Gretiuesen Bilong Klas Namba 126 Bilong Skul Gileat
Rot Bilong Mekim Wok Misineri i Kamap Gutpela Moa
BIKPELA lain manmeri i kam bung long Wastaua Ediukesen Senta long Patterson, New York, long wanpela spesel bung. Sarere, Mas 14, 2009, em gretiuesen de bilong klas namba 126 bilong Wastaua Baibel Skul Bilong Gileat. Ol bai salim ol sumatin i go long 22 kantri long mekim wok bilong autim gutnius bilong Kingdom Bilong God.—Matyu 24:14.
Long dispela skul, inap 5-pela mun ol sumatin i kisim gutpela save tru long Baibel bilong helpim ol long mekim gut wok bilong ol olsem ol misineri Kristen. Long de bilong gretiuesen, rot i op long klas olgeta i ken harim sampela gutpela tok moa long olsem wanem ol i ken mekim olsem.
Anthony Morris, em wanpela memba bilong lain Gavening Bodi Bilong Ol Witnes Bilong Jehova na em i siaman bilong program, em i tok, Skul Gileat i bin kirap skulim ol misineri long 1943. Kirap long dispela taim na i kam, ol misineri i mekim bikpela wok tru bilong autim tok long olgeta hap bilong graun.
Em i tok, maski ol Farisi na ol saveman bilong lo i luk daun long ol aposel bilong Jisas na tingim ol olsem ol man ‘i no bin skul na i man nating tasol,’ ol i luksave long pasin bilong ol aposel long tokaut strong na i no pret na ol i save olsem ol aposel i bin stap wantaim Jisas. (Aposel 4:13) Skul em ol sumatin i kisim i helpim ol na ol i no pret long autim tok.
Robert Ciranko, em i helpim bilong Komiti Bilong Raitim Tok long lain Gavening Bodi, em i mekim dispela tok “Mekim Wankain Pasin Long Olgeta Kain Man.” Em i kamapim klia olsem klostu nau ol sumatin bai bungim ol man i gat narapela narapela sindaun na kastam. Maski i olsem, ol bai i no gat hatwok long autim tok long ol sapos ol sumatin i kisim pasin bilong Jehova. Mining bilong tok bilong Aposel 10:34 i makim olsem God i no save skelim ol man long lukluk bilong ol, nogat. “God i save mekim wankain pasin long olgeta manmeri.” (Aposel 10:35) Brata Ciranko i tok: “Kisim pasin bilong God na tingim olgeta man long teritori bilong yupela olsem ol man em God bai orait long ol, na long dispela rot, wok misineri bilong yupela bai kamapim gutpela samting.”
“Yupela i Gat Ol Samting Bilong Mekim Gut Dispela Wok”
Brata Samuel Herd bilong lain Gavening Bodi i tok: “Sampela man i ting kamel i luk nogut, tasol em i gat bodi i stret tru bilong em i ken raun long ples drai nating.” Olsem tasol, ol misineri i gat ol samting bilong mekim gut wok long ol hap ol bai go long en. Faivpela samting bilong helpim ol:
1. Laikim tru Jehova. (Matyu 22:37, 38) Ol sumatin i kamapim klia olsem ol i tingting strong long mekim wok bilong Jehova.
2. Bungim save ol i kisim pinis long Tok Bilong God. Ol kamel i save bungim kaikai long baksait bilong ol. Tasol taim i gat kaikai, em i no inap tingim tasol kaikai em i bungim pinis, nogat, em bai wok yet long kisim nupela kaikai. Olsem tasol, ol misineri i no ken ting ol tok ol i lainim pinis long Skul Gileat em inap long ol, nogat, ol i mas wok yet long kisim save long ol tok bilong Baibel.
3. Laikim ol manmeri. (Matyu 22:39) Ol sumatin i gat pasin bilong sori long ol manmeri.
4. Amamas long mekim wok. (Song 110:3) Taim strong bilong ol misineri i pinis, Jehova bai strongim ol.—Aisaia 40:29.
5. Strong olsem bilong yangpela man. Wankain olsem kamel i save karim ol man long ples drai nating, misineri i mas “karim” wanbilip Kristen husat i gat hatwok long mekim wok bilong Jehova. Bilong mekim olsem man i mas i gat bikpela strong, tasol ol misineri i gat strong olsem bilong yangpela man.
Ol Narapela Samting Bilong Program
Michael Burnett, em wanpela tisa bilong Skul Gileat, em i tok pikinini bilong diwai amon em wanpela bilong ol gutpela samting Jekop i bin salim olsem presen i go long hetman bilong Isip. (Stat 43:11) Maski amon i liklik, em i gat planti gutpela samting long en. Ol sumatin i bin kisim planti gutpela save long Baibel taim ol i skul, i olsem ol i kaikai planti amon. Sampela bilong ol gutpela skul ol i mas kisim i go wantaim ol em; pasin bilong amamas long ol samting ol i gat pinis em Jehova i givim long ol, na lain long laikim dispela nupela hap ol bai stap long en.
Mark Noumair, em tu i wanpela tisa bilong Skul Gileat, em i kamapim klia olsem Tok Bilong God i olsem wanpela beg i pulap long ol “gutpela tingting na save.” (Jop 28:18) Yumi mas opim dispela beg na yusim ol samting i stap insait long en. Long wok misineri bilong ol, sapos ol samting i no kamap olsem ol i bin ting bai kamap, orait ol i ken tingim aposel Pol. Ol disaipel bilong Jisas i salim Pol i go long as ples bilong em na em i stap inap 9-pela yia. Em i no kisim tingting olsem Jisas i “makim em pinis,” olsem na em i mas mekim wok long ol narapela hap, nogat, em i givim bel olgeta long mekim wok long wanem wanem hap em i stap long en. (Aposel 9:15, 28-30) Pasin bilong bihainim ol tok bilong Jehova, ating dispela inap givim hatwok. Narapela man husat i mekim olsem, em Jonatan. Em i luksave olsem Devit em man Jehova i makim bilong mekim wok king, olsem na em i amamas long sapotim Devit.
Long tok “Ol Wokman Bilong God i Tokaut Strong na i No Pret,” ol sumatin i mekim soim long ol ekspiriens ol i bin kisim taim ol i autim tok insait long dispela haptaim ol i bin skul. Planti bilong ol i bin kirapim ol Baibel stadi. Narapela tok em “Oganaisesen Bilong Jehova i Redim Ol,” na brata i mekim inteviu long 3-pela misineri em ol i bin mekim wok misineri longpela taim tru. Ol wan wan i stori long olsem wanem ol i bin lain long wok gut wantaim oganaisesen bilong God.
“Stap Misineri i Gat Pasin Bilong Amamas”
Gerrit Lösch, wanpela memba bilong lain Gavening Bodi, i mekim bikpela tok bilong dispela program, nem bilong en “Stap Misineri i Gat Pasin Bilong Amamas.” Em i tok, planti wok samting ol man i ting em ol i bilong amamas, ol i no save kamapim amamas tru tru. (Sindaun 14:13; Saveman 2:10, 11) Amamas tru i save kamap long pasin bilong bihainim laik bilong God, maski em i no isi long mekim olsem. Skul Gileat i gat hatwok bilong en, tasol ol misineri i amamas long ol gutpela samting ol i kisim long en.
I gat sampela samting i save mekim ol Kristen tru i amamas. Ol i lotuim God bilong amamas. (Song 33:12; 1 Timoti 1:11) Ol i stap insait long paradais bilong spirit, na Baibel i tok promis long klostu nau Paradais bai kamap long graun. I stap bilong ol i gat as bilong en—em long mekim wok bilong Jehova na litimapim nem bilong em. Na moa yet, Jehova na Jisas i laikim ol.
Brata i tok moa: “Yu bai stap misineri i gat pasin bilong amamas, sapos yu lain long amamas long ol samting yu gat pinis.” Pasin bilong laikim ol narapela na larim ol i laikim yu, dispela em narapela samting bilong mekim yupela i amamas. Olsem na lusim tingting long pasin kranki bilong ol narapela na no ken tingim dispela i olsem bikpela samting. Mekim gutpela pasin long ol narapela, helpim ol manmeri i no gat strong na stori wantaim ol long ol gutpela ekspiriens. (Song 41:1, 2; Aposel 20:35) Amamas i save kamap long pasin bilong givim taim na strong bilong yumi yet long mekim wok autim tok.—Luk 11:28.
Brata Lösch i pinisim toktok olsem: “Go het olsem ol misineri i gat pasin bilong amamas na kisim sampela amamas, tasol putim tingting olgeta long litimapim nem bilong God bilong yumi, Jehova, em Man bilong amamas, na mekim planti narapela tu i amamas.”
Anthony Morris i kolim pasin laikim Kristen i kam long ol narapela kantri, na bihain em i givim setifiket long ol sumatin. Em i mekim olsem pinis, orait wanpela mausman bilong klas namba 126 i ritim wanpela pas em ol sumatin i raitim i go long lain Gavening Bodi bilong tok tenkyu long ol i bin kam long Skul Gileat.
Long laspela hap bilong program, siaman i tok “ol skru na rop i joinim ol masol” i mekim bodi i wok gut wantaim, na dispela i makim ol rot em “wokboi i gat gutpela tingting” i yusim bilong givim kaikai bilong spirit long lain bilong Jehova na stiaim ol. (Kolosi 2:18, 19; Matyu 24:45) Sapos ol sumatin husat i pinisim Skul Gileat i bihainim tok bilong ol man God i makim, ol bai mekim gut tru wok bilong ol long autim tok.—2 Timoti 4:5.
[Blok long pes 30]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 22
Hamas sumatin: 56
Hamas ol i marit: 28
Krismas bilong ol, averes: 32.8
Hamas yia long tok i tru, averes: 17.9
Hamas yia long wok painia, averes: 13.5
OL KANTRI OL BAI MEKIM WOK MISINERI LONG EN
Ol i salim ol sumatin i go long Balgeria, Bekina Faso, Benin, Bolivia, Gana, Guatemala, Honduras, Kamarun, Kenya, Kosta Rika, Laibiria, Madagaska, Mosambik, Nikaragua, Panama, Paragwai, Peru, Romenia, Saut Afrika, Siera Leon, Togo, na Yuganda.
[Piksa long pes 31]
Klas Namba 126 Bilong Wastaua Baibel Skul Bilong Gileat
Namba 1 lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.