Husat Inap Save Long Ol Samting Bai Kamap Bihain?
“Mi wanpela tasol mi God. . . . Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem.”—Aisaia 46:9, 10.
LONG dispela taim nau we ol man i no stap isi, ol man bilong skelim wok politik, strong bilong mani, na sindaun bilong ol man, ol i save skelim ol samting i kamap bipo na long nau bambai ol i ken save long ol samting bai kamap bihain. Sampela narapela, ol i laik tru long save long ol samting bai painim ol long bihain, olsem na ol i skelim ol sta o insait long sampela wok bilong ol spirit. Planti taim ol kain man olsem ol i no amamas long ol save ol i kisim. Yu ting i no gat rot bilong save long ol samting bai kamap long dispela graun, na long ol famili bilong yumi, na long yumi yet? O yu ting i gat wanpela man inap save long ol samting bai kamap bihain?
Jehova em i God i Gat Olgeta Strong, na long ol tok em i givim long profet Aisaia, olsem i stap antap, em i tokaut olsem em inap tok profet long ol samting bai kamap bihain. Long rot bilong Aisaia, God i bin tok profet long ol lain Israel bilong bipo bai lusim kalabus long Babilon na i go wokim gen Jerusalem na tempel bilong en. Dispela tok profet i kolim stret wanem ol samting? Inap olsem 200 yia paslain long truim bilong en, Aisaia i kolim stret nem bilong dispela man bai daunim Babilon, em Sairus. Na tu, Aisaia i stori gut long samting em Sairus bai mekim—em bai senisim ron bilong wara Yufretis, em dispela wara i banisim taun. Em i tokaut tu olsem, Sairus bai i lukim olsem ol Babilon i larim tupela traipela dua bilong taun i op i stap, olsem na em bai i no hatwok long daunim dispela taun.—Aisaia 44:24–45:7.
Tru tumas, God inap save long ol samting bai kamap, tasol yumi ol man nogat. King Solomon i tok: “Yu no ken hambak na promis bai yu mekim wanpela samting long tumora. Long wanem, yu no save wanem samting bai i kamap nau.” (Sindaun 27:1) Dispela tok em i tru long nau tu. I no gat wanpela man inap save long samting bai painim em long bihain. Wanem samting i mekim na God i narapela kain? Em i save gut long olgeta samting em i bin wokim, na em i save long tingting na laik bilong ol man. Sapos God i laik, em inap save long ol samting em wanpela man o wanpela lain olgeta bai mekim. Na tu, em inap tru long stiaim ol samting i kamap. Em i tok: “Taim wokman bilong mi i autim tok long wanpela samting, na taim mi givim tok long ol man long samting bai i kamap bihain, orait mi save mekim ol dispela tok i kamap tru tasol.” (Aisaia 44:26) God Jehova tasol inap mekim dispela tok.
Aisaia i bin stap olsem 700 yia paslain long taim bilong Jisas, em Mesaia. Tasol Aisaia i bin tok profet long Mesaia bai kamap. Tasol kirap long yia 1700 C.E. na i kam, sampela man i sutim tok long Buk Aisaia. Ol i tok wanpela man i bin raitim ol dispela tok i makim Mesaia bihain long ol dispela samting i kamap pinis, na i no paslain long ol dispela samting i kamap. Yu ting dispela tok em tru? Long 1947, ol i painim wanpela kopi bilong Buk Aisaia wantaim ol olpela skrol long wanpela hul bilong maunten klostu long Raunwara Detsi. Ol saveman i painimaut olsem ol i bin raitim dispela kopi bilong Buk Aisaia olsem 100 yia paslain long mama i karim dispela Mesaia o Krais, em samting Buk Aisaia i bin tok profet long en. Yes, Baibel i bin tokaut long ol samting bai kamap bihain!
Aisaia na ol arapela man i bin raitim Baibel, ol i no inap mekim tok profet long ol samting bai kamap bihain sapos ol i bin bihainim tingting na save bilong ol yet, nogat. “Holi Spirit yet i kirapim ol man na ol i autim tok God i givim long ol.” (2 Pita 1:21) Long ol stori i kamap bihain long dispela, yumi bai stori long sampela samting long i stap bilong Jisas em Aisaia i bin tok profet long en. Na yumi bai skelim ol samting em Jisas na ol disaipel bilong em i tok profet long ol bai kamap long taim bilong yumi na long bihain.