Painim Ol Gutpela Bekim
Olsem wanem mi inap lukautim helt bilong mi?
Mi inap mekim wanem bambai famili bilong mi i ken vbvhhnmkstap amamas?
Mi inap mekim wanem bambai mi ken holim yet wok mani bilong mi?
YU MEKIM pinis wanpela bilong ol dispela askim? Yu painim pinis ol gutpela bekim em ol i bin helpim yu? Long olgeta yia, ol i wokim olsem 2,000 buk i givim bekim long ol dispela na sampela narapela bikpela askim. Long Inglan, ol man i tromoi 80 milion paun (olsem 410 milion kina) long wanpela yia long ol buk i save givim ol tok bilong helpim ol man long karim ol hevi bilong laip. Long Amerika, ol i salim planti buk bilong helpim ol man, long olgeta yia ol i kisim 600 milion dola long en. I no yu wanpela tasol i wok long painim ol gutpela tok bilong helpim yu long karim ol hevi bilong ol wan wan de.
Long ol tok i stap long ol dispela planti buk, wanpela man bilong raitim ol buk i tok: “Planti nupela buk i kamapim tasol ol tok em ol i bin raitim pinis long bipo.” Tru tumas, planti tok bilong ol dispela buk i kamapim savetingting i stap long wanpela olpela buk tru. Dispela buk ol i bin tilim long planti hap bilong graun, winim ol narapela buk. Ol i bin tanim dispela buk olgeta o sampela hap bilong en i go long 2,400 samting tok ples. Long olgeta hap bilong graun, ol i bin prinim olsem 4.6 bilion bilong dispela buk. Buk hia em Baibel.
Baibel i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:16) Tru, ol i no bin raitim Baibel bilong helpim ol man na em tasol, nogat. Nambawan as na ol i raitim Baibel em bilong kamapim laik bilong God long ol man. Tasol maski i olsem, Baibel i gat planti tok bilong helpim ol man long karim ol hevi, na em i tok promis olsem ol man i bihainim ol tok bilong en bai kisim ol gutpela samting bilong helpim ol. (Aisaia 48:17, 18) Sapos ol man i bihainim ol tok bilong en, dispela bai helpim ol tru, maski ol i bilong wanem lain, ples, o ol i bin kisim wanem skul. Em i gutpela sapos yu skelim stori i kamap bihain long dispela na yu yet i ken kisim save olsem ol tok Baibel i mekim long helt, famili, na wok mani, em i gutpela bilong helpim yumi o nogat.