Bilong Wanem God i Larim Pasin Nogut i Stap?

MASKI yumi lukluk we, yumi lukim planti pasin nogut na pen i stap. Ol woa i save bagarapim ol lain bilong ples na ol soldia. Pasin raskol na bagarapim man i save kamap long olgeta taim. Ating yu yet yu bin kisim nogut long ol man i save bel nogut long narapela lain o long sampela pasin moa i no stret. Olsem na ating yu bin askim olsem, ‘Bilong wanem God i larim pasin nogut i stap?’

Em i no nupela askim. Inap 3,600 yia i go pinis, gutpela wokman bilong God, em Jop, i bin askim olsem: “Bilong wanem God i save larim ol man bilong mekim pasin nogut na ol i stap gut na kamap lapun?” (Jop 21:7) Profet Jeremaiai bin stap olsem 600 yia paslain long Krais, em i bel hevi long pasin nogut bilong ol wanples, na em i askim olsem: “Bilong wanem ol man bilong mekim pasin nogut, ol i save stap gut oltaim? Bilong wanem wok bilong ol man bilong trik na giaman, i save go het gut?” (Jeremaia 12:1) Jop na Jeremaia i save pinis olsem God i gat stretpela pasin. Tasol ol i tingting, bilong wanem i gat planti pasin nogut i stap? Ating yu tu yu tingting planti long dispela samting, a?

Sampela i tok, em asua bilong God na i gat ol pasin nogut na pen na hevi i stap. Na sampela i tingting: ‘Sapos God i gat olgeta strong, na stretpela pasin, na laikim tru ol man, bilong wanem em i no pinisim ol pasin nogut na hevi? Bilong wanem em i larim pasin nogut i stap inap long nau?’ Stori i kamap bihain long dispela i bekim ol dispela askim na sampela bikpela askim moa.

[Piksa Kredit Lain long pes 3]

AP Photo/Adam Butler