Baibel i Save Senisim i Stap Bilong Ol Man

Wanem samting inap kirapim wanpela man i bin insait long wanpela lain raskol long Meksiko ol i kolim Ol Junia Satan, long senis na kamap man bilong mekim stretpela pasin na wok strong? Bilong wanem wanpela bisnismeri Japan i gat planti mani i lusim pasin bilong kisim planti mani kago? Na em i pilim olsem wanem long ol dispela senis em i mekim? Wanem samting i kirapim wanpela man Rasia long lusim wok bilong salim ol gan samting​—em wok em i save mekim long pasin hait na kisim bikpela mani long en? Skelim tok ol wan wan i mekim.

DISPELA MAN

NEM: ADRIAN PEREZ

KRISMAS: 30

KANTRI: MEKSIKO

BIPO: INSAIT LONG LAIN RASKOL

LAIP BILONG MI LONG BIPO: Taim mi gat 13 krismas, famili bilong mi i go sindaun long Ecatepec de Morelos, long Meksiko. Long dispela taim planti yangpela long dispela hap i save mekim pasin raskol, bagarapim ol samting, na kisim drak. I no longtaim na mi kisim pasin bilong dring planti alkohol, bagarapim ol samting, na mekim pasin pamuk.

Bihain, mipela i go bek long San Vicente, em taun mama i bin karim mi long en. Tasol pasin bilong kisim drak i go bikpela tru long dispela hap. Planti taim mipela i lukim bodi bilong ol yangpela i dai pinis i stap long rot. Mi joinim wanpela lain raskol ol i kolim Ol Junia Satan. Mipela i stilim ol samting na kisim drak, pulim strong win bilong ol marasin olsem glu samting. Planti taim mi no inap tingim olsem wanem mi go bek long haus, na sampela taim mi hap indai na slip long rot. Sampela pren bilong mi i stap long kalabus, long wanem, ol i bin stil na kilim man i dai.

Maski mi mekim ol dispela pasin nogut tru, mi bilip long God. Bilong maus bilong bel bilong mi i no ken kotim mi tumas, mi save insait long ol bikpela bung bilong lotu olsem Wik Holi we ol i save prea long ol kruse. Tasol bihain long en, mipela olgeta wantaim dispela man i olsem Krais insait long drama​—mipela i amamas long mipela i insait long dispela bung na mipela i dring spak.

BAIBEL I SENISIM I STAP BILONG MI: Taim mi gat 18 krismas samting, mi kirap stadi long Baibel wantaim ol Witnes Bilong Jehova. Mi luksave olsem laip bilong mi i no gat as tru bilong en na sapos mi insait yet long ol pasin nogut mi save mekim, i no gat wanpela gutpela samting inap painim mi. Samting mi pilim tru em tok i stap long Galesia 6:8: “Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.” Dispela skripsa i helpim mi long luksave olsem sapos mi laik bai ol gutpela samting i painim mi bihain, mi mas mekim ol samting bilong helpim mi long stap gut long bihain.

Taim mi wok long stadi long Baibel, mi amamas long save olsem Jehova em God i gat laip, na em i tingim mi na em i redi long lusim ol sin mi bin mekim bipo. Samting i bin painim mi i helpim mi long kisim save olsem Jehova i save harim na bekim ol beten.

Em i no isi long senisim pasin bilong mi. Em i hatwok tru long mi lusim dispela lain raskol. Ol i tambuim mi long go long sampela ples, maski mi no insait moa long dispela lain raskol. Sampela taim mi mas hait long ol pren bilong mi long bipo, long wanem, ol i save painim mi bilong pulim mi i go bek long olpela pasin bilong mi.

Tasol taim mi go long miting wantaim ol Witnes Bilong Jehova long Haus Kingdom, mi pilim olsem ol bratasista long kongrigesen i gat gutpela pasin na pasin laikim. Mi pilim tru pasin bilong ol long bilip strong na pasin bilong ol long bihainim ol samting ol i skulim ol man long en. Pasin bilong ol i narapela kain olgeta long ol pasin mi save long en bipo.

GUTPELA SAMTING I PAINIM MI: Inap tenpela yia nau mi stap olsem wanpela Witnes Bilong Jehova i baptais pinis. Mi wok strong long bihainim ol tok bilong Baibel long i stap bilong mi. Long dispela as, famili bilong mi i save rispek long mi. Nau ol i save mi wanpela man bilong wok strong tru, na mi bin helpim ol long ol samting bilong mani. Mama bilong mi i kirap stadi long Baibel na nau em i kamap wanpela Witnes Bilong Jehova. Papa bilong mi tu i wok long mekim sampela senis long pasin bilong em. Planti long famili bilong mi ol i no Witnes Bilong Jehova, tasol taim ol i lukim ol senis i kamap long mi, ol i tok Baibel inap helpim man long mekim i stap bilong em i kamap gutpela.

DISPELA MERI

NEM: YAYOI NAGATANI

KRISMAS: 50

KANTRI: JAPAN

BIPO: BISNISMERI I GAT PLANTI MANI

LAIP BILONG MI LONG BIPO: Mi kamap bikpela long wanpela liklik taun we ol manmeri i save mekim gutpela pasin pren. Papa bilong mi i gat wanpela bikpela stua long taun na i gat tenpela wokman i save wok long en. Haus bilong mipela i stap klostu long stua, olsem na maski Papa na Mama i bisi, mi no save pilim olsem mi stap wanpis.

Mi bikpela long tupela susa bilong mi, na taim mi liklik yet papamama i lainim mi long pasin bilong ronim bisnis bilong famili. Mi marit taim mi yangpela. Man bilong mi i lusim wok bilong em long beng na helpim mipela long ronim bisnis bilong famili. Mipela i kamapim tripela pikinini insait long sotpela haptaim. Mi wok long stua kirap long moningtaim i go inap long nait, na mama bilong mi i mekim wok bilong haus na lukautim ol pikinini. Maski i olsem, mipela i gat taim bilong mekim ol samting wantaim olsem famili.

Hevi bilong mani i mekim na ol bisinis i no ron gut, na bisnis bilong mipela tu i no ron gut tumas. Bilong winim hevi bilong dispela samting, mipela i pasim tok long opim wanpela stua bilong salim ol samting bilong stretim haus klostu long wanpela bikpela haiwe. De paslain long de bilong mekim bung bilong kirapim wok bilong sanapim stua, papa bilong mi, em presiden bilong kampani bilong mipela, wantu em i kisim sik long kru na i pundaun. Em i no inap toktok gut moa, olsem na mi kisim wok bilong ronim na lukautim stua. Man bilong mi i lukautim olpela stua. Nau mipela i bisi tru.

Ol samting long nupela stua bilong mipela i kamap gut tru. Mi amamas tru long ol gutpela samting i kamap long wok bilong mi na mi save wok planti na slip sampela aua tasol. Maski mi laikim tru ol pikinini bilong mi, olgeta taim mi save tingim wok tasol. Mi no gat taim bilong toktok wantaim man bilong mi, na taim mipela i toktok, planti taim mipela i tok pait tasol. Bilong daunim presa, klostu olgeta nait mi save go aut na dring wantaim ol pren na ol lain mi mekim wok bisnis wantaim ol. Mi save wok, dring, na slip, mi no save mekim narapela samting. Mi gat planti mani samting, tasol mi no amamas liklik na mi no save i gat wanem as na mi pilim olsem.

BAIBEL I SENISIM I STAP BILONG MI: Taim mi kirap stadi long Baibel wantaim ol Witnes Bilong Jehova, i gat tripela ves bilong Baibel i mekim bikpela samting long mi. Mi aiwara taim mi kisim save long insait bilong tok bilong Matyu 5:3: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.” Dispela ves i kamapim klia as na mi no amamas maski mi gat planti mani na ol lain mi mekim wok bisnis wantaim, ol i amamas long wok bilong mi. Mi luksave olsem, long rot bilong tingim na inapim laik bilong mi long lotuim God, dispela tasol inap mekim mi i stap amamas tru.

Long dispela taim, bikpela hevi bilong mani i kamap long Japan, na mi lukim samting i painim ol lain mi wok bisnis wantaim ol, i truim tok bilong 1 Timoti 6:9: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” Mi pilim olsem tok bilong Jisas i stap long Matyu 6:​24, i stret long mi, em i tok yu “no inap i stap aninit long God na long mani wantaim,” olsem na mi tingting long mekim sampela senis long i stap bilong mi.

Mi luksave olsem mi no bin tingim tumas papamama bilong mi, man bilong mi, na ol pikinini bilong mi. Na i klia tru olsem mi bin kisim sampela pasin i no gutpela tumas. Mi gat pasin antap na mi save les kwik long ol man. Na mi save belhat kwik. Pastaim mi ting mi bai no inap long senis na kamap wanpela Kristen. Tasol mi laikim tru ol pikinini bilong mi na mi luksave olsem taim mi bihainim tok bilong Baibel long ol samting mi mekim wantaim famili, ol pikinini bilong mi i pilim tru dispela samting. Mi lusim sampela hap taim moa bilong stap wantaim ol na mi bringim ol wantaim mi long ol miting Kristen.

GUTPELA SAMTING I PAINIM MI: Mi kisim save long as bilong laip, mi inap mekim wok bilong God, na bihainim pasin God i laikim, na dispela i mekim mi i stap amamas na belgut tru. Nau mi tingim famili i bikpela samting moa winim wok, olsem na mi amamas gen long mi yet.

Taim mama bilong mi i lukim olsem pasin bilong mi i senis na i kamap gutpela taim mi bihainim ol stiatok bilong Baibel, dispela i kirapim em long stadi long Baibel na kamap wanpela Kristen. Mi amamas tru olsem papa bilong mi na man bilong mi i no birua long mipela long disisen mipela i mekim. Mi na ol pikinini bilong mi i pas gut wantaim, na nau famili bilong mi i stap amamas tru.

DISPELA MAN

NEM: MIKHAIL ZUYEV

KRISMAS: 51

KANTRI: RASIA

BIPO: SALIM OL GAN SAMTING LONG PASIN HAIT

LAIP BILONG MI LONG BIPO: Planti diwai samting i stap long Krasnogorsk em taun mi go bikpela long en. Wara Moscow i ran i go long hap saut. Long hap wes na hap not, i gat planti diwai samting i pulap long ol ples i gat ol haus long en.

Taim mi yangpela, mi save laikim pasin bilong pait long han na pasin bilong traim long yusim ol gan samting. Mi lusim bikpela hap taim long mekim ol eksasais bilong strongim skin. Long pasin hait mi wokim ol naip na gan na katres samting. Bihain, dispela i kamap olsem wok bisnis bilong mi. Wok bilong mi i kamap gutpela tru na ol samting mi wokim mi salim long ol raskol na kisim planti mani long en.

BAIBEL I SENISIM I STAP BILONG MI: Long 1991 samting, mi bungim ol Witnes Bilong Jehova, tasol pastaim mi no bilipim ol. Mi ting ol i save kamapim planti askim tumas.

Wanpela taim, wanpela Witnes i ritim tok bilong Rom 14:12 long mi, olsem: “Yumi olgeta wan wan bai yumi mas tokim God long as bilong olgeta pasin yumi bin mekim.” Mi tingting long mi bai tok wanem long God. Dispela skripsa i kirapim mi long lain long ol samting God i laik mi mas mekim.

Mi wok strong long bihainim tok bilong Baibel i stap long Kolosi 3:​5-​10: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god. God i redim pinis pe nogut bilong givim long olgeta man i save mekim ol dispela kain pasin, em ol man i save sakim tok bilong en. . . . Yupela i mas rausim olgeta kain pasin nogut, em pasin bilong kros na belhat na bel nogut, na pasin bilong tok nogut long ol arapela na pasin bilong mekim toktok i doti. Yupela wan wan i no ken giamanim ol arapela Kristen, long wanem, yupela i rausim pinis olgeta pasin bilong olpela bel, na yupela i kamap nupela man pinis.”

Mi pilim hatwok tru long mekim ol dispela senis. Ol raskol man em bipo ol i save baim gan long mi, ol i strong long givim mi mani bilong kisim ol gan samting long mi, na mi hatwok long bosim mi yet taim ol man i toknogutim mi. Tasol maski i olsem, mi bagarapim ol gan samting em mi bin bungim em ol i gat bikpela pe tru long en. Taim mi kisim save long pasin laikim em God na Krais i soim long mi, dispela i kirapim mi long laikim tupela. Mi mekim stadi bilong mi yet long Baibel, go long ol miting bilong kongrigesen, na beten long God i mas helpim mi.

GUTPELA SAMTING I PAINIM MI: Isi isi, mi wok strong na ol bratasista Kristen i helpim mi, na pasin bilong mi i kamap gutpela. Mi amamas tru long save olsem Jehova i save tingim yumi wan wan na em i save tingim tu ol man i dai pinis. (Aposel 24:15) Mi amamas long gutpela pasin pren na stretpela pasin mi lukim namel long ol Witnes Bilong Jehova. Na mi tenkyu tru long ol i tingim mi na mi laikim pasin bilong ol long stap gut long God.

Pastaim sampela long famili na ol pren bilong mi i birua long ol nupela bilip bilong mi. Tasol bihain, ol i kisim stretpela tingting olsem i gutpela long mi insait long lotu, na mi no insait long pasin raskol. Mi amamas long mi no lusim taim na strong bilong mi moa long salim ol samting bilong pait, tasol mi givim laip bilong mi long helpim ol arapela long kisim save long God bilong bel isi.

[Piksa long pes 27]

Mi insait long ol bung bilong lotu Katolik na bai maus bilong bel bilong mi i ken stap isi

[Piksa long pes 28]

Mi gat planti mani, tasol mi no stap amamas