Mama i Karim Jisas​—Olsem Wanem Dispela i Kamapim Bel Isi

OL ENSEL i mekim tok profet taim ol i tokaut olsem “ol manmeri God i belgut long ol, ol i ken i stap bel isi,” tasol i no dispela tok profet tasol i toktok long taim mama i karim Jisas. Ol ensel i bin mekim dispela tokaut long ol wasman bilong sipsip, na tu, ol i bin givim sampela tokaut bilong God long ol samting bilong nupela pikinini Jisas long Maria wantaim man bilong em, Josep. Sapos yumi skelim ol dispela tokaut, dispela bai helpim yumi long kliagut long stori bilong taim Maria i bin karim Jisas na kisimgut as bilong dispela tok promis bilong ol ensel long bel isi bai stap namel long ol man.

Paslain long taim Maria i bin karim Jisas, na taim Maria i no gat bel yet, wanpela ensel em Baibel i kolim Gebriel i kam lukim Maria. Taim ensel i kamap long Maria, em i tok: “Gude, meri. Bikpela i stap wantaim yu, na em i bin blesim yu na mekim gut long yu.” Maria i harim dispela tok na em i kirap nogut, na ating em i pret liklik na i ting, dispela em i wanem kain tok?

Ensel Gebriel i toksave olsem: “Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” Maria i askim ensel long dispela samting bai i kamap olsem wanem, long wanem, em i no bin slip wantaim wanpela man. Gebriel i tokim em, holi spirit bilong God bai kam long em na bai em i gat bel na karim pikinini. Dispela pikinini i no olsem ol narapela pikinini.​—Luk 1:​28-35.

Tok Profet Long Wanpela King

Yumi ken ting, tok bilong Gebriel i bin helpim Maria long kisim save olsem, i gat planti tok profet bilong bipo yet i toktok long dispela pikinini em bai karim. Dispela tokaut olsem Jehova bai “putim em i stap king olsem tumbuna bilong en Devit” bai kirapim Maria​—na ol narapela Juda i save long ol tok bilong ol Rait Holi​—long tingim promis God i bin mekim long King Devit bilong Israel.

Long rot bilong profet Natan, Jehova i bin tokim Devit: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (2 Samuel 7:​4, 16) Jehova i bin tok long Devit olsem: “Oltaim wanpela man long lain bilong en bai i stap king. Na wanpela king bilong lain bilong en bai i bosim ol Israel oltaim, olsem skai antap i stap oltaim.” (Song 89:​20, 29, 35, 36) Olsem na i gat as na Maria i bin kamap long lain bilong Devit, na i wankain tu long Josep.

I no ol dispela tok profet tasol bilong Ol Skripsa Hibru i toktok long wanpela pikinini bilong Devit bai stap king. Yumi ken ting Maria i save tu long tok profet bilong Aisaia, i tok: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ Dispela king bai i stap senis bilong King Devit, na em bai i sindaun long sia king bilong Devit na bosim ol manmeri. Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim. Long wanem, dispela king em i king bilong mekim gutpela na stretpela pasin tasol, na dispela pasin bilong en bai i mekim em i stap strongpela king, nau na olgeta taim bihain. Bikpela I Gat Olgeta Strong . . . bai i mekim ol dispela samting i kamap.”​—Aisaia 9:​6, 7.

Olsem na dispela tokaut Gebriel i mekim long Maria i no bilong toksave tasol long wanpela nupela pikinini man bai kamap long rot bilong mirakel, nogat. Pikinini bilong em bai kisim wok king bilong King Devit, tumbuna bilong en​—em bai stap king oltaim oltaim long wanpela Kingdom God bai kamapim. Ol tok profet bilong Gebriel long wok king Jisas bai mekim bihain em i bikpela samting tru long yumi olgeta.

Taim Josep i kisim save olsem dispela meri em bai marit long en i gat bel, Josep i no laik maritim em. Em i save dispela pikinini i no bilong em, long wanem, em i no bin slip wantaim Maria. Yumi ken save, Josep bai hatwok long bilipim tok bilong Maria long olsem wanem em i bin kisim bel. Baibel i stori olsem: “Long driman wanpela ensel bilong Bikpela i kamap long em. Ensel i tok olsem, ‘Josep, yu man bilong lain bilong Devit, yu no ken pret long kisim Maria olsem meri bilong yu. Harim. Dispela pikinini i stap long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.’ ”​—Matyu 1:​20, 21.

Ating Josep i save long olsem wanem dispela pikinini bai “lusim sin bilong ol manmeri bilong en na kisim bek ol,” o em i no klia gut long en, em Baibel i no tok. Tasol tok bilong ensel inap helpim Josep long bilip olsem Maria i no bin mekim wanpela rong na em i gat bel. Josep i bihainim tok bilong ensel na em i kisim Maria i go long haus bilong em​—dispela i makim olsem tupela i marit.

Ol tok i stap long ol narapela hap bilong Baibel i helpim yumi long kisimgut tok bilong ensel. Long pastaim tru, wanpela ensel i bikhet na i sutim tok long wok king bilong Jehova. Ol Skripsa Hibru i soim olsem dispela bikhet ensel i tok pasin bilong God long bosim ol man i no stret, na i no gat wanpela man bai stap gut long Jehova sapos traim i painim em. (Stat 3:​2-5; Jop 1:​6-12) Adam em wanpela man i no bin stap gut long God. Sin bilong em i mekim na olgeta manmeri i kisim sin long em, na dispela sin i kamapim dai. (Rom 5:12; 6:23) Tasol taim Maria i karim Jisas, Jisas i no gat sin, long wanem, wanpela man bilong graun i no bin kamapim em. Jisas i orait long lusim nambawan gutpela laip bilong em olsem pe bilong baim bek ol man. Dispela laip bilong em i wankain olsem laip Adam i bin lusim, olsem na em inap kisim bek ol man long sin bilong ol na givim rot long ol long kisim laip i stap oltaim oltaim.​—1 Timoti 2:​3-6; Taitus 3:​6, 7; 1 Jon 2:25.

Taim Jisas i mekim wok bilong em long graun, em i soim yumi long ol samting bai kamap taim em i pinisim olgeta samting nogut em sin i bin kamapim. Em i bin rausim olgeta kain sik long skin bilong ol man na em i kirapim bek sampela man i dai pinis. (Matyu 4:23; Jon 11:​1-44) Ol dispela mirakel i olsem piksa bilong ol samting em bai mekim long bihain. Jisas yet i tok: “Taim i laik kamap na olgeta manmeri i stap long matmat ol bai i harim maus bilong [mi], na ol bai i lusim matmat na i kam ausait.”​—Jon 5:​28, 29.

Dispela tok promis long kirap bek bai kamap bihain i soim yumi bilong wanem i bikpela samting tru long yumi ol man long Jisas i bin kamap olsem pikinini long graun na em i dai.  Jon 3:17 i tok, God i salim Pikinini bilong em i kam long graun “bilong kisim bek” ol man. Dispela gutpela tok i kirapim yumi long tingim gen dispela tokaut ol ensel i bin givim long ol wasman bilong sipsip long nait mama i karim Jisas.

‘Gutnius Bilong Amamas Tru’

Tru tumas, taim ol ensel i tokaut long Maria i karim wanpela pikinini, em “man God i bin makim bilong kisim bek ol manmeri bilong en,” em Krais, Bikpela bilong yumi, dispela “em nius bilong mekim olgeta manmeri i amamas tru.” (Luk 2:​10, 11) Dispela pikinini bai kamap Mesaia, em bikpela Profet na King ol manmeri bilong God i bin wet longtaim tru long en. (Lo 18:18; Maika 5:2) I stap na indai bilong em long graun bai i gat bikpela wok long kamapim long ples klia olsem i stret Jehova i stap nambawan bos bilong heven na graun, olsem na ol ensel inap tok: “Litimapim nem bilong God i save stap antap tru.”​—Luk 2:14.

Jisas, em Baibel i kolim olsem “Adam i kamap bihain tru,” em i soim olsem ol man bilong graun ol inap tru long i stap gut long God, maski bikpela traim moa yet i painim ol. (1 Korin 15:45) Olsem na Jisas i kamapim long ples klia olsem Satan em i man nogut bilong giaman. Dispela i as na ol gutpela ensel long heven ol i amamas.

Tasol nau yumi ken tingim gen dispela askim: “Dispela tokaut bilong ensel long nait mama i bin karim Jisas, yumi ken bilip olsem bihain em bai kamap tru?” Yumi ken tok yes, em bai kamap tru! Bel isi em i wanpela bikpela samting insait long ol wok God i tingting pinis long mekim long graun, na wanpela bilong ol dispela wok em bilong mekim graun i kamap gutpela gen olsem paradais. Taim dispela samting i kamap long olgeta hap bilong graun, pasin bilong laikim tru ol narapela na i stap gut long God em bai stap long bel bilong olgeta manmeri na stiaim ol samting ol bai mekim. Olsem na bilong Jehova i ken kamapim tru ol dispela samting em i tingting pinis long mekim, em i mas rausim olgeta pasin bikhet bilong sakim wok king bilong em. Dispela i no wanpela gutpela nius long yau bilong ol man i wanbel long tok bilong Satan olsem ol lo bilong Jehova i save nogutim ol man. Em i makim olsem ol bai bagarap na pinis olgeta.​—Song 37:11; Sindaun 2:​21, 22.

Plis tingim dispela: Ol ensel i no tokim ol wasman bilong sipsip olsem olgeta man bai stap bel isi, olsem sampela Baibel i tok. Ol ensel i tokaut olsem, “long graun ol manmeri God i belgut long ol, ol i ken i stap bel isi.” Yumi ken tok, em ol manmeri God i orait long ol na em i belgut long ol. Ol man i tokaut long ol i bilip long Jehova, ol i save kamap disaipel bilong Jisas na bihainim pasin bilong em. Ol kain man na meri olsem ol i amamas long givim ol samting na mekim gut long ol narapela man long olgeta de, na i no long sampela de tasol bilong yia.

Gutpela Pasin Kristen Long Olgeta De Bilong Yia?

Strong bilong gutnius Jisas i bin autim i wok strong insait long bel bilong planti manmeri. Planti i bin kirap na kisim ol lo Kristen na bihainim ol stiatok bilong en long olgeta samting ol i mekim long i stap bilong ol. Sampela man em pastaim ol i save tingim ol yet tasol, ol i kirap askim olsem Jisas bai mekim wanem sapos wankain samting i painim em. Sampela ol i bin tingting tasol long painim mani kago na ol amamas bilong skin, tasol nau ol i luksave olsem ol i mas tingim ol samting bilong lotu, olsem ol samting God i laikim, na tokim ol narapela man long en. Ol manmeri i wok strong long mekim olsem, ol i save givim ol samting long ol narapela na mekim gutpela pasin long ol long olgeta de bilong yia. Na i stret ol Kristen tru i mas mekim olsem, a?

Sapos olgeta man i gat gutpela bel ol i tingting long mining bilong dispela tok bilong ol ensel long bel isi, na ol i mekim ol samting i stret wantaim dispela tok, bai i no gat ol pasin nogut na hevi long graun olsem nau yumi lukim.

Ol manmeri God i belgut long ol, ol i tingim ol dispela tok profet long mama i karim Jisas na ol samting i kamap long dispela taim, na ol i bilip tru olsem ol inap i stap bel isi tru i go inap oltaim oltaim. Ating yu tu i laik kisim dispela bel isi, a? Yumi ken save tru olsem dispela gutpela tok profet ol ensel i tokaut long en long taim mama i karim Jisas, ol bai kamap tru. Em i no wanpela tok nating bilong taim bilong Krismas, nogat. Bel isi bai kamap tru tru na i stap oltaim oltaim.

[Ol Piksa long pes 7]

Yumi ken mekim gutpela pasin Kristen long olgeta de bilong yia, na yumi mas mekim olsem