Stap Rabis​—Bikpela Hevi Bilong Nau

VICENTEa i save pulim wilka bilong em long ol rot bilong São Paulo, Brasil. Em i save bungim ol pipia katon, ol hap ain, na plastik. Klostu long tudak, em i save putim hap katon long graun aninit long wilka na slip antap long en. I luk olsem em i no harim pairap bilong planti ka na bas i go i kam long rot. Bipo em i gat wok mani, haus, na famili, tasol nau nogat. Nau em i hatwok long raun long ol rot bilong painim ol liklik samting bilong skin.

Sori tru, i gat planti milion manmeri long olgeta hap ol i stap rabis tru olsem Vicente. Long ol kantri i no gat planti wok mani, planti manmeri i mas slip long rot o long ol pipia haus long setelmen. Yumi inap lukim lain i save singaut long mani​—ol lek nogut, ol aipas, na ol meri i givim susu long pikinini. Long ol trafik lait ol pikinini i save ran i go namel long ol ka na traim long salim ol loli bilong kisim liklik toea.

I hatwok long kamapim as na ol man i stap rabis olsem. Nius The Economist bilong Inglan i tok: “Long nau i gat planti maniman, ol man i gat bikpela save tru long ol marasin samting, ol i wokim ol nupela nupela masin, na ol i gat bikpela save moa, inap long pinisim pasin bilong stap rabis.” Tru, planti lain i kisim gutpela helpim long ol dispela samting. Long ol biktaun bilong planti kantri i no gat planti mani samting, ol gutpela nupela ka i pulap long ol rot. Ol kain kain nupela masin samting i pulap long ol stua, na planti man i save baim ol dispela samting. Tupela bikpela stua long Brasil i mekim wanpela samting bilong kirapim ol man long baim ol samting. Long Disemba 23 i go inap 24, 2004, tupela stua i op inap nait olgeta. Wanpela stua i baim ol lain bilong danis bilong amamasim ol manmeri i kam baim ol samting. Dispela danis i pulim 500,000 manmeri i kam long stua!

Tasol planti man i no save kisim helpim long bikpela mani bilong ol maniman. Long nau i gat ol maniman na rabisman na ol i stap narapela narapela kain tru. Olsem na planti man i ting yumi mas kirap mekim sampela samting bilong pinisim pasin bilong i stap rabis. Nius Veja bilong Brasil i tok: “Long dispela yia [2005], nambawan bikpela samting ol gavman i mas toktok long en, em olsem wanem ol i ken pinisim pasin bilong i stap rabis.” Na nius i stori tu long wanpela program ol i kolim Marshall Plan bilong helpim ol kantri i stap rabis tru, na moa yet ol kantri long Afrika.b Tru, i luk olsem dispela wok bai kamapim gutpela samting, tasol nius hia i tok: “I gat as na yumi ken ting dispela wok i no inap kamap gutpela. Sapos planti kantri i no laik givim mani bilong helpim dispela wok, as bilong en i olsem: Planti taim mani ol i bungim bilong helpim ol rabisman, ol rabisman i no save kisim dispela helpim.” Sori tru, pasin korapsen na ol kain kain lo bilong gavman i mekim na bikpela hap mani ol gavman, ol intenesenel kampani, na wan wan man yet i bin givim i no save helpim ol man i sot.

Jisas i save dispela hevi bilong stap rabis em bai stap longtaim. Em i tok: “Oltaim ol rabisman bai i stap wantaim yupela.” (Matyu 26:11) Orait yu ting dispela i makim olsem long olgeta taim bihain bai i gat ol rabisman? I gat wanpela samting inap stretim dispela hevi? Ol Kristen i ken mekim wanem bilong helpim ol rabisman?

[Ol Futnot]