Askim

I stret wanpela Witnes Bilong Jehova i go long weding bilong wanpela wanblut o pren i no Witnes?

Ol weding em taim bilong amamas, olsem na ol Kristen i save go long dispela bung. Ol pikinini em ol i singautim ol long i go long weding, ol i mas kisim tok orait long papamama bilong ol o ol man i gat wok long lukautim ol, em ol i gat rait long tok ol pikinini i ken i go long weding o nogat. (Efesus 6:​1-3) Tasol olsem wanem sapos wanpela man em i no wanpela Witnes Bilong Jehova em i askim meri Kristen bilong em long i go wantaim em long wanpela weding i kamap long haus lotu? Ating maus bilong bel bilong meri bai i orait long em long i go lukluk tasol na em i tingting strong olsem em i no ken insait liklik long ol pasin bilong lotu long dispela bung.

Em samting bilong wan wan yet long skelim olsem em bai go long wanpela weding o nogat. Tasol wan wan Kristen i mas save olsem Jehova bai skelim pasin bilong em, olsem na em i mas skelim sampela stiatok bilong Baibel taim em i wokim disisen long i go long weding bilong wanpela em i no Witnes.

Nambawan bikpela samting long tingting bilong Kristen, em i laik mekim ol samting em God i orait long en. Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” (Jon 4:24) Olsem na ol Witnes Bilong Jehova i no save bung wantaim ol narapela lotu long mekim ol samting bilong lotu, olsem insait long ol pasin bilong lotu na beten samting, em ol i no stret wantaim tok i tru bilong Baibel.​—2 Korin 6:​14-​17.

Kristen i save olsem disisen em i mekim inap mekim sampela samting tu long ol narapela. Sapos yu tingting long i go long weding, bai ol wanblut o pren bilong yu i bel hevi sapos yu no insait long sampela samting bilong weding? Yu mas tingim tu ol samting dispela inap mekim long ol wanbilip bilong yu. (Rom 14:13) Maski yu yet o ol narapela long famili bilong yu i ting olsem i orait long i go long weding bilong wanpela i no Witnes, dispela bai mekim wanem long ol bratasista Kristen? Yu ting dispela inap bagarapim maus bilong bel bilong sampela?

Long ol bung bilong marit bilong ol wanblut em ol i no Witnes, hevi inap kamap. Olsem wanem sapos ol i askim yu long sanap wantaim tupela i laik marit? O olsem wanem sapos poroman marit bilong yu i no Witnes i laik insait long olgeta wok bilong marit? Sapos tupela i stretim marit long gavman long ai bilong wanpela jas o wanpela wokman bilong gavman, na sapos yu go long dispela bung, i olsem yu lukluk tasol long samting tupela i mekim bilong inapim lo bilong gavman na em tasol.

Tasol sapos marit i kamap long wanpela haus lotu o wanpela pris o pasto i mekim marit, orait i gat sampela samting yu mas tingim. Bilong yu ken bihainim maus bilong bel bilong yu em Baibel i skulim pinis na abrusim pasin i no stret wantaim ol bilip bilong yu o mekim sampela samting inap givim sem long man na meri i marit, ating i gutpela yu no ken go. (Sindaun 22:3) Sapos pastaim yu stori gut long famili bilong yu long bilip bilong yu em Baibel i as bilong en, na tokim ol long ol samting yu inap insait long en o tokim ol olsem yu no inap i go, dispela inap mekim na yu na famili bilong yu i no bel hevi.

Taim ol i skelim gut pinis olgeta dispela samting, ating sampela Kristen bai ting olsem i no gat rong long i go long weding bilong wanpela i no Witnes na lukim, tasol em i no insait long ol pasin bilong lotu. Tasol sapos Kristen i ting olsem sampela traim inap painim em long dispela weding na em bai brukim sampela stiatok bilong Baibel, ating i gutpela moa em i no ken go maski i gat sampela gutpela samting inap kamap. Sapos em i wokim tingting pinis long em i no inap go long tok bilong marit, tasol em i tingting long i go long kaikai bilong marit, orait em i mas tingting long mekim “olgeta samting bilong givim biknem long God.” (1 Korin 10:31) Long mekim ol kain disisen olsem, “olgeta man wan wan bai i karim hevi bilong pasin ol yet i mekim.” (Galesia 6:5) Olsem na wanem samting yu tingting long mekim, tingim olsem em i bikpela samting long bel bilong yu i mas i stap klin long ai bilong God Jehova.