Gretiuesen Bilong Klas 128 Bilong Gileat
Ol i Salim Ol Misineri Bilong ‘Kamapim Disaipel’
“BILONG olgeta lain man i ken harim gutnius, sampela Kristen i mas redi long lusim famili na ples bilong ol na go autim gutnius long narapela kantri.” Long dispela tok, David Splane, em bilong lain Gavening Bodi Bilong Ol Witnes Bilong Jehova, i redim tingting bilong odiens long dispela bikpela bung.
Long Mas 13, 2010, klostu 8,000 manmeri i bung long gretiuesen bilong klas 128 bilong Wastaua Baibel Skul Bilong Gileat. Ol pren, famili, na visita bilong 27 kantri i kam bilong harim program.
“Ol Disaipel i No Inap Stap Tasol Long Haus”
Siaman bilong program, Brata Splane, i kirapim tok bilong program long rot bilong stori long tok bilong Jisas, olsem: “Yupela i mas i go mekim olgeta lain manmeri i kamap disaipel bilong mi.” (Matyu 28:19, 20) Em i kamapim klia olsem Jisas i bin salim ol disaipel bilong em i go long ol manmeri. Tru, long Pentikos 33 C.E., sampela manmeri bilong Mesopotemia, Not Afrika, na planti narapela hap em ol Rom i bosim, ol i kam long Jerusalem bilong harim gutnius. Tasol maski i olsem, Brata Splane i tok, “ol disaipel i no inap stap tasol long haus na wetim ol manmeri bilong ol narapela lain i kam long ol, nogat. Ol i mas i go long olgeta hap bilong graun na autim tok long ol manmeri.”—Aposel 1:8.
Brata Splane i tok: “Jisas i tokim ol disaipel long ol samting ol i mas mekim, na tu, em i skulim ol long rot bilong mekim olsem. Em i tokim ol long beten, na tu, em i skulim ol long pasin bilong beten. Em i tokim ol long autim tok, na tu, em i soim ol long pasin bilong autim tok. Em i tokim ol long mekim gutpela wok tisa, na tu, em i soim ol long pasin bilong mekim gut wok tisa.”
Nau siaman i toktok long ol papamama bilong ol sumatin i winim skul, na em i kamapim tok Jisas i bin mekim long ol disaipel, olsem: “Harim. Mi save stap wantaim yupela olgeta de, i go inap long dispela taim i pinis.” (Matyu 28:20) Brata Splane i tokim odiens olsem Jisas bai wok yet long lukautim ol sumatin long ol kantri ol bai go long en bilong mekim wok.
“Yu Go na Amamas”
Anthony Morris bilong lain Gavening Bodi i kirapim ol sumatin long go na “amamas.” Em i tok, i gat ol amamas i gutpela na ol amamas i no stret, olsem man i hambak. Man i hambak i save mekim ol samting bilong litimapim nem bilong em yet. Namba 1 Korin 1:31 i stori long amamas i gutpela, olsem: “Man i laik amamas, em i mas amamas long Bikpela tasol.” Brata Morris i tok: “Samting bilong amamas long en, em long kisim stretpela save long God Jehova. Tru tumas, bikpela amamas bilong yu—na bilong mi tu—em long holim nem holi, na stap wanpela Witnes Bilong Jehova.”—Jeremaia 9:24.
Orait nau, long rot bilong ekspiriens bilong wanpela misineri long Afrika, brata i stori olsem em i bikpela samting long tokaut long nem bilong Jehova. Dispela misineri na meri bilong em, ol i bin draiv i go bilong brata bai mekim wanpela tok bilong Baibel. Long wanpela hap bilong sekim ol ka, wanpela yangpela soldia i poinim gan long brata na i askim em long em i husat. Meri bilong em i tingim samting em i bin lainim long Skul Gileat, na em i tok isi long brata olsem: “Tokim em olsem yu wanpela Witnes Bilong Jehova, na yu laik i go bilong mekim wanpela tok bilong Baibel.” Brata i bihainim tok bilong meri bilong em, na ol i larim tupela i go. Long de bihain, tupela i harim long redio olsem presiden bilong kantri i bin tokim ol soldia long putim was long sampela kilman em ol i tok ol i misineri! Tupela i bin tok olsem ol i Witnes Bilong Jehova na ol i no tok ol i misineri, na dispela i helpim ol long abrusim planti hevi. Brata Morris i pinisim tok bilong em olsem: “Taim yu kamap long ples bilong mekim wok misineri, yu go na amamas. Amamas long olgeta samting Jehova bai mekim long rot bilong yu long litimapim nem bilong em inap oltaim oltaim.”
“Bai Yu Inapim Tru Wok Bilong Yu?”
Geoffrey Jackson, bipo em i wanpela misineri na em i bilong lain Gavening Bodi, em i helpim ol sumatin long tingim dispela askim. Em i askim, “Taim yumi kolim wanpela olsem misineri, wanem insait bilong dispela tok?” Em i kamapim klia olsem dispela tok “misineri” i kam long wanpela tok Latin na i makim wanpela man o wanpela lain em ol i kisim wanpela spesel wok. Yumi ol Witnes Bilong Jehova i gat wok bilong autim gutnius na helpim ol man long ol samting bilong lotu. Yumi mekim dispela wok long rot bilong bihainim pasin bilong Jisas Krais; long olgeta taim em i bin tingim dispela wok em i mas mekim long graun. Jisas i tokim Gavena Bilong Rom, Pontius Pailat, olsem: “Mi kam long dispela graun bilong mekim wanpela wok tasol, em bilong autim tok tru.”—Jon 18:37.
Brata i helpim ol sumatin long tingim stori bilong Baibel long pait bilong Jeriko. Inap 6-pela de, ol soldia bilong Israel i mas kirap kwiktaim long moning, putim ol klos pait, na mats raunim Jeriko na bihain go bek long ples bilong ol. Brata i tok: “Long tingting bilong ol man, dispela em i wanpela narapela kain wok.” Em i tok, sampela soldia inap ting, ‘Yumi westim nating taim.’ Long namba 7 de, God i tokim ol Israel long raunim taun inap 7-pela taim na bihain ol i mas mekim wanpela strongpela singaut bilong pait. Wanem samting i kamap long dispela? Ol banis bilong Jeriko i pundaun!—Josua 6:13-15, 20.
Long dispela stori bilong Jeriko, Brata Jackson i kamapim 4-pela bikpela poin. (1) Pasin bilong bihainim tok em i bikpela samting. Yumi mas mekim ol samting long rot Jehova i makim, na yumi no ken ting rot yumi yet i makim i gutpela moa. (2) Bilip strong long Jehova. “Ol Israel i bilip long God, . . . na banis i pundaun,” na i no long rot bilong ol masin samting bilong brukim banis. (Hibru 11:30) (3) Yumi no ken les kwik. Bihain Jehova bai givim ol “gutpela samting” long yupela. (Lo 28:2) (4) No ken givap. No ken lusim tingting long wok bilong yu. Brata Jackson i pinisim tok bilong em olsem: “Sapos yu holim strong long tingting ol dispela bikpela poin, orait yu bai inapim tru wok bilong yu long litimapim nem bilong Jehova na givim glori long em.”
Sampela Bikpela Tok Moa Bilong Program
“Laikim Tru Baibel na Man i As Bilong Ol Tok Bilong En.” Brata Maxwell Lloyd, em wanpela memba bilong Brens Komiti bilong Amerika, i mekim dispela tok. Em i tokim ol sumatin olsem: “Long tingting bilong yupela, Baibel i mas i stap olsem wanpela buk i gat laip.” Orait nau em i mekim dispela tok bilong strongim ol: No ken larim pasin bilong yupela long laikim tru God Jehova i stap nating. No ken kisim tingting olsem olgeta man i kliagut long ol tok yu skulim ol long en. Lain long kamapim klia insait bilong ol tok i tru bilong Baibel bambai yu ken putim tok i go daun long bel bilong ol sumatin bilong yu. Mekim pasin daun. No ken mekim olsem save bilong yu i win tru. Stap gutpela piksa na dispela bai skulim ol. Em i gutpela long sumatin bilong yu i luksave olsem yu laikim tru ol tok bilong Baibel.
“Kisim Pasin Bilong Ol Kotkot.” Michael Burnett, em i wanpela tisa bilong klas na bipo em i wanpela misineri, i mekim dispela tok. Em i tok, sampela taim bai yumi wari. Tasol tingim tok bilong Jisas: “Yupela tingim ol kotkot. Ol i no save planim kaikai na ol i no save bungim kaikai. . . . Tasol God i save givim kaikai long ol.” (Luk 12:24) Kontrak bilong Lo i tok ol kotkot i no klin, na ol man i no ken kaikai. Ol man i mas tingim ol dispela pisin olsem samting nogut. (Wok Pris 11:13-19) Maski ol i samting nogut long ai bilong ol man, God i save givim kaikai long ol. Brata Burnett i tok: “Olsem na sapos bihain wanpela bikpela hevi i kamap long yupela na dispela i mekim yupela i wari, tingim ol kotkot. Sapos God i lukautim wanpela pisin i no klin, yupela i ken save olsem em bai lukautim gut yupela.”
“Mi No Mekim Rong Long Yu.” Mark Noumair, em narapela tisa bilong Skul Gileat, i helpim olgeta long odiens long tingim tok piksa bilong Jisas long ol wokman bilong gaden wain. Sampela wokman i wok hat long de olgeta. Ol narapela i wok wanpela aua tasol. Maski i olsem, olgeta i kisim wankain pe! Ol man i wok inap longpela taim ol i tok kros. Papa bilong gaden wain i tokim ol man i bel nogut na kros, olsem: “Mi no mekim rong long yu. Ating pastaim mitupela i bin orait long mak bilong wan kina, o nogat? Yu kisim pe bilong yu na yu go.” (Matyu 20:13, 14) Yumi kisim wanem skul long dispela? No ken skelim yu yet wantaim ol narapela. Brata Noumair i tok: “Pasin bilong skelim yu yet wantaim ol narapela, dispela inap pinisim amamas bilong yu. Na samting i nogut moa yet, dispela inap mekim na yu lusim wok bilong yu—em wanpela gutpela wok tru yu holim.” Brata i tokim ol sumatin olsem Jisas em i bosim dispela wok bilong bungim ol manmeri long taim bilong yumi, na wanem pasin em i laik mekim long ol disaipel bilong em, dispela i samting bilong em yet. Sapos Jehova na Jisas i laik mekim sampela samting moa bilong helpim ol narapela man, orait tupela i no mekim rong long yu. Tingim tasol wok yu holim, na no ken larim ol samting i kamap long wok bilong ol narapela i pulim tingting bilong yu na yu no givim bel long wok Jehova i bin givim long yu.
Ol Ekspiriens na Ol Inteviu
Taim ol sumatin bilong Gileat i no stap long skul o i no mekim homwok, ol i save joinim ol kongrigesen bilong ol Witnes Bilong Jehova na insait long wok autim tok. Sam Roberson, wanpela tisa bilong Skul Gileat, em i inteviuim sampela sumatin long kamapim ol ekspiriens bilong ol. Olsem, Sista Alessandra Kirchler, i bungim wanpela meri husat i wari tru long pasin bilong pikinini man bilong em long smok. Alessandra i go bek lukim dispela meri na em i bringim Awake! i stori long pasin bilong smok. No gat man i stap long haus, tasol em i lusim nius long haus. Bihain, Alessandra i bungim dispela meri i stap long haus na meri i singautim em i go insait long haus. Dispela meri i amamas long stori bilong nius na i tok: “Mi save tingting, God i laik skulim mi long wanem samting na em i givim ol hevi long mi.” Alessandra i soim em long Baibel olsem God i no as bilong ol samting nogut i save kamap long yumi. (Jems 1:13) Nau dispela meri na pikinini man bilong em, tupela wantaim i stadi long Baibel.
Melvin Jones bilong Dipatmen Bilong Wok Autim Tok i inteviuim 3-pela brata em bipo ol i winim Skul Gileat: Jon Sommerud, em i mekim wok misineri long Albenia; Mark Anderson, em i mekim wok long Kenya; na James Hinderer, em i mekim wok long Dipatmen Bilong Ol Skul Tiokratik. Olgeta 3-pela brata i wanbel olsem Skul Gileat i skulim ol sumatin long tok i tru bilong Baibel na i no dispela tasol, nogat, em i skulim ol tu long pasin bilong bihainim ol dispela tok i tru, maski ol i husat o ol i mekim wok long wanem kantri.
Wanpela sumatin i ritim wanpela pas bilong tok tenkyu em ol sumatin i bin raitim na odiens i pilim tru tok bilong en. John Barr, em i gat 96 krismas, na em i lapun tru winim ol narapela insait long lain Gavening Bodi, em i mekim laspela beten bilong pinisim program—em i askim Jehova long blesim wok bilong klas 128 bilong Skul Gileat.
[Sat/Mep long pes 31]
OL SAMTING BILONG OL SUMATIN
8 kantri ol i kam long en
54 sumatin
27 ol marit
35.2 averes krismas
19.1 averes yia ol i baptais
13.8 averes yia long fultaim sevis
[Mep]
(Bilong save ol dispela rait i stap we long pes, lukim buk o magasin)
Ol i makim ol sumatin long i go long 25 kantri i stap daunbilo:
HONDURAS
GUATEMALA
NIKARAGUA
RIPABLIK DOMINIKA
ARUBA
GAIANA
EKWADO
BOLIVIA
PARAGWAI
LATVIA
ROMENIA
KOSOVO
SERBIA
ALBENIA
GINI
LAIBIRIA
KOT DIWA
GANA
NAMIBIA
RUANDA
MADAGASKA
MONGOLIA
TAIWAN
KAMBODIA
INDONESIA
(WOK ANINIT LONG BRENS OFIS BILONG AUSTRALIA)
OL KANTRI OL I SALIM OL I GO LONG EN
[Piksa long pes 30]
Sampela sumatin bilong Skul Gileat i mekim soim long wanpela ekspiriens bilong ol long wok autim tok
[Piksa long pes 31]
Klas Namba 128 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba 1 lain i sanap paslain, na namba 7 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.
(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.
(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.
(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.
(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.
(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.
(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.