Yu Ting Yu Mas Tingim Ol Samting Bilong Nau Tasol?

“MI NO save tingting long bihain. Em i save kamap hariap tru.” Wanpela saientis i gat nem, em Albert Einstein, i bin tok olsem. Planti man i save mekim wankain tok. Ating ol i tok: “Yumi no ken wari long ol samting bilong bihain.” O ating yu harim sampela i mekim kain tok olsem: “Mekim ol wok bilong yu long olgeta de na em tasol.” “Tingim ol samting bilong dispela de tasol.” “No ken tingim ol samting bilong tumora.”

Dispela kain tingting em i no nupela samting, nogat. Lain Epikurian bilong bipo i save tok: “Yu mas kaikai na dring na kisim amamas. Ol narapela samting i no bikpela samting.” Sampela man i stap long taim bilong aposel Pol ol tu i gat wankain tingting. Ol i tok: “Yumi kaikai na dring, long wanem, tumora bai yumi dai.” (1 Korin 15:32) Ol i bilip olsem yumi gat sotpela taim bilong i stap laip na em tasol, olsem na ol i kamapim tingting olsem yumi mas mekim olgeta samting yumi laik mekim nau long dispela taim yumi stap laip.

Tasol i gat narapela as na planti milion manmeri i tingim i stap bilong ol long nau tasol, na i no olsem ol i wok long painim ol amamas samting. Ol i stap rabis tru na ol i gat bikpela hatwok moa long painim liklik kaikai samting bilong ol wan wan de bilong helpim ol long i stap laip. Ol i no laik tingim ol samting bilong bihain, long wanem, “tumora” bai i gat ol bikpela hevi bilong en na i no gat gutpela samting ol inap wetim i kamap.

Yu Ting Yumi Mas Tingim Ol Samting Yumi Laik Mekim Bihain?

Sampela lain i gat gutpela sindaun liklik ol tu i ting i no gat as na ol i mas tingim ol samting bilong bihain. Ol i tok, ‘Bilong wanem bai mi tingim?’ Sampela i tok, ol man i save tingim ol samting ol bai mekim long bihain, sampela taim ol i kisim bikpela bel hevi na hatwok bilong ol i lus nating. Wanpela man bilong bipo yet, em Jop, em i bel hevi stret taim em i lukim olsem olgeta samting em i bin tingting long mekim, em i no inap mekim, em ol dispela samting inap mekim em na famili bilong em i stap amamas long bihain.​—Jop 17:11; Saveman 9:11.

Robert Burns, em wanpela man bilong Skotlan i save raitim ol stori, em i tok olsem i stap bilong yumi i wankain olsem bilong wanpela liklik rat em Burns i bin bagarapim haus bilong en taim em i brukim graun bilong wokim gaden. Tarangu, liklik rat i ranawe taim haus bilong em i bagarap na ol samting long laip bilong en i senis. Burns i tingting olsem, ‘planti taim ol bikpela hevi na taim nogut i painim yumi na yumi no inap mekim wanpela samting bilong pasim, olsem na maski yumi tingting gut na mekim ol samting bilong helpim yumi bihain, planti taim ol dispela hatwok i save lus nating tasol.’

Olsem na yu ting yumi no gat wok long tingim ol samting yumi laik mekim long bihain? Sapos yumi no mekim olsem na taim i gat bikpela saiklon o guria samting i kamap, samting nogut inap painim yumi. Olsem: No gat wanpela man i bin pasim Saiklon Katrina. Tasol sapos pastaim ol i bin tingim gut ol samting ol bai mekim sapos wanpela bagarap i kamap, ating Saiklon Katrina i no inap bagarapim ol tumas long dispela taun na ol lain i sindaun long en, laka?

Orait yu ting wanem? Yu ting em i savepasin long tingim ol samting bilong nau tasol na yu no tingting long bihain? Skelim stori i kamap bihain long dispela, em i toktok long dispela samting.

[Ol Piksa long pes 3]

“Yu mas kaikai na dring na kisim amamas. Ol narapela samting i no bikpela samting”

[Piksa long pes 4]

Sapos ol i bin tingim gut ol samting ol bai mekim ating Saiklon Katrina i no inap bagarapim ol tumas, laka?

[Kredit Lain]

U.S. Coast Guard Digital