilong ol yet, na tingting long winim ol narapela kantri, na pasin mangal, ol dispela samting i kamapim wanpela pasin em inap tru long bagarapim ol lain. Planti taim, sapos samting bilong helpim kantri bilong ol yet i pait wantaim samting bilong helpim olgeta lain manmeri, pasin bilong tingim kantri i win.

Man bilong raitim song i tok long pasin bilong hambak long kantri olsem em i wanpela “sik nogut.” (Song 91:⁠3) Em i olsem wanpela bikpela sik i kalap long olgeta manmeri, na i kamapim planti pen na hevi. Pasin bilong hambak long kantri na bel nogut long ol narapela man i stap inap planti handet yia pinis. Long nau, dispela pasin i save kirapim yet pasin bilong brukim ol lain, na ol hetman bilong dispela graun i no inap stopim dispela pasin.

Planti gavman i luksave olsem pasin bilong hambak long kantri na tingim ol yet tasol em i as bilong ol hevi bilong ol lain bilong dispela graun. Olsem: Seketeri-Jeneral bilong Yunaitet Nesen long bipo, em U Thant, i tok: “As na planti hevi i painim yumi long nau em ol tingting kranki bilong ol man . . . Wanpela tingting olsem em pasin bilong hambak long kantri​—⁠‘kantri bilong mi, maski i stret o i no stret.’ ” Tasol maski i olsem, planti kantri long nau i save tingim ol yet tasol, na ol i tokaut strong olsem ol i laik bosim ol yet. Ol kantri i bosim ol yet ol i no laik lusim liklik hap strong bilong ol. Olsem: Nius International Herald Tribune i mekim dispela tok long Yuropian Yunion: “Pasin bilong narapela i laik winim narapela na pasin bilong i no bilip tumas long narapela, ol i pasin tru bilong wok politik bilong ol kantri long Yurop. Klostu olgeta kantri long Yurop i ting i no stret long narapela kantri insait long Yunion bai kisim bikpela strong moa na go pas long ol.”

Tok Bilong God, em Baibel, i tokaut stret long ol samting i kamap taim ol man i bosim ol yet, olsem: “Sampela bikman i wok long daunim ol arapela manmeri na mekim nogut long ol.” (Saveman 8:⁠9) Ol i brukim dispela graun long ol wan wan kantri, olsem na ol lain man na ol wan wan man tu ol i pilim truim bilong stiatok bilong Baibel olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.”​​—⁠Sindaun 18:⁠1.

Man Bilong Wokim yumi, em i save long wanem samting i gutpela long yumi, em i no bin tingting liklik olsem ol man i mas kamapim ol gavman na bosim ol yet. Taim ol i mekim olsem, ol manmeri i givim baksait long samting God i tingting pinis long mekim na long tingting olsem olgeta samting i bilong God. Song 95:​3-5 i tok: “Bikpela em i strongpela God. Em i strongpela king na em i antap long olgeta giaman god. Em i save bosim olgeta hap graun, long olgeta ples i daun tumas i go inap long olgeta maunten i antap tru. Em yet i wokim graun na solwara, olsem na em i bosim ol.” God em i King na olgeta man i mas lukluk i go long em bilong bosim ol. Taim ol lain i wok long bosim ol yet, ol i sakim wok bos bilong God.​​—⁠Song 2:⁠2.

Ol i Mas i Gat Wanem Samting?

I gat wanpela rot tasol bilong olgeta lain i ken stap wanbel, olsem: I mas i gat wanpela gavman tasol bilong olgeta hap bilong graun na dispela gavman i mas mekim wok bilong helpim olgeta manmeri. Planti man em ol i save tingting planti long ol samting i wok long kamap, ol i luksave long dispela samting. Tasol ol i no save tingim rot stret bilong kamapim dispela. Olsem: Planti man, na planti hetman bilong lotu tu, ol i kirapim ol man long lukluk i go long Yunaitet Nesen bilong helpim olgeta lain long i stap wanbel. Tasol long bipo yet na i kam inap long nau ol oganaisesen bilong dispela graun, maski ol i gat strongpela tingting long helpim ol man, ol i no inap tru long stretim ol hevi bilong ol man long olgeta hap bilong graun. Planti bilong ol dispela oganaisesen ol i stap olsem piksa long pasin bilong ol kantri i stap insait long en, em ol i no stap wanbel liklik.

Baibel i givim tok lukaut long pasin bilong lukluk i go long ol oganaisesen bilong ol man bilong stretim ol hevi, na i tok: “Ol king na ol man bilong graun i no inap kisim bek yu. Olsem na nogut yu bilip long ol.” (Song 146:⁠3) Olsem wanem? Dispela i makim olsem ol lain manmeri i no inap i stap wanbel? Nogat tru. I gat narapela rot.

Planti i no save olsem God i kamapim pinis wanpela gavman, na dispela gavman inap helpim ol lain long i stap wanbel. Baibel i tok long God Jehova olsem: “Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet. Askim mi, na bai mi givim olgeta lain manmeri long yu, na bai yu bosim olgeta hap graun.” (Song 2:​6, 8) Tingim: Dispela skripsa hia i tok God Jehova i bin “makim pinis dispela man bilong i stap king,” na ves 7 i kolim em olsem “Pikinini bilong mi.” Dispela man em i Pikinini spirit bilong God, em Jisas Krais na God i makim em bilong bosim olgeta lain manmeri.

Pasin Wanbel Bai Kamap Olsem Wanem?

Planti man i no tingim dispela gavman long heven em God i bin kamapim. Ol lain i ting ol i gat rait long bosim ol yet na ol i holimpas strong dispela rait. Tasol God i no orait long ol man i sakim wok bos bilong em na gavman em i bin kamapim. Long ol man i sakim wok bos bilong Jehova, Song 2:9 i tok: “Bai yu [Pikinini Man, Jisas Krais] bosim ol long strongpela han bilong yu. Na bai yu brukim ol liklik liklik, olsem man i brukim sospen graun.” Long nau ol lain i wokabaut long rot bilong mekim pait long God, maski ol i save long dispela o nogat. Laspela buk bilong Baibel i tok long “ol king bilong olgeta kantri bilong graun” ol i bung wantaim bilong “pait long dispela bikpela de bilong God I Gat Olgeta Strong.” (KTH 16:14) Krais bai pinisim ol lain na pasin bilong ol long brukim ol lain. Dispela bai opim rot na gavman bilong God i ken mekim wok bilong en na i no gat samting i pasim em.

Olsem King Bilong Heven na Graun, long rot bilong Pikinini bilong em God Jehova bai kamapim strong bilong em bilong mekim ol senis inap long olgeta lain bilong dispela graun i ken stap wanbel. Gavman bilong God bai kamapim pasin wanbel tru na mekim gut long olgeta manmeri i laikim tumas stretpela pasin. Gutpela yu lusim sampela minit bilong ritim Song 72 long Baibel bilong yu. Long dispela song yu ken kisim save long tok profet long samting gavman aninit long Pikinini Bilong God bai mekim bilong helpim ol man. Ol man long olgeta hap bilong graun bai stap wanbel tru, na olgeta hevi bilong ol​—⁠ol man i daunim ol, pasin pait, rabis, na ol kain samting olsem​—⁠bai pinis.

Ol lain bilong dispela graun i bruk bruk, olsem na planti man i ting yumi no inap wetim kain gutpela samting olsem i kamap. Tasol ol man i popaia tru taim ol i ting olsem. Long olgeta taim ol tok promis bilong God i bin kamap tru, na ol bai kamap tru long olgeta taim bihain. (Aisaia 55:​10, 11) Yu laik i stap taim ol dispela senis i kamap? Yu inap. Wanpela lain i stap pinis ol i wok long redi bilong i stap long dispela taim. Ol i bilong olgeta kantri, na ol i no pait, nogat, ol i stap wanbel na daun long wok bos bilong God. (Aisaia 2:​2-4) Husat dispela lain? Em ol Witnes Bilong Jehova. I gutpela sapos yu bihainim singaut bilong ol long kam long ol miting bilong ol. Bai yu amamas long bung wantaim ol manmeri em ol inap helpim yu long daun long wok bos bilong God na stap wanbel i go inap long olgeta taim bihain.

[Ol Piksa long pes 7]

Ol manmeri bilong olgeta kantri i wok long redi long i stap long wanpela graun we olgeta lain i stap wanbel

[Piksa Kredit Lain long pes 4]

Saeed Khan/AFP/Getty Images

[Ol Piksa Kredit Lain long pes 5]

Woman grieving: Igor Dutina/AFP/Getty Images; protesters: Said Khatib/AFP/Getty Images; armored cars: Joseph Barrak/AFP/Getty Images