Gretiuesen Bilong Klas 130 Bilong Gileat

TRU tumas, gretiuesen bilong klas 130 bilong Wastaua Baibel Skul Bilong Gileat, em wanpela de we olgeta man husat i kam bung ol i amamas na wetim gutpela samting i kamap. Long Sarere, Mas 12, 2011, i gat 8,500 manmeri i bung long gretiuesen wantaim ol sumatin, ol famili, na ol pren bilong ol. Olgeta i tingim samting bai kamap​—ol i no tingim tasol dispela de yet, nogat, ol i tingim tu samting bai painim ol misineri em klostu ol bai go long planti kantri na skulim ol manmeri long tok i tru bilong Baibel.

‘Ol Manmeri i Bilip na Wetim Bikpela Ol i Ken Amamas’

Dispela gutpela tok em Aisaia 30:18 i as bilong en, em tim bilong tok bilong Geoffrey Jackson, wanpela memba bilong lain Gavening Bodi Bilong Ol Witnes Bilong Jehova, na siaman bilong program. Long gutpela pasin isi em i tok amamas long ol sumatin long ol i bin winim hatwok bilong ol kos bilong Skul Gileat. Ol sumatin i mas i gat wanem tingting long ol samting bai painim ol long bihain? Em i kamapim tripela bikpela poin long ol tok bilong Aisaia 30:​18-21.

Namba wan, Brata Jackson i tok: “Yupela i ken save olsem Jehova bai harim ol beten bilong yupela.” Em i kamapim tok bilong ves 19 olsem: “Taim yupela i singaut na beten long em, wantu tasol em bai i harim singaut bilong yupela na helpim yupela.” Long dispela ves long tok Hibru bilong bipo, ol i tanim dispela tok “yupela” olsem yu, na i makim wanpela man tasol, na i no planti man. Brata Jackson i tok olsem Jehova i save harim beten bilong yumi olgeta wan wan man. Na em i tok moa olsem: “Olsem wanpela Papa, Jehova i no askim olsem ‘Bilong wanem yu no stap strong wankain olsem dispela narapela man.’ Tasol em i save putim gut yau long olgeta wan wan. Na em i bekim beten bilong ol.”

Namba tu, brata i kamapim olsem sampela taim hevi bai painim yumi. Em i tok: “Jehova i no tok promis olsem laip bilong yumi bai isi; tasol em bai helpim yumi.” Olsem ves 20 i soim, God i tok profet olsem long taim ol birua i daunim ol Israel, pen na hevi bai pulap long Israel olsem bret na wara. Maski i olsem, oltaim Jehova i redi long helpim ol. Ol sumatin bilong Gileat tu bai karim ol hevi​—na planti taim i no ol hevi em ol i bin tingting long en! Brata Jackson i tok moa: “Tasol yupela i ken bilip olsem Jehova bai redi oltaim long helpim yupela long karim ol dispela hevi.”

Namba tri, Brata Jackson i tokim ol sumatin olsem Jehova bai “soim rot long yupela​—olsem na yupela i mas painim dispela rot,” olsem tok bilong ves 20 na 21 i kamapim. Em i tok, long nau olgeta Kristen i mas putim gut yau long ol tok Jehova i mekim long yumi long rot bilong Baibel na ol buk na nius bilong Baibel. Brata i strongim ol sumatin long ritim Baibel long olgeta de, long wanem, dispela inap givim laip long ol.

‘Yupela i Mas Pret Tru Long Bikpela’

Anthony Morris bilong lain Gavening Bodi i kamapim insait bilong dispela tok bilong Baibel olsem “aninit [“pret,” NW ] tru long Bikpela.” (2 Stori 19:7) Dispela tok i no makim pasin bilong pret nogut tru long God, nogat, em i makim olsem man i gat strongpela laik long mekim stretpela pasin​—olsem em i rispek na tingim tru God. Brata Morris i tokim ol sumatin: “Kisim dispela kain pasin bilong pret i go wantaim yu long misineri asainmen bilong yu.” Olsem wanem ol i ken soim dispela pasin bilong pret long Jehova? Brata i kamapim tupela gutpela rot bilong mekim olsem.

Namba wan, Brata Morris i kirapim ol sumatin long bihainim tok i stap long Jems 1:19: “Olgeta man i mas putim yau kwik long harim tok, na ol i no ken hariap long mekim toktok.” Em i tok olsem ol sumatin i kisim planti save long dispela kos ol i bin mekim insait long 5-pela mun, tasol ol i mas was gut, ol i no ken go long ol asainmen bilong ol na hambak long save ol i bin kisim. Em i tok: “Pastaim yupela i mas putim gut yau. Putim gut yau long kongrigesen na long ol brata i go pas long lukautim wok long kantri yupela i stap long en; putim gut yau long tok ol i mekim long dispela kantri na kalsa bilong en. No ken pret long tokaut olsem, ‘Mi no save.’ Sapos save yupela i kisim pinis i helpim yupela, orait bai yupela i lukim olsem taim yupela i wok long lain long planti samting, yupela bai luksave moa yet olsem yupela i no gat bikpela save tumas.”

Namba tu, Brata Morris i ritim Sindaun 27:21: “Paia i save traim gol na silva. Olsem tasol, ol man i save lukim pasin bilong man, bilong ol i ken save, em i gutpela man o man nogut. Na sapos em i gutpela man, orait ol i save litimapim nem bilong en.” Em i tok paia i save mekim gol na silva i klin, olsem tasol taim ol narapela i litimapim nem bilong yumi, dispela inap mekim pasin bilong yumi i kamap gutpela moa. Olsem wanem dispela inap kamap? Taim man i litimapim nem bilong yumi, dispela inap traim pasin bilong yumi. Em inap mekim yumi hambak na yumi no pas gut moa wantaim Jehova, o em inap kirapim yumi long tenkyu long Jehova na yumi laik wok strong moa long bihainim ol lo bilong em. Olsem na Brata Morris i kirapim ol sumatin long holim stretpela tingting taim ol man i litimapim nem bilong ol​—dispela em wanpela rot bilong soim olsem ol i “pret tru” long Jehova.

“Amamas Long Wok Bilong Yu”

Guy Pierce bilong lain Gavening Bodi i givim bikpela tok bilong program. Em i stori long dispela tok i stap antap, na em i tok dispela wed “misineri” i makim “wanpela man em narapela i salim bilong mekim wanpela wok.” Em i tok, yumi no ken kirap nogut olsem i gat planti kain misineri i mekim ol narapela narapela wok. Planti i tingim tasol wok bilong oraitim ol man long skin na ol i laik wok politik bai stretim ol hevi bilong ol man. Em i tok: “Yupela i narapela kain.” Ol i narapela kain olsem wanem?

Ol sumatin i stadi long Baibel na ol i kisim planti save long ol stori bilong oraitim ol man long skin. Taim Jisas i bin kirapim bek wanpela yangpela gel, papamama bilong em “i amamas nogut tru.” (Mak 5:42) Olsem tasol, taim ol aipas i kamap orait gen long rot bilong mirakel, ol i amamas tru. Wanpela as na Krais i wokim ol dispela mirakel em bilong soim yumi long nau long ol samting em bai mekim long nupela taim God bai kamapim. Long dispela taim Jisas bai oraitim olgeta kain sik bilong “bikpela lain manmeri” husat i mekim stretpela pasin na ol i bin abrusim bagarap bilong pasin nogut bilong nau. (Revelesen 7:​9, 14) Ol famili bilong ol husat bai kirap bek, skin bilong ol tu bai stap gutpela. Man! Tingim bikpela amamas bai kamap!

Tasol olsem Brata Pierce i tok, wok bilong oraitim ol man long skin i no nambawan bikpela samting. Ol sikman em Jisas i bin oraitim, bihain ol i sik gen. Ol daiman em i bin kirapim bek, bihain ol i dai gen. Na ol aipas em Jisas i bin oraitim, ol i kamap aipas gen long taim ol i dai. Bikpela samting moa em Jisas i bin helpim ol man long kamap wanbel wantaim God na pas gut wantaim Em. Ol misineri bilong Skul Gileat, ol tu i gat wok long helpim ol man long pas gut wantaim God. Ol i helpim ol manmeri long kamap wanbel wantaim Papa bilong yumi long heven bambai ol i ken stap laip long ol samting bilong spirit. Ol manmeri em Jisas i bin helpim ol long pas gut wantaim God, ol tasol bai winim mak bilong kisim laip oltaim. Brata Pierce i tok: “Wok bilong helpim ol man long pas gut wantaim God, dispela i litimapim nem bilong God. Na dispela bai helpim yupela long mekim gut wok misineri.”

Tripela Bikpela Tok Moa Bilong Dispela De

“Yu Ting Em Bai Gutpela De?” Robert Rains bilong Brens Komiti bilong Amerika i stori long dispela askim. Em i strongim ol sumatin long wok strong bambai olgeta wan wan de long asainmen bilong ol bai i wanpela gutpela de. Ol inap mekim olsem long rot bilong yusim gut taim bilong ol, skelim ol tok bilong Baibel bilong helpim ol long karim ol hevi, na beten strong long Jehova i helpim ol.

“Bai Yu Mekim Ol Olpela Samting i Kamap Nupela?” Mark Noumair, wanpela tisa bilong Skul Gileat i kamapim dispela askim long tok bilong em. Em i stori long 1 Jon 2:​7, 8, we aposel Jon i kolim wanpela “olpela lo” na em tu i olsem “wanpela nupela lo.” Tupela lo wantaim i makim wankain lo​—em pasin bilong ol disaipel bilong Krais long laikim tru narapela narapela na i no tingim ol yet tasol. (Jon 13:​34, 35) Dispela em i wanpela olpela lo, long wanem, Krais yet i bin givim dispela lo long ol disaipel bilong em, tasol tu, em i wanpela nupela lo, long wanem, ol Kristen bai i kisim ol nupela hevi na ol i mas kamapim dispela pasin laikim long ol nupela rot i bikpela moa. Ol misineri tu bai kisim ol nupela hevi na ol i mas lain long kamapim dispela pasin laikim long ol nupela rot. Wanem samting bai helpim ol long mekim olsem?

Brata Noumair i tok: “No ken kamap olsem man yu heitim.” Em i givim tok lukaut olsem sapos yumi heitim wanpela pasin, tasol yumi bihainim dispela pasin, yumi kamap olsem man i mekim dispela pasin​—dispela bai nogutim yumi yet. Tasol sapos yumi kamapim pasin laikim taim ol dispela nupela hevi i painim yumi, bai yumi kamap olsem “lait tru” na yumi bai pinisim pasin bilong tudak bilong spirit.

“Karim Ol Hevi.” Michael Burnett, narapela tisa bilong Skul Gileat i mekim dispela tok. Em i stori long ol man long sampela kantri long Afrika em ol i save karim ol hevipela samting antap long het bilong ol. Ol i yusim wanpela kata, em wanpela laplap ol i rolim na putim antap long het na dispela i helpim ol long balensim gut ol samting i stap antap long het, na ol inap wokabaut gut. Long asainmen bilong ol long ol narapela kantri, ol misineri bai i gat bikpela wok bilong mekim, i olsem ol i mas karim ol hevipela samting, tasol ol i kisim samting i olsem dispela kata: em gutpela skul bilong Baibel. Taim ol i bihainim ol samting ol i kisim save long en, ol bai inap long balensim na mekim gut wok bilong ol.

Ol Ekspiriens na Ol Intaviu

Ol sumatin bilong Skul Gileat i save autim tok wantaim ol kongrigesen bilong ol Witnes Bilong Jehova, na dispela em i hap bilong skul ol i kisim. William Samuelson, wasman bilong Dipatmen Bilong Ol Skul Tiokratik, i kamapim sampela ekspiriens bilong ol sumatin, taim em i mekim dispela tok, “No Ken Larim Han Bilong Yu i Malolo.” (Saveman 11:6) Long rot bilong ol soim, ol sumatin i kamapim klia bikpela wok ol i mekim long autim tok, na ol i painim rot bilong autim tok long balus, ol haus kaikai, na long ol sevis stesin. Ol i autim tok long ol haus, long kain kain taim na ples, na long rot bilong raitim pas. Tru tumas, ol i no larim han bilong ol i malolo liklik, na ol gutpela samting tru i kamap.

Bihain wanpela brata i wok long ofis bilong Skul Gileat, Kenneth Stovall, i intaviuim 3-pela brata em ol i bin stap longpela taim long wok misineri​—Barry Hill, em i bin mekim wok long Ekwado na long Ripablik Dominika, Eddie Mobley long Kot Diwa, na Tab Honsberger long Senegal, Benin, na Haiti. Tok bilong olgeta 3-pela brata i kamapim tim olsem “Traim Jehova na Kisim Ol Blesing.” (Malakai 3:10) Olsem: Brata Hill i stori long olsem wanem em na meri bilong em i bin bungim sampela hatwok long weda bilong Ekwado we sampela taim ples i hat na i gat planti das, na long ol narapela taim ples i hat na graun i malumalum. Insait long 2 na hap yia, tupela i save waswas long ol baket wara. Tasol ol i no bin tingting long lusim wok; ol i pilim olsem dispela asainmen bilong ol em wanpela blesing i kam long Jehova. Em i tok: “Dispela em i laip bilong mipela.”

Long pinis bilong dispela program, wanpela sumatin i makim maus bilong ol narapela sumatin, na em i ritim wanpela pas i kamapim tenkyu bilong ol long dispela skul. Dispela pas i tok: “Bilip bilong mipela i kamap strong moa, tasol mipela i save olsem mipela i gat bikpela wok yet long mekim.” Olgeta sumatin i kisim pinis ol diploma, na olgeta long klas i kisim ol asainmen bilong ol long i go long ol narapela narapela kantri. Bilong pinisim program, Brata Jackson i strongim gen ol sumatin olsem Jehova bai helpim ol long bihain, na moa yet taim ol i karim hevi. Olgeta husat i bin kam long dispela bung ol i amamas na wetim ol gutpela samting bai kamap bihain. Tru tumas, Jehova i yusim ol dispela misineri long mekim ol bikpela wok.

[Sat/Mep long pes 31]

OL SAMTING BILONG OL SUMATIN

9 kantri ol i kam long en

34.0 averes krismas

18.6 averes yia ol i baptais

13.1 averes yia long fultaim sevis

[Mep]

(Bilong save ol dispela rait i stap we long pes, lukim buk o magasin)

Ol i makim ol sumatin long i go long ol kantri i stap daunbilo

OL KANTRI OL I SALIM OL I GO LONG EN

AJENTINA

AMENIA

BEKINA FASO

BARUNDI

KONGO (KINSASA)

RIPABLIK SEK

HAITI

HONG KONG

INDONESIA

KENYA

LITUENIA

MALESIA

MOSAMBIK

NEPAL

PAPUA NIUGINI

ROMENIA

SENEGAL

TANSANIA

YUGANDA

SIMBABWE

[Piksa long pes 31]

Klas Namba 130 Bilong Wastaua Baibel Skul Bilong Gileat

Nem bilong ol bratasista i stap daunbilo. Namba 1 lain i sanap paslain, na namba 7 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.