Gretiuesen Bilong Klas 129 Bilong Gileat
“Dispela Em De Bilong Yupela”
LONG Septemba 11, 2010, klostu 8,000 manmeri i bung long wanpela bikpela bung—em gretiuesen bilong klas 129 bilong Wastaua Baibel Skul Bilong Gileat. Samuel Herd, em bilong lain Gavening Bodi Bilong Ol Witnes Bilong Jehova, i tokim ol sumatin: “Dispela em de bilong yupela. Mipela i bung bilong amamas wantaim yupela!”
“Yau Bilong Harim Toktok”
Bilong kirapim program, Brata Herd i stori olsem olgeta Kristen i mas putim gut ‘yau bilong harim toktok,’ na ol inap mekim olsem long rot bilong skelim na tingim gut Tok Bilong God. (Sindaun 20:12) Brata Herd i tokim ol sumatin: “Insait long sampela mun i go pinis yupela i bin putim gut yau long Jehova, na yupela bai mekim olsem yet i go inap oltaim oltaim.”
Olsem wanem ol nupela misineri i ken mekim gutpela wok long yau bilong ol? Brata Herd i tok: “Ol i mas putim gut yau long Tok Bilong God.” Em i tok moa olsem: “Planti tok bai kamap tude long program bilong helpim yupela long mekim wok bilong yupela olsem misineri long ol yia i kam.”
“Bilip Strong Long Jehova Long Bel Olgeta”
Gerrit Lösch, wanpela memba bilong lain Gavening Bodi, em i tokim ol sumatin long dispela tok i kirapim tru tingting. Em i stori long planti samting i bin kamap we ol manmeri bilong God long bipo na long nau tu ol i soim klia olsem ol i bilip strong long Jehova.
Brata Lösch i kamapim olsem “taim ol misineri i kisim ol asainmen bilong ol, ol tu i mas soim klia olsem ol i bilip strong long Jehova.” Em i tok: “Ating yupela bai tingting planti olsem, ‘Mi bai inap long lainim nupela tokples? Mi bai inap lain long ol pasin bilong ples? Mi bai inap long winim pasin bilong misim tru famili na ples bilong mi?’ ” Wanem bekim bilong ol dispela askim? Brata Lösch i kirapim ol sumatin long “bilip strong long Jehova.”
Na tu, Brata Lösch i ritim Sindaun 14:26: “Sapos man i aninit long Bikpela, em bai i sanap strong na i no ken pret long wanpela samting.” Bilip bilong yumi long Jehova bai kamap strong moa sapos yumi tingim gen ol gutpela samting Jehova i bin mekim bilong helpim yumi.
Baibel i tok olsem man i bilip strong long Jehova “em i olsem gutpela diwai ol i bin planim klostu long wara. Ol rop bilong dispela diwai i go daun na kisim wara. Long taim bilong bikpela san, dispela diwai i no save pret. Nogat. Lip bilong en i stap grin oltaim.”—Jeremaia 17:7, 8.
Em nau, skul yumi kisim em i klia tru. Brata Lösch i tok: “Maski wanem samting bai painim yupela long bihain, yupela i mas bilip strong long Jehova.”
“Bihainim Pasin Bilong Ol Gutpela Ensel”
Dispela em i tim bilong tok bilong Stephen Lett, wanpela memba bilong lain Gavening Bodi. Ol ensel i stap gutpela piksa long yumi. Brata Lett i tok: “Olgeta samting em Baibel i stori long en long ol ensel, em i gutpela long yumi bihainim.” Orait nau em i stori long fopela pasin bilong ol gutpela ensel we i gutpela long yumi bihainim—pasin bilong i no les kwik, pasin daun, pasin bilong helpim gut ol narapela, na pasin bilong i stap gut long God.
Baibel i stori olsem inap 21 de wanpela ensel i pasim “ensel i save lukautim kantri Persia”—em wanpela strongpela spirit nogut. (Daniel 10:13) Dispela ensel i kamapim pasin bilong i no les kwik. Brata Lett i tok, ol Kristen tu ol i gat “pait wantaim . . . ol spirit nogut i stap antap.” (Efesus 6:12) Em i tokim ol sumatin, “yupela i mas wok strong tru bambai yupela i ken mekim yet wok bilong yupela.”
Taim Manoa, em papa bilong Samson, i askim wanpela ensel long nem bilong em, ensel i no laik tokim em. Dispela ensel i kamapim tru pasin daun. (Hetman 13:17, 18) Brata Lett i tokim ol sumatin: “Taim wanpela i laik litimapim nem bilong yupela o i stori planti long gutpela save bilong yupela, long pasin daun yupela i mas stiaim tingting bilong ol i go long Jehova na oganaisesen bilong em.”—1 Korin 4:7.
Taim Jisas i stap long gaden Getsemani paslain liklik long em i dai, “wanpela ensel i kam long heven na strongim em.” (Luk 22:43) Dispela ensel i gat pasin bilong helpim gut ol narapela. Brata Lett i tok: “Beten askim Jehova long helpim yupela long luksave long ol samting yupela inap mekim bilong helpim ol manmeri i stap long hap yupela i mekim wok misineri long en. Orait, long rot bilong helpim yupela i kisim long Jehova, wok strong long helpim ol.”
Sampela ensel tasol i bin joinim Satan na bikhet long God, olsem na yumi ken tok planti bilong ol ensel i gat pasin bilong i stap gut long God.—Revelesen 12:4.
Brata Lett i tokim ol sumatin: “Wankain olsem ol dispela gutpela ensel, yupela tu i mas sakim Satan. Yupela i mas sakim em, na em bai lusim yupela na ranawe.”—Jems 4:7.
Tripela Tok Moa Bilong Program
“Larim Jehova i Stap Olsem Strong Bilong Yupela.” Gary Breaux, wanpela memba bilong Brens Komiti bilong Amerika i mekim dispela tok i kam long Song 73:26. Em i kirapim ol sumatin long bilip strong na wetim Jehova i helpim ol. Olsem wanem Jehova inap i stap olsem strong bilong ol? Brata Breaux i tok: “Olsem wanpela strongpela ston i mekim na win i no inap karim pepa i go, olsem tasol Jehova inap strongim tru bel bilong yupela na bai ol wari i no ken daunim yupela.” Tru, bel inap giamanim yumi taim ol hevi i kamap na i traim pasin bilong yumi long sanap strong. (Jeremaia 17:9) Taim yupela i go long nupela asainmen, ples bai i hat o kol, i gat ol nupela kaikai, na ol nupela poroman long haus misineri—olgeta dispela samting inap mekim na yupela inap kisim tingting long lusim wok. Brata Breaux i tok: “Ol samting bai kamap we i gat narapela narapela rot yupela inap bihainim na yupela i mas mekim ol gutpela disisen. Bai yupela i makim rot em Jehova i amamas long en? Sapos yupela i mekim olsem, Jehova bai stap olsem strong bilong yupela. Em bai stiaim wokabaut bilong yupela.”
“Yu Gat Strongpela Bilip Inap Long Yu Ken Putim Lek i Go Daun Long Wara?” Sam Roberson, wanpela tisa bilong Skul Gileat, em i stori long dispela tok i kam long Josua sapta 3. Olsem wanem planti milion Israel inap brukim wara Jordan long taim wara i tait? Jehova i tokim Josua long tokim ol pris long “sanap insait long wara.” God i tok promis olsem: “Taim ol [pris] i putim lek i go daun long wara, bai wara i pas olgeta na i no moa ran long hap ol i laik wokabaut long en. Long wanem, wara i ran i kam daun bai i solap i go bek na i stap olsem wanpela maunten.” (Josua 3:8, 13) Brata Roberson i tokim ol sumatin: “Sampela samting bai kamap long laip bilong yupela na bai i stap olsem wara Jordan na em inap pasim yupela long kisim ol gutpela blesing sapos yupela yet i larim dispela samting i kamap.” Olsem: Ating bai yupela i hatwok long stap gut wantaim ol wanwok misineri. Wanem samting inap helpim yupela? Brata Roberson i tok: “Tingim wok na no ken tingim ol wokman. Sapos yu soim olsem yu gat strongpela bilip inap long yu ken putim lek i go daun long wara, Jehova bai helpim yu long winim ol hevi i stap olsem wara Jordan na i laik pasim rot bilong yu long mekim wok misineri.”
“Mekim Ol Samting i Kamap Gutpela.” William Samuelson, wanpela tisa bilong Skul Gileat, em i stori long dispela tok. Tok bilong em i kam long Sindaun 16:3: “Olgeta samting yu laik mekim, em yu mas putim long han bilong Bikpela. Na em bai i mekim ol dispela samting i kamap gutpela.” Brata Samuelson i askim ol sumatin: “Yupela i ting dispela ves i makim olsem yupela i no mas wok strong long mekim ol samting i kamap gutpela, na yupela i ken putim tasol ol samting long han bilong Jehova?” Em i tok, nogat, long wanem, Sindaun 16:1 i tok: “Yumi save tingting long mekim ol samting.” Brata Samuelson i tok: “Jehova i no save wokim ol mirakel na kirapim tingting bilong yupela long mekim ol samting, nogat. Yupela yet i mas redim tingting bilong yupela long mekim ol samting i stret. Olsem: Long rot bilong stadi, beten, na bihainim gut ol tok i kam long brens ofis, bel bilong yupela bai wok yet long stiaim yupela long mekim gutpela wok, na Jehova bai helpim yupela.”
Ol Ekspiriens na Ol Inteviu
Ol sumatin bilong Gileat i save autim tok wantaim ol kongrigesen bilong ol Witnes Bilong Jehova, na dispela em i hap bilong skul ol i kisim. Mark Noumair, wanpela tisa bilong Skul Gileat, em i inteviuim sampela sumatin long stori long ol ekspiriens ol i bin kisim. Ol ekspiriens i kamapim klia olsem beten i bin helpim ol long painim ol man i gat gutpela bel long teritori.
Olsem: Tupela marit i kaikai long wanpela haus kaikai. Wanpela wokman i lukim tupela i beten. Em i kam klostu long ol na i askim ol sapos ol i Witnes Bilong Jehova. Taim em i kisim save olsem ol i Witnes, em i tokaut olsem em i bin kamap bikpela olsem wanpela Witnes, tasol bihain em i lusim bilip. Na tu, em i bin mekim pasin raskol na em i kalabus. Nau dispela yangpela man i laik lotu gen long Jehova. Na tu, em i tok, paslain long tupela marit i kam long haus kaikai, em i beten long God, na tokaut olsem em i laik kisim helpim bilong stretim gen laip bilong em. Jehova i harim beten bilong em!
Rudi Hartl, wanpela memba bilong Dipatmen Bilong Raitim Ol Pas, em i mekim tok “Traim na Yupela Bai Save Olsem Jehova i Gutpela Tru.” Em i inteviuim Wayne Wridgway bilong Mosambik, Jason Reed bilong Sili, na Kenji Chichii bilong Nepal. Olgeta tripela brata i bin go long Skul Gileat na ol i save mekim wok misineri. Ol i tokaut klia long sampela hatwok ol i bin kisim taim ol i kirap nupela long mekim wok misineri—olsem lainim nupela tokples, lain long ol pasin bilong ples, na karim bel hevi bilong stap longwe long famili na ples. Brata Chichii i tok: “Wanpela samting i helpim mipela em long kisim kwik ol pren insait long nupela kongrigesen. Taim mipela i pas gut wantaim kongrigesen, dispela i helpim mipela long daunim bel hevi bilong lusim famili na ples.”
Ol 56 sumatin i kisim ol diploma pinis, orait nau wanpela sumatin i ritim wanpela gutpela pas bilong kamapim amamas bilong klas. Wanpela hap bilong dispela pas i mekim tok i go long lain Gavening Bodi olsem: “Mipela i lukim olsem yupela i bin wok strong na mekim gutpela pasin sori bilong helpim mipela. Yupela i bin redim gut program bilong skul, kam lukim ol sumatin, na givim gutpela skul bilong Baibel long mipela. Yupela i mekim gutpela pasin laikim long mipela, olsem na mipela tu i laik wok strong tru long bihainim pasin laikim bilong yupela, na no ken les kwik, mekim pasin daun, na soim olsem mipela i tingim tru ol narapela taim mipela i kamap long ples wok bilong mipela olsem misineri.”
[Rait long pes 28]
“Taim wanpela i laik litimapim nem bilong yupela . . . yupela i mas stiaim tingting bilong ol i go long Jehova na oganaisesen bilong em”
[Rait long pes 29]
“Sampela samting bai kamap long laip bilong yupela na bai i stap olsem wara Jordan”
[Sat/Mep long pes 31]
OL SAMTING BILONG OL SUMATIN
9 kantri ol i kam long en
56 sumatin
28 ol marit
33.0 averes krismas
17.9 averes yia ol i baptais
13.3 averes yia long fultaim sevis
[Mep]
(Bilong save ol dispela rait i stap we long pes, lukim buk o magasin)
Ol i makim ol sumatin long i go long 25 kantri i stap daunbilo
OL KANTRI OL I SALIM OL I GO LONG EN
BOLIVIA
BOTSWANA
BALGERIA
KONGO (KINSHASA)
KOT DIWA
GAMBIA
JEMANI
INDIA
INDONESIA
KENYA
LAIBIRIA
MASEDONIA
MADAGASKA
MALESIA
MOSAMBIK
PANAMA
PERU
POLAN
ROMENIA
SERBIA
SIERA LEON
SWASILAN
TANSANIA
YUGANDA
SIMBABWE
[Piksa long pes 30]
Ol sumatin bilong Gileat i mekim soim long wanpela ekspiriens bilong ol long wok autim tok
[Piksa long pes 31]
Klas Namba 129 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba 1 lain i sanap paslain, na namba 7 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.
(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.
(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.
(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.
(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.
(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.
(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.