Gutnius Bilong Helpim Ol Man i Stap Rabis
BAIBEL i tok: “Oltaim God i no save lusim tingting long ol rabisman.” (Song 9:18) Na tu, Baibel i tok long Man Bilong Wokim yumi olsem: “Em i save givim kaikai samting long olgeta inap long ol i stap gut.” (Song 145:16) Dispela gutpela tok i stap long Baibel i no wanpela driman nating. God i Gat Olgeta Strong inap tru long pinisim pasin bilong i stap rabis. Ol rabisman i mas kisim wanem samting?
Wanpela savemeri bilong Afrika i tok, ol kantri i stap rabis i mas i gat wanpela “bikman i gat pasin sori.” Bilong pinisim pasin bilong i stap rabis, i mas i gat wanpela man i gat strong bilong kamapim ol senis na em i mas i gat laik long mekim olsem. Yumi ken tok moa olsem dispela bikman husat inap pinisim pasin bilong stap rabis em i mas i gat strong bilong bosim olgeta hap. Planti taim pasin bilong stap rabis tru i kamap, long wanem, sampela kantri i gat planti samting na sampela kantri i stap rabis tru. Na tu, wanpela bikman husat inap pinisim pasin bilong stap rabis em i mas i gat strong long pinisim as bilong dispela pasin—em pasin bilong ol man long tingim ol yet tasol. Yumi inap painim we kain gutpela bikman olsem?
God i salim Jisas long autim gutnius long ol man i stap rabis. Taim Jisas i sanap na ritim tok long wok em i kisim long God, em i tok: “Spirit bilong Jehova i stap long mi, long wanem, em i bin makim mi long autim gutnius long ol rabisman.”—Luk 4:16-18.
Wanem Dispela Gutnius?
God i makim Jisas olsem King. Tru tumas, dispela em i gutnius. Em i dispela gutpela Bikman bilong pinisim pasin bilong i stap rabis, long wanem, (1) em bai bosim olgeta manmeri na em i gat strong long mekim ol samting; (2) em i mekim pasin sori long ol rabisman na i skulim ol disaipel bilong em long tingim ol; na (3) em inap pinisim as bilong pasin bilong i stap rabis, em pasin bilong yumi ol man long tingim yumi yet tasol. Orait nau yumi laik skelim dispela 3-pela samting bilong gutnius.
1. Jisas i gat namba long bosim olgeta kantri Baibel i stori long Jisas olsem: “Man bilong bipo bipo yet i mekim em i kamap king. . . . Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:14) Yu inap piksaim long tingting ol gutpela samting bai kamap sapos wanpela gavman tasol i bosim olgeta manmeri? Ol man bai i no inap pait na resis moa long kisim ol oil na gol samting. Ol bai tilim gut ol dispela samting long olgeta man. Jisas yet i tok, em bai stap dispela Bikman i bosim graun olgeta na em i gat strong bilong mekim ol samting. Em i tok: “God i givim mi bikpela namba na strong bilong bosim olgeta samting long heven na long graun.”—Matyu 28:18.
2. Jisas i sori long ol man i stap rabis Taim Jisas i mekim wok bilong em long graun, em i mekim pasin sori long ol rabisman. Olsem: Wanpela meri husat i tromoi olgeta mani bilong kisim helpim long sik bilong em, em i tatsim klos bilong Jisas bambai em i ken kamap orait gen. Inap 12-pela yia em i lusim planti blut na em i sot tru long blut. Lo i tok olgeta manmeri em i tatsim, ol bai kamap doti. Tasol Jisas i mekim gutpela pasin long em. Em i tok: “Pikinini, bilip bilong yu i mekim na yu kamap orait. Yu go wantaim bel isi, na dispela sik i no ken givim hevi moa long yu.”—Mak 5:25-34.
Ol tok Jisas i skulim ol man long en i gat strong bilong senisim bel na tingting bilong ol man, na bai ol tu i ken mekim pasin sori. Olsem: Tingim tok Jisas i bekim long wanpela man i askim em long olsem wanem em i ken amamasim God. Dispela man i save olsem God i laik yumi mas laikim tru ol narapela, tasol em i askim Jisas: “Dispela narapela mi mas laikim, em i husat?”
Bilong bekim dispela askim, Jisas i kamapim wanpela tok piksa long wanpela man husat i lusim Jerusalem na i go long Jeriko. Ol raskol i kisim olgeta samting bilong em, paitim em na em i “hap indai.” Wanpela pris i go daun long dispela rot, tasol em i go long hapsait bilong rot na wokabaut i go. Wanpela Livai tu i mekim olsem. “Tasol wanpela man Samaria i wokabaut long dispela rot na i kam kamap long em, na taim em i lukim em, em i sori tru.” Em i klinim ol sua bilong dispela man, kisim em i go long wanpela haus pasindia na em i baim papa bilong haus pasindia long lukautim dispela man i kisim bagarap. Jisas i askim: “Husat bilong dispela 3-pela man i mekim pasin laikim long dispela man i kisim hevi long ol raskol?” Man i bekim tok olsem: “Em man i mekim pasin marimari long em.” Orait Jisas i tok: “Yu go na yu tu i mas mekim wankain pasin.”—Luk 10:25-37.
Ol man husat i kamap Witnes Bilong Jehova, ol i stadi long ol dispela tok bilong Jisas na dispela i senisim tingting bilong ol long pasin bilong helpim ol man i sot long ol samting. Olsem: Long buk bilong em, Women in Soviet Prisons, wanpela meri bilong Latvia i stori long sik bilong em long taim em i wok long banis kalabus long Potma long 1965 samting. Em i tok: “Long taim mi gat bikpela sik [ol Witnes] i wok strong long lukautim mi gut tru.” Em i tok moa: “Ol Witnes Bilong Jehova i ting em i wok bilong ol long helpim ol narapela, maski ol i bilong narapela lotu o kantri.”
Taim bikpela hevi bilong mani i kamap long Ancón, Ekwado, sampela Witnes Bilong Jehova long dispela hap i no gat wok mani. Ol wanbilip Witnes i mekim samting bilong kisim mani na helpim ol; ol i redim kaikai na salim long ol man bilong kisim pis taim ol i kam bek long raun bilong ol long painim pis long nait olgeta (lukim piksa long han sut). Olgeta insait long kongrigesen i wok gut wantaim, na ol pikinini tu. Ol i kirap mekim wok long wan klok long olgeta moning bambai kaikai i redi taim ol bot i kam sua long 4 klok moning. Mani ol Witnes i kisim, ol i tilim gut namel long olgeta wan wan inap long skel bilong ol.
Ol kain wok olsem i soim olsem gutpela pasin bilong Jisas na ol tok em i skulim ol man long en i gat strong bilong senisim tingting bilong ol man na ol i amamas long helpim ol man i sot.
3. Jisas i gat strong long senisim pasin bilong ol man Pasin bilong ol man long tingim ol yet tasol, em samting yumi olgeta man i save long en. Baibel i tok dispela em sin. Aposel Pol tu i tok: “Mi lukim olsem dispela lo i bosim mi: Taim mi gat laik long mekim pasin i stret, pasin nogut i stap wantaim mi.” Na em i tok moa: “Husat bai kisim bek mi long dispela bodi em bilong i dai. Mi tenkyu long God long rot bilong Jisas Krais.” (Rom 7:21-25) Long dispela ves Pol i tok, long rot bilong Jisas, God bai kisim bek ol man i lotu tru long Em long sin i stap long skin bilong ol. Wanpela bilong ol dispela sin em pasin bilong ol man long tingim ol yet tasol, em as tru bilong pasin bilong i stap rabis. Olsem wanem dispela samting bai kamap?
Inap sampela haptaim bihain long Jisas i kisim baptais, Jon Bilong Baptais i tokim ol man long Jisas olsem: “Lukim, Pikinini Sipsip bilong God husat i tekewe sin bilong olgeta manmeri!” (Jon 1:29) Klostu nau graun bai pulap long ol man em ol i kamap fri long sin, na long pasin bilong ol long tingim ol yet tasol. (Aisaia 11:9) Jisas bai pinisim as tru bilong pasin bilong i stap rabis.
Em i gutpela samting tru long tingim taim we olgeta man bai kisim ol samting ol i nidim! Baibel i tok: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:4) Ol dispela tok i makim taim we olgeta man bai i gat gutpela wok, bel isi, na ol bai amamas long gutpela sindaun we i no gat pasin bilong stap rabis, na dispela samting bai litimapim nem bilong Jehova.