Yusim Olgeta De Long Laip Bilong Yu Bilong Givim Biknem Long God

DEVIT, man bilong raitim song, em i beten long Jehova olsem: “Long moningtaim yu ken mekim mi i tingting gen long bikpela sori bilong yu. . . . Yu mas soim rot long mi na mi ken bihainim.” (Sng. 143:8) Taim yu kirap long moningtaim na yu tenkyu long Jehova long nupela de yu kisim bilong i stap laip, yu save bihainim pasin bilong Devit na askim Jehova long helpim yu long wokim ol gutpela disisen na soim wanem rot i gutpela long bihainim? Ating yu save mekim olsem, a?

Yumi ol wokman bilong Jehova i dediket pinis, na maski ‘yumi kaikai na dring o yumi mekim narapela samting,’ yumi mas wok strong long “mekim dispela olgeta samting bilong givim biknem long God.” (1 Ko. 10:31) Yumi save pinis, ol samting yumi mekim long i stap bilong yumi long olgeta wan wan de, em bai givim biknem long Jehova o nogutim nem bilong em. Na yumi save, Baibel i tok Satan i wok long sutim tok long ol brata bilong Krais​—na olgeta wokman bilong God long graun​—“long san na long nait.” (KTH 12:10) Olsem na yumi strong long kamapim klia olsem dispela tok Satan i sutim long yumi em i giaman tasol, na yumi laik mekim bel bilong Jehova i amamas. Bilong mekim olsem, yumi save mekim wok bilong Papa bilong yumi long heven “long san na long nait.”​—KTH 7:15; Snd. 27:11.

Orait nau yumi ken skelim tupela bikpela rot we yumi ken mekim wok long olgeta wan wan de long laip bilong yumi bilong givim biknem long God. Namba wan, yumi mas makim wanem ol samting i bikpela samting tru, na namba tu, tingim gut ol narapela.

Bihainim Tok Promis Bilong Yumi

Taim yumi dediketim laip bilong yumi long Jehova, yumi tokaut olsem yumi gat bikpela laik long mekim wok bilong em. Na tu, yumi bin tok promis long Jehova olsem yumi bai wokabaut long rot bilong em long olgeta de​—i go inap oltaim oltaim. (Sng. 61:​5, 8) Orait olsem wanem yumi ken bihainim dispela tok promis? Olsem wanem yumi ken kamapim klia long olgeta de olsem yumi laikim tru Jehova long bel olgeta bilong yumi?

Baibel i kamapim klia tru ol samting Jehova i laik bai yumi mas mekim. (Lo 10:​12, 13) I gat lista bilong sampela wok long blok, “Ol Wok God i Givim Long Yumi,” long pes 22. God yet i bin givim ol dispela wok long yumi, olsem na ol i bikpela samting. Olsem wanem yumi ken save wanem wok yumi mas putim i go pas sapos i gat tupela o sampela wok moa yumi mas mekim long wankain taim?

Ol wok yumi mas putim i go pas, em ol wok holi yumi mas mekim, olsem stadi long Baibel, beten, go long ol miting Kristen, na wok autim tok. (Mt. 6:33; Jo. 4:34; 1 Pi. 2:9) Tasol yumi no inap mekim ol wok bilong spirit long de olgeta, long wanem, i gat wok mani, skul, na ol kain kain wok bilong haus tu long mekim. Tasol maski i olsem, yumi mas wok strong bambai ol wok skin na ol narapela wok samting i no pasim rot bilong yumi long mekim ol wok holi bilong yumi, olsem go long ol miting Kristen. Olsem: Taim yumi stretim rot bilong i go malolo long wanpela hap, yumi skelim gut olsem yumi no ken lusim visit bilong wasman sekit, spesel de kibung, kibung sekit, o kibung distrik. Sampela taim yumi inap bungim sampela wok wantaim. Olsem: Yumi ken mekim wok bilong klinim Haus Kingdom, olsem wanpela wok famili i mekim wantaim, o long belo taim long ples wok o long skul, yumi ken autim tok long ol wanwok o wanskul. Tru tumas, taim yumi mas makim ol samting bilong mekim long laip bilong yumi, olsem painim wok mani, makim wanem skul yumi bai kisim, o makim sampela pren yumi laik poromanim​—yumi laik bai nambawan bikpela samting long laip bilong yumi, em pasin bilong lotuim gutpela Papa bilong yumi Jehova​—i stiaim ol disisen yumi mekim.​—Sav. 12:13.

Soim Olsem Yu Tingim Ol Narapela

Jehova i laik bai yumi tingim ol narapela na mekim gutpela pasin long ol. Tasol Satan i laik kirapim yumi long tingim yumi yet tasol. Ol man bilong “laikim ol yet tasol,” ol man bilong “laikim tumas ol kain kain amamas,” na ol man bilong “bihainim ol laik bilong olpela bel,” ol i pulap tru long dispela graun bilong Satan. (2 Ti. 3:​1-5; Ga. 6:8) Planti man i no save tingting liklik long ol hevi em pasin bilong ol inap kamapim long ol narapela man. Ol “pasin bilong olpela bel” i stap long olgeta hap.​—Ga. 5:​19-21.

Tasol ol manmeri em holi spirit bilong Jehova i kirapim ol, tingting na pasin bilong ol i narapela kain tru​—ol i save laikim tru ol narapela na helpim na mekim gutpela pasin long ol! (Ga. 5:22) Baibel i tokim yumi long tingim ol samting ol narapela i nidim na putim dispela i go pas long ol samting yumi yet i nidim. Olsem na yumi save mekim ol samting i soim olsem yumi tingim ol narapela, tasol yumi save was gut na bai yumi no laik subim nus long olgeta samting i kamap long sindaun bilong ol narapela. (1 Ko. 10:​24, 33; Fl. 2:​3, 4; 1 Pi. 4:​15, NW) Yumi save tingim moa yet ol wanbilip. Tasol yumi wok strong tu long helpim ol man i no wanbilip bilong yumi. (Ga. 6:10) Yu ting yu inap painim rot nau long mekim gutpela pasin long wanpela yu bungim?​—Lukim blok “Soim Olsem Yu Tingim Ol,” long pes 23.

I no long wanpela bikpela de o taim bilong yia tasol na yumi tingim ol narapela na mekim gut long ol, nogat. (Ga. 6:2; Ef. 5:2; 1 Te. 4:​9, 10) Long olgeta de yumi traim long luksave long sampela hevi long sindaun bilong ol narapela na kwiktaim helpim ol, maski dispela i givim sampela hatwok long yumi. Yumi laik givim sampela samting bilong yumi long ol​—olsem taim bilong yumi, mani samting, save yumi bin kisim, na gutpela tingting. Jehova i tokim yumi pinis, taim yumi givim ol samting long ol narapela, em yet bai givim ol samting long yumi.​—Snd. 11:25; Lu. 6:38.

Mekim Wok Holi “Long San na Long Nait”

Yu ting yumi inap tru long mekim wok holi bilong Jehova “long san na long nait”? Yes, yumi inap mekim sapos yumi wok strong long mekim olgeta hap wok insait long lotu bilong yumi, na yumi mekim long olgeta taim. (Ap. 20:31) Yumi ken bisi long mekim ol wok holi long rot bilong ritim Tok Bilong God long olgeta de na tingim tingim long bel, na beten oltaim, na wok strong long go long olgeta miting, na oltaim yumi painim rot bilong autim tok long ol man.​—Sng. 1:2; Lu. 2:37; Ap. 4:20; 1 Te. 3:10; 5:17.

Olsem wanem? Yumi insait long ol dispela wok holi bilong Jehova? Sapos olsem, orait laik bilong yumi long mekim ol samting em i laikim bambai em inap bekim tok long Satan, em bai kamap ples klia long olgeta samting yumi mekim long olgeta wan wan de. Yumi wok strong long givim biknem long Jehova long olgeta samting yumi mekim na long olgeta samting i kamap long laip bilong yumi. Yumi larim ol stiatok bilong em i bosim toktok na pasin bilong yumi na i helpim yumi long wokim ol disisen. Long rot bilong bilip tru long Jehova na givim strong bilong yumi long mekim wok bilong em, yumi kamapim olsem yumi pilim tru pasin bilong em long tingim tru yumi na helpim yumi. Taim sin i mekim na yumi popaia na yumi no bihainim gut ol lo bilong em, yumi amamas long kisim ol skultok na tok kaunsel bilong helpim yumi.​—Sng. 32:5; 119:97; Snd. 3:​25, 26; Kl. 3:17; Hi. 6:​11, 12.

Long olgeta wan wan de yumi mas wok yet long mekim ol samting bilong givim biknem long God. Sapos yumi mekim olsem, bai yumi kisim nupela strong na Papa bilong yumi long heven bai lukautim gut yumi i go inap oltaim oltaim.​—Mt. 11:29; KTH 7:16.

[Blok/Ol Piksa long pes 22]

Ol Wok God i Givim Long Yumi

• Beten long olgeta taim.​—Ro. 12:12.

• Ritim na stadi long Baibel, na bihainim ol tok bilong en long laip bilong yumi.​—Sng. 1:2; 1 Ti. 4:15.

• Lotuim Jehova insait long kongrigesen.​—Sng. 35:18; Hi. 10:​24, 25.

• Lukautim famili long ol samting bilong skin, bilong spirit, na strongim bel na tingting bilong ol.​—1 Ti. 5:8.

• Autim gutnius bilong Kingdom, na kamapim ol disaipel.​—Mt. 24:14; 28:​19, 20.

• Mekim ol samting bilong helpim yumi yet long i stap strong long skin na long spirit na long bel na tingting, na stretim rot bilong kisim ol gutpela amamas tu.​—Mk. 6:31; 2 Ko. 7:1; 1 Ti. 4:​8, 16.

• Lukautim gut ol wok insait long kongrigesen.​—Ap. 20:28; 1 Ti. 3:1.

• Stretim gut ol samting long haus na Haus Kingdom.​—1 Ko. 10:32.

[Blok/Piksa long pes 23]

Soim Olsem Yu Tingim Ol

• Lapun brata o sista.​—Wkp. 19:32.

• Wanpela i gat sik o sik bilong bel hevi.​—Snd. 14:21.

• Wanpela long kongrigesen i sot tru long samting em yu inap givim long em.​—Ro. 12:13.

• Wanpela insait long famili bilong yu.​—1 Ti. 5:​4, 8.

• Wanpela wanbilip em poroman marit bilong em i dai pinis.​—1 Ti. 5:9.

• Wanpela elda husat i save wok hat insait long kongrigesen bilong yu.​—1 Te. 5:​12, 13; 1 Ti. 5:17.