Gretiuesen Bilong Klas Namba 124 Bilong Skul Gileat

Ol Misineri i Kain Olsem Ol Grasopa

LONG olgeta 6-pela 6-pela mun, Wastaua Baibel Skul Bilong Gileat i save mekim wanpela bung bilong gretiuesen na ol i save singautim famili Betel olgeta bilong Yunaitet Stets long kam. Long Mas 8, 2008, ol manmeri bilong 30 samting kantri em ol i bin singautim ol, ol i bung wantaim famili Betel long gretiuesen bilong klas namba 124 bilong Skul Gileat. Olgeta 6,411 manmeri i bung ol i amamas wantaim ol sumatin long dispela bikpela de bilong ol.

Siaman bilong program, em Stephen Lett bilong Gavening Bodi, i mekim namba wan tok nem bilong en “Wok Wantaim Lain Bilong Jehova Ol i Kain Olsem Grasopa.” Kamapim Tok Hait 9:​1-4 i tok dispela liklik lain Kristen God i bin makim em ol i bin kamap strong gen long samting bilong spirit long 1919, ol i kain olsem bikpela lain grasopa i kirap wantu long mekim wok. Em i kirapim ol sumatin em ol i bilong lain “arapela sipsip” long tingim olsem ol i save wok wantaim dispela lain i olsem grasopa.​—Jo. 10:16.

Bihain, Lon Schilling, wanpela memba bilong Brens Komiti bilong Yunaitet Stets i mekim tok “Stap Olsem Helpim.” Gutpela eksampel bilong Baibel long Akwila na Prisila, em tupela marit long taim bilong ol aposel, i as bilong dispela tok. (Ro. 16:​3, 4) Insait long dispela klas bilong Gileat, i gat olsem 56 man na meri marit ol i insait long en. Em i tokim ol olsem, bilong mekim gut wok olsem misineri, ol i gat wok long strongim marit bilong ol. Olgeta taim Baibel i stori long Akwila, em i save kolim tu meri bilong em Prisila wantaim em. Olsem na aposel Pol na kongrigesen i tingim tupela i olsem wanpela tasol. Na olsem tasol, ol marit misineri long nau, ol i mas wok wantaim, lotu wantaim, na wok wantaim long karim ol hevi bilong ol ples ol i mekim wok misineri long en, na taim ol i mekim olsem narapela i helpim narapela.​—Stt. 2:18.

Tok i kamap bihain long en, em Guy Pierce bilong Gavening Bodi i mekim, nem bilong en, “Larim Gutpela Pasin Bilong Jehova i Kirapim Yu Long Mekim Gutpela Pasin.” Brata Pierce i kamapim olsem, gutpela pasin i no makim tasol olsem yumi sakim pasin nogut na em tasol, nogat. Gutpela man i save mekim ol gutpela samting bilong helpim ol narapela. Gutpela pasin bilong God Jehova i nambawan tru. (Sek. 9:​16, 17, NW) Gutpela pasin na pasin laikim bilong God i kirapim yumi long mekim gutpela samting long ol narapela. Brata Pierce i tok amamas long ol sumatin na i tok: “Yupela i bin mekim gutpela pasin. Na mipela i bilip olsem yupela bai wok yet long bihainim gutpela pasin bilong God long wanem wanem kantri em Jehova bai salim yupela long en.”

Bihain, Michael Burnett, bipo em i wok misineri tasol nau em i tisa long Skul Gileat, i mekim tok “Pasim Long Pes Bilong Yupela.” Ol Israel i mas tingim ol mirakel Jehova i bin mekim bilong kisim bek ol long Isip, na dispela i mas i stap olsem samting ol i ‘pasim long pes’ bilong ol. (Kis. 13:16) Em i tokim ol sumatin long tingim planti tok ol i bin kisim long Skul Gileat na dispela i mas i stap olsem samting ol i pasim long pes bilong ol. Brata Burnett i strongim ol long mekim pasin daun na bihainim ol stiatok bilong Baibel taim ol i stretim hevi wantaim ol wanwok misineri na ol narapela man.​—Mt. 5:​23, 24.

Mark Noumair, em i mekim wok tisa inap longtaim long Skul Gileat, i mekim tok “Ol Bai i Mekim Wanem Kain Singsing Long Yu?” Long bipo, taim ol i amamas long ol man i winim pait, ol i save singsing. Wanpela kain singsing olsem i kamapim klia pasin bilong ol lain Ruben, Dan, na Aser long les long insait long pait, tasol i litimapim nem bilong lain Sebulun, long wanem, ol i daunim laik bilong ol na strong long pait. (Het. 5:​16-​18) Olsem ol tok bilong wanpela singsing, isi isi pasin bilong ol Kristen i kamap ples klia long ai bilong ol narapela. Pasin bilong man long givim bel long mekim wok bilong God na stap gut long ol lo tiokratik, dispela i stap olsem gutpela piksa long ol brata na i mekim Jehova i amamas. Taim ol narapela long kongrigesen i harim ol tok bilong singsing, olsem lukim pasin bilong yumi, dispela i kirapim ol long bihainim gutpela pasin bilong yumi.

Olsem hap bilong trening bilong Skul Gileat, olgeta long klas namba 124 i lusim olsem 3,000 aua long wok bilong autim tok. Sam Roberson i lukautim Dipatmen Bilong Ol Skul Tiokratik i mekim tok “Larim Holi Spirit i Stiaim Wokabaut Bilong Yupela,” we ol sumatin i stori long em long ol ekspiriens bilong wok autim tok na ol i mekim soim long sampela bilong ol dispela ekspiriens. Bihain long ol ekspiriens i gat ol inteviu em Patrick LaFranca bilong Brens Komiti bilong Yunaitet Stets i lukautim, em i mekim inteviu long ol misineri i bin gretiuet long Gileat bipo na nau ol i mekim wok misineri long ol narapela hap. Ol sumatin i amamas long ol gutpela tok ol dispela brata i kamapim bilong helpim ol.

Anthony Morris bilong Gavening Bodi i mekim laspela tok “Tingim, Ol Samting Yumi Lukim i Bilong Sotpela Taim Tasol.” Baibel i tokim yumi long tingim ol gutpela samting bilong bihain em Jehova bai kamapim na no ken tingting tasol long ol hevi yumi karim long nau, em i bilong sotpela taim tasol. (2 Ko. 4:​16-​18) Pasin bilong i stap rabis tru, pasin i no stret, daunim na mekim nogut long ol man, ol sik, na dai, em ol hevi yumi lukim long nau. Sampela bilong ol dispela hevi bai painim ol misineri. Tasol taim yumi tingim olsem ol dispela hevi bai stap sotpela taim tasol, dispela i helpim yumi long putim Jehova i stap namba wan long i stap bilong yumi na wetim gutpela samting i kamap bihain.

Bilong pinisim program, olgeta sumatin i sindaun long pletfom na harim Brata Lett i mekim laspela tok. Em i strongim ol long no ken givap na i tok: “Sapos Jehova i sapotim yumi, maski wanem wanem hevi i painim yumi bai yumi sanap strong na stap gut yet.” Em i tokim ol nupela misineri long mekim pasin olsem bilong ol grasopa, na strong yet long wok bilong Jehova, stap gut long em, na bihainim tok bilong em oltaim.

[Blok long pes 30]

OL SAMTING BILONG OL SUMATIN

Hamas kantri ol i kam long en: 7

Hamas kantri ol bai go long en: 16

Hamas sumatin: 56

Krismas bilong ol, averes: 33.8

Hamas yia long tok i tru, averes: 18.2

Hamas yia long wok painia, averes: 13.8

[Piksa long pes 31]

Klas Namba 124 Bilong Wastaua Baibel Skul Bilong Gileat

Nem bilong ol bratasista i stap daunbilo. Namba wan lain i sanap paslain, na laspela lain i sanap baksait tru. Taim yu ritim nem bilong ol, kirap long han kais na i go long han sut.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz,  J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Piksa long pes 32]

Skul Gileat i stap long Wastaua Ediukesen Senta