Ol Man i Wok Long Painim Ol Tok Bilong Helpim Ol
SAPOS yu wok long painim ol tok bilong helpim yu, i gat planti tru i stap. Long nau i gat planti bisnis moa bilong wokim ol buk na vidio samting i stori long rot bilong helpim yu yet. Long Briten, Latin Amerika, Japan, na Yunaitet Stets, planti man i save baim ol kain buk olsem. Planti man moa i laikim ol vidio, skul, na TV program i stori long rot bilong helpim yu yet. Ol i laikim, long wanem, ol i ting ol yet inap stretim ol hevi bilong ol, na no gat wok long lukim dokta bilong stretim tingting, o ol lain bilong helpim ol marit i gat hevi, o pris samting. Ol dispela buk na vidio samting i save toktok long wanem ol samting?
Ol i toktok long ol samting em planti manmeri i laik kisim save long en, olsem rot bilong inapim laik bilong ol yet, rot bilong painim poroman marit, na rot bilong mekim bikpela long ol pikinini. Na ol i toktok tu long pasin bilong karim hevi bilong sik bilong bel hevi, krai sori long wanpela i dai, na long ol hevi i save kamap taim ol marit i katim marit. Na planti man i laik kisim tok long rot bilong lusim pasin bilong kaikai planti, smok, na dring planti. Yu ting ol dispela tok inap helpim man? Sampela inap, tasol planti nogat. Olsem na i gutpela yumi tingim tok lukaut bilong Baibel, olsem: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”—Sindaun 14:15.
Ol buk bilong helpim ol man i narapela kain long ol buk i skulim man long mekim sampela wok, olsem kisim ol piksa, lukautim ol akaun, o lainim tok ples. Ol kain buk olsem inap skulim gut man na i no gat bikpela pe olsem ol kos bilong lainim ol dispela wok. Tasol ol buk bilong soim rot long man bilong helpim em yet—maski ol i toktok long wok bisnis, marit, wok papamama, o lukautim gut tingting—ol i narapela kain. Ol i save tokim ol man long bihainim sampela pasin o wanpela kain tingting. Olsem na i gutpela long askim yu yet: Husat i givim ol dispela tok? Em i kisim we ol dispela tok?
Sampela taim ol man husat i raitim ol dispela buk ol i no kisim tingting long ol samting ol i bin skelim gut. Sampela i raitim ol kain buk em planti man bai baim, ol i save ol bai kisim bikpela mani long ol buk i stori long ol samting ol man i gat laik long harim. Long wanpela kantri, dispela kain bisnis i save kisim 8 bilion dola long olgeta yia!
Ol i Save Helpim Tru Ol Man?
Taim yu ritim ol buk samting bilong soim rot bilong helpim yu yet, yu tingting olsem yu bai painim ol gutpela tok i helpim yu. Tasol sampela tok olsem i no gat as bilong en na i no wok gut. Planti taim ol i gat tok olsem: ‘Sapos yu tingting stret, bai yu inap stretim hevi. Wanem samting yu laikim, olsem mani, gutpela helt, o pas gut wantaim poroman, yu inap kisim sapos yu tingting olsem gutpela samting bai kamap.’ Tasol yu ting dispela kain tok inap helpim yu tru? Em bai helpim yu long karim ol hevi i save kamap long laip bilong yu?
Yumi ken tingim ol buk em planti manmeri i save laikim, em ol i stori long pasin pren na marit. Yu ting ol i helpim ol man long kamapim ol famili i stap amamas na i pas gut wantaim? Sampela taim nogat. Wanpela savemeri i toktok long ol buk i stori long pasin laikim namel long man na meri, na ol lain long Latin Amerika i laikim tru, na ol dispela buk “i tokim ol man long rot bilong stap amamas wantaim poroman na kisim pasin bilong amamas long yu yet.” Man i raitim ol dispela buk i tok, sapos yu no pas gut wantaim poroman na yupela i stap yet wantaim, yu mekim nogut long yu yet. Buk i laik givim tingting olsem, nambawan bikpela samting em bilong mekim ol samting na bai bel bilong yu yet i gutpela, na buk i no helpim ol man long luksave long as bilong hevi na painim rot bilong stretim.
Tru, sampela buk olsem ol i gat sampela gutpela tok bilong helpim man. Tasol sampela tok bilong ol inap nogutim yumi. Ating tok wanpela buk i mekim long wanpela samting i gutpela bilong helpim man, tasol tok em i mekim long narapela samting inap mekim hevi i go bikpela moa. Yumi no inap tru long skelim gut planti kain kain tingting i stap long ol dispela buk, em narapela i pait wantaim narapela. Yu inap bilip long tok bilong husat? Askim yu yet: ‘Ol i bin skelim gut ol tok ol i givim bilong soim rot long man, o em i tingting bilong man bilong raitim buk tasol? Ating man bilong raitim buk i strong long kisim bikpela mani o biknem na em i kamapim ol dispela tok?’
Wanpela buk bilong soim rot i bin helpim ol man inap longpela taim tru, em Baibel. Em i toktok long planti samting ol dispela narapela buk i toktok long en na long planti narapela tok tu bilong helpim ol man. Em i bin kirapim planti bilion man long bihainim skultok olsem: “Tingting bilong yupela i mas kamap nupela. . . . Kamap ol nupela manmeri.” (Efesus 4:23, 24) Baibel i helpim yumi long save long as na ol hevi i painim yumi na i skulim yumi long rot bilong stretim. Bikpela samting moa, em i kamapim klia as tru na yumi mas mekim ol samting i stret. Stori i kamap bihain long dispela bai toktok long dispela samting.