Wanpela Stori Nating i Kamapim Narapela Stori Nating
APOSEL Pol i tokim ol Kristen i stap long yia 60 C.E. samting: “Yupela i mas lukaut gut.” Ol i mas lukaut gut long wanem samting? Em i tok: “Nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna.”—Kolosi 2:8.
Maski Pol i mekim dispela tok lukaut, kirap long 150 C.E. samting, sampela Kristen i kirap kisim sampela tingting i kam long ol saveman bilong bipo bambai ol i ken kamapim klia bilip bilong ol long ol man. Bilong wanem ol i mekim olsem? Ol i laik bai ol lain i bin skul gut na i stap aninit long Gavman Rom ol i ken orait long ol, na long dispela rot ol i ken kirapim ol man long tanim bel na kamap Kristen.
Justin Martyr, em wanpela Kristen i gat nem, em i bilip olsem Mausman Bilong God i bin kamap ples klia long ol saveman Grik paslain tru long taim Jisas i kam daun long graun. Justin na ol tisa i gat wankain tingting olsem dispela, ol i ting pasin bilong bungim tok bilong ol saveman na ol stori nating wantaim lotu Kristen, dispela i mekim na ol man bilong olgeta lain bai kisim dispela lotu.
Lotu Kristen bilong Justin Martyr i bin kirapim planti manmeri long tanim bel. Tasol taim em i kisim wanpela stori nating i kam insait long lotu, dispela i kamapim sampela moa stori nating, na dispela i kamapim kain bilip em nau ol i kolim bilip Kristen. Bilong kamapim long ples klia ol dispela stori nating, lukim tok bilong ol buk long ol stori i kamap bihain long dispela, na skelim wantaim tok bilong Baibel.
[Ol Piksa Kredit Lain long pes 3]
Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence