Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w08 10/15 p. 17-20
  • Jehova i Givim Strong Long Mi

No gat vidio bilong dispela seksen.

Sori, popaia kamap long lodim vidio.

  • Jehova i Givim Strong Long Mi
  • Wastaua i tokaut Long Kingdom Bilong Jehova—2008
  • Ol Liklik Het Tok
  • Wankain Infomesen
  • Lainim Tok i Tru
  • Wok Painia na Ol Blesing Bilong En
  • Kisim Skul Long Gileat
  • “Ples Bilong Ol Manmeri Bilong Smail”
  • Nupela Poroman na Nupela Asainmen
  • Mi Mekim Wok Long Strong Bilong Jehova na Kisim Planti Blesing
  • ‘Marimari Bilong Yu i Winim Laip Bilong Mi’
    Wastaua i Tokaut Long Kingdom Bilong Jehova—1998
  • Jehova i Bin Skulim Mi Long Mekim Laik Bilong En
    Wastaua i Tokaut Long Kingdom Bilong Jehova—2012
  • Wok Painia—Yu Inap Mekim?
    1995 Wok Kingdom Bilong Yumi
  • Ol Gutpela Rot Mi Makim i Kamapim Ol Blesing
    Wastaua i Tokaut Long Kingdom Bilong Jehova—2007
Wastaua i tokaut Long Kingdom Bilong Jehova—2008
w08 10/15 p. 17-20

Jehova i Givim Strong Long Mi

Stori bilong Joan Coville

Mama i karim mi long Julai 1925 long Huddersfield, Inglan. Mi wanpela pikinini tasol insait long famili, na mi save sik planti taim. Papa i save tok, “Long olgeta taim win i kisim yu, yu save sik.” Na i luk olsem dispela tok em i tru!

TAIM mi liklik pikinini, ol pris pasto i save givim bel tru long beten long bel isi i mas i stap, tasol taim namba tu pait i kamap, ol i beten bilong winim pait. Dispela i mekim na mi gat tupela tingting. Long dispela taim, Annie Ratcliffe i kam long haus bilong mipela, em wanpela tasol i Witnes Bilong Jehova long hap bilong mipela.

Lainim Tok i Tru

Annie i lusim buk Salvation long mipela, na em i singautim Mama long i go long haus bilong em long wanpela bung we ol bai toktok long Baibel.a Mama i tokim mi long go wantaim em. Mi tingim yet namba wan samting ol i toktok long en. Ol i toktok long pe bilong baim bek man, na mi kirap nogut olsem tok bilong ol i no mekim mi i skin dai, nogat. Tok ol i mekim i bekim planti askim bilong mi. Long wik bihain, mipela i go gen. Long dispela taim ol i stori long tok profet bilong Jisas long mak bilong las de. Taim mipela i skelim ol samting nogut i kamap long graun, wantu mitupela Mama i luksave olsem dispela em i tok i tru. Long dispela de yet, ol i singautim mipela long go long Haus Kingdom.

Long Haus Kingdom mi bungim sampela yangpela painia, na wanpela em Joyce Barber (nau nem bilong em Ellis), em i wok yet wantaim man bilong em, Peter, long London Betel. Mi bin ting olsem wok painia em wok olgeta bratasista i save mekim. Olsem na wantu mi kirap autim tok inap 60 aua long olgeta mun, maski mi stap yet long skul.

Faipela mun bihain, long Februeri 11, 1940, mi na Mama i kisim baptais long wanpela kibung sekit long Bradford. Papa i orait long nupela bilip bilong mipela, tasol em i no kam insait long tok i tru. Long taim mi kisim baptais, ol i bin kirapim pasin bilong autim tok long ol rot. Mi insait long dispela wok, na mi karim ol magasin beg na ol bikpela strongpela pepa i gat rait mi hangamapim long sol. Wanpela Sarere, ol i makim mi long sanap long hap bilong stua we planti man i raun long en. Mi save pret yet long ol man, na tru tumas, i luk olsem olgeta wanskul bilong mi ol i wokabaut i kam long dispela kona we mi sanap long en!

Long 1940, ol i brukim kongrigesen em mipela i save go long en i kamap tupela. Bihain long dispela, klostu olgeta wanlain bilong mi i stap long narapela kongrigesen. Mi komplein long dispela long wasman siaman bilong kongrigesen. Em i tok: “Sapos yu laikim ol yangpela poroman, orait go na autim tok long ol yangpela.” Na mi bin mekim olsem! I no longtaim na mi bungim Elsie Noble. Em i kisim tok i tru na mitupela i kamap gutpela pren tru.

Wok Painia na Ol Blesing Bilong En

Taim mi pinisim skul, mi mekim wok kuskus. Tasol taim mi lukim amamas bilong ol bratasista i save autim tok fultaim, laik bilong mi long mekim wok bilong Jehova olsem painia i go bikpela. Long Me 1945, mi amamas long kirap mekim wok painia salim. Long namba wan de bilong mi long wok painia, bikpela ren tru i bin pundaun long de olgeta. Tasol mi amamas tru long autim tok na mi no wari long ren. Taim mi raun long baiskol long olgeta de na autim tok, dispela i mekim gutpela samting long helt bilong mi. Maski skel bilong mi i no winim 42 kilo, mi no bin lusim wok painia long wanpela taim, nogat. Long ol dispela yia, mi bin pilim tru olsem “God tasol i save was long mi,” olsem givim strong long mi.​—Sng. 28:7.

Ol i laik kirapim ol nupela kongrigesen, olsem na ol i salim mi olsem painia salim i go long ol taun we i no gat ol Witnes. Pastaim mi mekim wok long Inglan inap 3-pela yia na bihain long Aialan inap 3-pela yia. Taim mi painia long Lisburn, long Aialan, mi stadi long wanpela man, em i helpim bilong pasto bilong lotu Talatala. Taim em i kisim save long ol bikpela bilip bilong Baibel, em i autim dispela nupela save bilong em long kongrigesen bilong em. Sampela i toktok planti long dispela long ol bikman bilong lotu, na ol i tokim em long kamapim as na em i mekim olsem. Em i tok, em i pilim olsem em wok Kristen bilong em long tokim ol sipsip olsem em i bin skulim ol long planti tok giaman. Maski famili bilong em i birua tru long em, em i dediket long Jehova na mekim wok bilong em inap long em i dai.

Namba tu ples mi painia long en long Aialan, em Larne. Inap 6-pela wik mi wanpela tasol i wok, long wanem, poroman painia bilong mi i go long kibung Theocracy’s Increase long New York, long 1950. Long dispela taim mi pilim hatwok tru, long wanem, mi gat laik tru long go long kibung. Tasol i gat sampela gutpela samting i bin kamap long wok autim tok bilong mi long ol dispela wik. Mi bungim wanpela lapun man husat i bin kisim wanpela buk bilong yumi inap 20 yia bipo. Insait long ol dispela yia em i bin ritim dispela buk planti taim pinis na em inap tingim klostu olgeta tok bilong en. Em i kisim tok i tru wantaim pikinini man na pikinini meri bilong em.

Kisim Skul Long Gileat

Long 1951, ol i singautim mi na tenpela narapela painia bilong Inglan long go long klas namba 17 bilong Skul Gileat long South Lansing, New York. Man! Mi amamas tru long ol tok bilong Baibel mipela i bin kisim long ol dispela mun! Long dispela taim, ol sista i no save insait long Skul Tiokratik Bilong Autim Tok long ol kongrigesen, tasol long Gileat ol i makim mipela ol sista long mekim tok. Mipela i pret tru! Taim mi mekim namba wan tok, long kirap bilong tok i go inap pinis, han bilong mi i holim pepa i wok long guria. Tisa, em Brata Maxwell Friend, i tok pilai olsem: “Yu no guria tasol long kirap bilong tok, olsem olgeta man i save gut long mekim tok i save mekim, nogat, yu bin guria i go inap long pinis bilong tok.” Insait long dispela taim, mipela olgeta i lain gut moa long mekim tok long ai bilong klas. I no longtaim na skul bilong mipela i pinis, na mipela i kisim ol asainmen bilong i go long ol narapela kantri. Ol i salim mi i go long Tailan!

“Ples Bilong Ol Manmeri Bilong Smail”

Mi ting em wanpela blesing bilong Jehova long ol i makim Astrid Anderson long wok misineri wantaim mi long Tailan. Inap 7-pela wik mipela i raun long wanpela kago sip bilong i go long hap. Mipela i kamap long nambawan biktaun Bangkok, em taun i gat ol ples maket we ol man i pulap na pas pas tru na ol wara i stap olsem ol bikrot bilong taun. Long 1952, namba bilong ol pablisa bilong Kingdom long Tailan i aninit long 150.

Long namba wan taim mipela i lukim Wastaua long tok ples Tailan, mipela i tingting, ‘Olsem wanem bai mipela inap mekim dispela kain tok ples?’ Em i bikpela hatwok moa long kolim ol tok na krai bilong nek i stret long en. Olsem, dispela tok khaù ol i kolim long nek i antap na bihain i go daun em i makim “rais,” tasol dispela seim tok sapos ol i kolim long strongpela nek i daun em i makim “nius.” Olsem na taim mipela i autim tok, pastaim mipela i tokim ol man olsem “Mi bringim gutpela rais long yu” na mipela i no tok “gutnius”! Mipela i save lap long dispela, tasol isi isi mipela i lain gut long dispela tok ples.

Ol Tailan i gat gutpela pasin pren. Olsem na ol i kolim Tailan olsem Ples Bilong Ol Manmeri Bilong Smail. Namba wan taun ol i salim mipela long en em Khorat (nau ol i kolim Nakhon Ratchasima), we mipela i stap inap tupela yia. Bihain, ol i makim mipela long i go long taun Chiang Mai. Klostu olgeta man bilong Tailan i bilong lotu Buda na ol i no save long Baibel. Long Khorat, mi bin stadi wantaim bos bilong posofis. Mipela i stori long Abraham bilong bipo. Dispela man i bin harim nem Abraham bipo, olsem na em i wok long meknaisim het, olsem wanbel long tok bilong mi. I no longtaim na mi kisim save olsem, mitupela i no toktok long wankain Abraham, nogat. Dispela man i tingim Abraham Lincoln, em presiden bilong Amerika long bipo!

Mipela i amamas long skulim ol gutpela manmeri bilong Tailan long ol tok bilong Baibel, tasol long wankain taim, ol i lainim mipela long pasin bilong amamas long ol liklik samting em mipela i holim. Dispela skul i gutpela tru, long wanem, long namba wan haus misineri long Khorat mipela i no gat pawa na wara saplai. Long ol dispela asainmen, mipela i bin lain long i stap olsem lain i ‘gat planti samting o sot long ol samting.’ Olsem aposel Pol, mipela i bin pilim tru dispela tok olsem “long strong bilong em [God] mi inap mekim olgeta samting.”​—Fl. 4:​12, 13.

Nupela Poroman na Nupela Asainmen

Bipo, long 1945, mi bin i go raun long London. Long dispela taim, mi go raun lukluk long Haus Tumbuna bilong Inglan wantaim sampela painia na sampela brata na sista bilong Betel. Wanpela bilong ol em Allan Coville. I no longtaim bihain na em i bin go long klas namba 11 bilong Skul Gileat. Ol i salim em i go long Frans na bihain long Beljam.b Bihain, taim mi mekim yet wok misineri long Tailan, em i askim mi long maritim em, na mi tok yes long em.

Mitupela i marit long Brussels, Beljam, long Julai 9, 1955. Mi gat laik tru long go long Paris bilong kisim holide bihain long marit, olsem na Allan i stretim ol samting bambai mipela i ken go long dispela hap na stap long kibung bai kamap long wik bihain. Tasol taim mipela i kamap, wantu ol i askim Allan long helpim wok bilong tanim tok long ol de bilong kibung. Olgeta de em i mas lusim ples slip long bikmoning, na mipela i save kam bek long nait. Olsem na mi bin go long Paris bilong holide bihain long marit, tasol klostu olgeta taim Allan i no stap wantaim mi, nogat, mi lukim em long pletfom tasol! Maski i olsem, mi amamas long lukim man bilong mi i mekim wok bilong helpim ol bratasista bilong em, na mi save olsem sapos Jehova i stap nambawan long marit bilong mitupela, mipela bai amamas tru.

Na tu, marit i mekim na mi go long nupela ples bilong autim tok​—long Beljam. Mi no save long planti samting bilong Beljam, mi save tasol olsem sampela pait i bin kamap long dispela kantri, tasol i no longtaim na mi kisim save olsem planti Beljam ol i man i save laikim pasin bilong i stap isi. Na tu, bilong mekim wok long dispela asainmen mi mas lainim tok Frans, em tok ples ol i save mekim long hap saut bilong kantri.

Long 1955 i gat olsem 4,500 pablisa long Beljam. Klostu 50 yia, mitupela Allan i bin mekim wok long Betel na wok bilong raun. Insait long tupela yia na hap bihain long marit, mipela i save raun long baiskol, i go antap na i go daun long ol maunten, long taim bilong ren na taim bilong san tu. Long ol dispela yia, mipela i bin slip long 2,000 samting narapela narapela haus bilong ol wanlotu Witnes! Planti taim mi bungim ol brata na sista em skin bilong ol i no strong tasol ol i wok strong long mekim wok bilong Jehova. Gutpela pasin bilong ol i strongim mi long no ken givap long wok mi mekim. Long pinis bilong olgeta wan wan wik em mipela i stap wantaim wanpela kongrigesen, mipela i pilim olsem mipela i kamap strong moa. (Ro. 1:​11, 12) Allan i bin i stap olsem gutpela poroman tru. Tok bilong Saveman 4:​9, 10 em i tru, olsem: “Sapos tupela man i stap wantaim, em i gutpela. . . . Sapos wanpela i pundaun, orait narapela i ken litimapim em gen”!

Mi Mekim Wok Long Strong Bilong Jehova na Kisim Planti Blesing

Long ol dispela yia, mitupela Allan i bin kisim planti amamas long helpim ol narapela long mekim wok bilong Jehova. Olsem, long 1983 mipela i go lukim wanpela kongrigesen i save mekim tok Frans long Antwerp. Mipela i stap wantaim wanpela famili na Benjamin Bandiwila tu i stap wantaim ol, em wanpela yangpela brata bilong Saier (nau em Ripablik Demokratik Bilong Kongo). Benjamin i bin kam long Beljam bilong kisim bikpela skul moa. Em i tokim mipela, “Mi mangalim laip bilong yupela, yupela i givim bel olgeta long mekim wok bilong Jehova.” Allan i bekim tok: “Yu tok yu mangalim mipela; tasol yu wok strong long kisim wok bilong dispela graun. Yu no ting dispela tupela samting i pait wantaim?” Dispela tok i sutim tru bel bilong Benjamin na i mekim em i tingting long laip bilong em. Em i go bek long Saier na bihain em i kirap mekim wok painia, na long nau em i wanpela memba bilong Brens Komiti.

Long 1999, mi kisim operesen bilong rausim wanpela sua i stap long wanpela rop bilong nek bilong mi. Kirap long dispela taim skel bilong mi em 30 kilo tasol. Tru tumas, mi olsem wanpela ‘sospen graun i no gat strong.’ Tasol mi tenkyu long Jehova i bin givim mi “bikpela strong.” Bihain long operesen, Jehova i strongim mi, olsem na mi inap raun gen wantaim Allan long wok bilong raun. (2 Ko. 4:7) Bihain, long Mas 2004, Allan i slip na em i dai. Mi save wari tru long em, tasol mi save olsem Jehova i tingim em na dispela i mekim gut bel bilong mi.

Nau mi gat 83 krismas, na mi inap tingim bek winim 63 yia long mekim wok bilong God fultaim. Mi wok yet long autim tok, mekim wanpela Baibel stadi long haus, na long olgeta de taim rot i op mi save autim tok long ol gutpela samting Jehova i tingting pinis long mekim. Sampela taim mi tingting olsem, ‘Laip bilong mi bai stap olsem wanem sapos mi no bin kirap mekim wok painia long 1945?’ Long dispela taim bipo skin bilong mi i no strong tumas, olsem na i luk olsem i gat as na mi no ken painia. Tasol mi amamas tru long mi bin kirap mekim wok painia taim mi yangpela yet! Mi yet i bin lukim olsem taim yumi putim Jehova i stap namba wan, em bai i stap olsem strong bilong yumi.

[Ol Futnot]

a Ol Witnes Bilong Jehova i wokim buk Salvation long 1939. Nau ol i no wokim moa.

b Laip stori bilong Brata Coville i stap long The Watchtower bilong Mas 15, 1961.

[Piksa long pes 18]

Mi wantaim poroman misineri bilong mi, Astrid Anderson (long han sut)

[Piksa long pes 18]

Mi wantaim man bilong mi long wok bilong raun, 1956

[Piksa long pes 20]

Mitupela Allan long 2000

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim