Gretiuesen Bilong Klas 127 Bilong Gileat
Ol i Salim Ol Misineri i Go “Long Olgeta Hap Bilong Graun”
JISAS i tokim ol disaipel bilong em long mekim wok witnes “long olgeta hap bilong graun.” (Aposel 1:8) Ol Witnes Bilong Jehova i strong long bihainim dispela tok.
Insait long 65 yia i go pinis, ol misineri husat i bin skul long Wastaua Baibel Skul Bilong Gileat i bin helpim wok autim tok i go bikpela long winim 200 kantri. Long Sarere, Septemba 12, 2009, inap 56 man na meri moa husat i gat save long mekim wok autim tok, ol i gretiuet bihain long ol i bin skul inap 5-pela mun long skul bilong ol misineri long Patterson, New York, Amerika.
Tingting Bilong Yu Inap Helpim o Nogutim Yu
Stephen Lett, em memba bilong Gavening Bodi Bilong Ol Witnes Bilong Jehova na siaman bilong gretiuesen program, em i mekim tok long ol sumatin na tim bilong tok em “Mekim Gutpela Wok Long Tingting Bilong Yu.” Pastaim em i mekim tok lukaut long 4-pela samting em ol sumatin i no ken tingting long en. Tripela poin em olsem: (1) No ken ting olsem ol samting bilong skin bai banisim yu long ol hevi; (2) abrusim pasin bilong tingting long pasin pamuk; na (3) no ken wari tumas na tingting long ol hevi em ol inap kamap long tumora. (Sindaun 18:11; Matyu 5:28; 6:34) Long namba 3 poin, brata i tok man bilong tingting planti i save bungim hevi bilong asde wantaim hevi bilong tete, na kisim hevi bilong tumora na bungim wantaim hevi bilong tete. Brata Lett i tok: “Dispela em i bikpela hevi tru bilong karim.” Namba 4 poin em wanem? Ol sumatin i no ken ting olsem laip bilong ol i bin gutpela moa paslain long ol i kamap misineri. Sapos ol i mekim olsem, ol bai no kisim amamas long ol gutpela samting i stap long ol hap ol bai i go long en.
Brata Lett i strongim ol sumatin long mekim gutpela wok long tingting bilong ol. Em i tok: (1) Luksave long ol samting inap bagarapim yu long ol samting bilong spirit na skin, na abrusim hevi; (2) taim yu ritim Baibel, piksaim long tingting ol samting i kamap, na tingim olsem yu stap insait long dispela stori; (3) tingting olsem olgeta manmeri yu bai toktok wantaim ol long nupela asainmen bilong yu, ol inap kamap man i lotu long Jehova; na (4) kisim pasin bilong pilim hevi bilong man na tingim olsem yu karim wankain hevi olsem em.—Sindaun 22:3.
Wok Bilong Skulim Ol Narapela i Bikpela Samting
David Splane, wanpela memba bilong Gavening Bodi, em i mekim tok, “Dispela Yu Mas Givim Long Ol Man i Save Holim Strong Tok Bilong God,” na 2 Timoti 2:2 i as bilong dispela tok. Taim aposel Pol i tokim Timoti long skulim ol gutpela brata, Pol i laik bai Timoti i skulim ol dispela man long tok i tru, na kirapim ol tu long skulim ol narapela. Brata Splane i tokim ol sumatin olsem i mas i gat planti brata moa bilong go pas long mekim ol wok Kristen. Long wanem taim na olsem wanem bai yumi skulim ol dispela brata? Brata Splane i strongim ol sumatin long kirap skulim ol dispela man long namba wan taim ol i stadi wantaim ol long Baibel.
Olsem wanem ol misineri inap skulim ol Baibel sumatin bilong kamap gutpela piksa ol narapela i ken bihainim? Brata Splane i kolim sampela rot. Ol misineri i mas skulim ol Baibel sumatin long redim gut stadi bilong ol yet. Taim ol Baibel sumatin i kirap long kam long ol miting bilong kongrigesen, ol i mas lain long pasin bilong redim ol buk na nius bilong Baibel em ol bai skelim long ol miting. Em i tok: “Sapos man yet i no inap stadi long Baibel, orait em i no inap tru long skulim ol narapela.” Brata Splane i tok tu olsem ol misineri inap helpim ol nupela man long kam long taim stret, givim mani bilong helpim wok autim tok, na bihainim tok bilong ol brata i go pas long mekim wok. Em i tok nambawan gutpela rot bilong skulim ol narapela long ol dispela samting, em ol yet i mas i stap olsem gutpela piksa.
Em Gutpela Samting Long Stap Olsem Man Bilong Autim Tok
Guy Pierce, em tu i wanpela bilong Gavening Bodi, na em i mekim tok “Yupela Bai i Autim Tok Bilong Mi,” na tok bilong Jisas long Aposel 1:8 i as bilong tok bilong en. Em i tokim ol sumatin olsem long taim bilong ol aposel, lain Israel i no inap i stap moa olsem witnes bilong Jehova. Jehova i givim dispela gutpela wok long lain i kamapim kaikai bilong Kingdom. (Matyu 21:43) Dispela lain em kongrigesen bilong ol Kristen God i bin makim. Brata Pierce i kamapim tok bilong aposel Pita, olsem dispela ‘lain manmeri holi’ bilong ol Kristen God i bin makim, ol bai tokaut long olgeta hap long ol gutpela pasin bilong Jehova. (1 Pita 2:6-9) So Jisas i no tok ol Kristen bai stap olsem ol witnes bilong em tasol na i no witnes bilong Jehova. Nogat. Baibel i kolim Jisas olsem “man bilong autim stret olgeta tok bilong God.” (KTH 1:5; 3:14) Em i nambawan Witnes Bilong Jehova na yumi laik bihainim pasin bilong em.—1 Pita 2:21.
Brata Pierce i tokim ol sumatin olsem long nau tok bilong Jisas long Aposel 1:8 i gat bikpela mining moa. Bilong wanem? Truim bilong bikpela samting bilong tok profet i stap long Kamapim Tok Hait 11:15 i kamap pinis! Kingdom Bilong God long han bilong Mesaia i kamap pinis. Tru tumas, long nau wok bilong autim tok i kamap “long olgeta hap bilong graun.” (Aposel 1:8) Brata Pierce i kamapim klia olsem ol misineri bai autim tok bilong Jehova na Kingdom bilong em, ol i no autim tok long sindaun bilong ol long bipo, kalsa, na kantri bilong ol, nogat. Em i strongim ol sumatin long skulim “planti man tru insait long dispela hap taim i stap yet.”
Ol Narapela Bikpela Tok Bilong Program
Alex Reinmueller, em wanpela helpim bilong Komiti Bilong Wokim Ol Buk Samting, em i mekim tok “Jehova Bai Strongim Yupela.” Em i tok, sapos ol misineri i bilip long strong bilong Jehova, Em bai helpim ol long luksave long strong bilong ol yet, ol samting ol i no strong long en, ol samting ol i pret long en, na long mekim gut moa wok bilong God.
Tupela tisa bilong Dipatmen Bilong Ol Skul Tiokratik, Sam Roberson na William Samuelson, ol tu i mekim tok long ol sumatin. Brata Roberson i mekim tok “Mi Stap Wantaim Yupela,” em Aisaia 41:10 i as bilong dispela tok. Em i tok ol misineri bai kisim planti amamas. Ol bai i gat ol hevi tu. Ol i ken karim ol dispela hevi sapos ol i bihainim pasin bilong King Devit, husat i krai na beten long gutpela Papa bilong em. (Song 34:4, 6, 17, 19) Tok bilong Brata Samuelson i kamapim klia olsem em i bikpela samting long wok yet long kisim pasin bilong wokim gut tingting. Ol misineri husat i mekim olsem, ol i no save kisim tingting nogut taim wanpela i mekim tok i no stret long ol, na ol i no hariap long bel nogut long narapela.—Sindaun 2:10, 11.
Jim Mantz, wanpela helpim bilong Komiti Bilong Raitim Tok, em i inteviuim memba bilong Brens Komiti bilong Ripablik Bilong Jojia na bilong Honduras, na memba bilong Kantri Komiti bilong Ripablik Bilong Tajikistan. Ol dispela brata i givim skultok long ol misineri long olsem wanem ol inap kamap pren bilong ol man i birua, em long rot bilong “mekim gutpela pasin na bai [ol i] daunim pasin nogut.” (Rom 12:21) Mark Noumair, narapela tisa bilong skul, i toktok wantaim ol sumatin long ol ekspiriens ol i bin kisim long wok autim tok long taim ol i stap long Skul Gileat. Nem bilong dispela tok em, “Yu Laik Mi Helpim Yu?”
Siaman i pinisim program long rot bilong kamapim tok bilong nupela singsing “Piksaim Yu Yet Long Nupela Taim.” Inap 6,509 manmeri i stap long dispela bung, na nau ol i strong moa long autim tok bilong Jehova na Pikinini bilong em “long olgeta hap bilong graun.”
[Chart/Map on page 31]
OL SAMTING BILONG OL SUMATIN
8 kantri ol i kam long en
56 sumatin
28 ol marit
33.6 averes krismas
18.3 averes yia ol i baptais
13.6 averes yia long fultaim sevis
[Mep]
(Bilong save ol dispela rait i stap we long pes, lukim buk o magasin)
Ol i makim ol sumatin long i go long 22 kantri i stap daunbilo
OL KANTRI OL I SALIM OL I GO LONG EN
JAMEKA
NIKARAGUA
KOSTA RIKA
PANAMA
PERU
SILI
HAITI
KURASO
GAIANA
KOT DIWA
BOLIVIA
PARAGWAI
SERBIA
ALBENIA
KONGO, RIP. DEM.
MOLDOVA
YUGANDA
BARUNDI
TANSANIA
MOSAMBIK
NEPAL
KAMBODIA
[Piksa long pes 31]
Klas Namba 127 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba 1 lain i sanap paslain, na namba 7 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.