Sampela Aidia Bilong Mekim Famili Lotu na Stadi Bilong Yu Yet
LONG kirap bilong 2009, olgeta kongrigesen bilong ol Witnes Bilong Jehova i bin senisim sediul bilong ol miting bilong ol. Ol i bungim tupela miting ol i save mekim namel long wik na Gavening Bodi i kirapim ol long yusim dispela nait we ol i no gat moa miting long en bilong mekim famili lotu o stadi bilong ol yet. Olsem wanem? Yu wok long bihainim dispela nupela pasin? Yu mekim long pasin we i helpim yu tru?
Sampela i laik save long wanem buk samting ol i mas makim bilong mekim famili lotu. Gavening Bodi i no gat tingting long makim ol samting em olgeta famili i mas mekim long famili lotu. Sindaun bilong olgeta man i no wankain, olsem na i stret ol wan wan het bilong famili o ol singel i skelim olsem wanem ol i ken mekim gutpela wok long dispela taim bilong stadi.
Sampela i yusim dispela haptaim long redim ol miting bilong kongrigesen, tasol i no olsem ol i mas mekim dispela samting tasol. Sampela i bin ritim Baibel, stori wantaim long tok bilong en, na wokim Baibel drama. Dispela i helpim tru ol yangpela pikinini. I no olsem ol het bilong famili i mas mekim ol askim na bekim olsem yumi save mekim long ol miting, nogat. Pasin bilong amamas na bel isi long taim bilong stadi i save mekim ol lain i amamas long kamapim tingting bilong ol na toktok gut wantaim. Long dispela kain taim tingting bilong ol bai wok gut tru na ol bai tingim famili lotu olsem taim bilong amamas.
Wanpela papa husat i gat tripela pikinini i tok: “Mipela i save mekim ol samting em Baibel ritim i as bilong en. Paslain long famili lotu, mipela wan wan i save ritim ol sapta bilong Baibel ritim na ol pikinini bai makim hap ol i laik mekim wok painimaut long en, na bihain ol i stori long save ol i kisim. Planti taim Michael [7-pela krismas] i save droim piksa o raitim wanpela paragraf long save em i kisim. David na Kaitlyn [13 na 15 krismas] i raitim stori long samting i kamap long Baibel olsem ol i aiwitnes long samting i bin kamap. Olsem: Taim mipela i ritim stori long Josep i bin kamapim mining bilong driman bilong man bilong wokim bret na man i save givim wain long Fero, Kaitlyn i raitim stori olsem em tu i stap long kalabus na lukim samting i kamap.”—Stt., sap. 40.
Yumi save, sindaun bilong ol famili i narapela narapela. Samting i gutpela long helpim wanpela famili o wanpela singel, ating i no helpim narapela. Boks i stap long hapsait i kamapim sampela aidia em yumi inap bihainim long taim bilong famili lotu o stadi bilong yumi yet. Ating yu inap tingim planti narapela samting yu ken mekim.
[Blok/Piksa long pes 6, 7]
Ol famili i gat ol tineja:
• Ritim na stori long buk Sampela Askim Bilong Ol Yangpela—Ol Gutpela Bekim
• Prektis long ol samting em yangpela bai mekim sapos traim i kamap. (Lukim Wastaua, Me 15, 1996, pes 14, paragraf 17-18.)
• Toktok long ol mak bilong winim long nau na long bihain
• Makim sampela taim bilong lukim na stori long ol vidio em Baibel i as bilong en
• Skelim hap ol i kolim “Bilong Ol Yangpela,” i stap long Wastaua
Ol marit husat i no gat pikinini:
• Stori long sapta 1, 3, 11-16 bilong buk Famili i Ken Stap Amamas
• Toktok wantaim long ol bikpela poin bilong Baibel ritim em yupela i lainim taim yupela i mekim wok painimaut
• Redim Baibel Stadi Bilong Kongrigesen o Stadi Wastaua
• Stori long olsem wanem yutupela i ken mekim bikpela wok moa long autim tok
Ol bratasista singel o taim wanpela tasol i insait long tok i tru:
• Stadi long ol nupela buk samting yu kisim long kibung distrik
• Ritim nupela na ol olpela Yearbook
• Mekim wok painimaut long ol askim em planti man long teritori i save kamapim
• Redim ol tok yu bai mekim taim yu autim tok
Ol famili i gat ol yangpela pikinini:
• Mekim ol Baibel drama
• Pilaim ol gem bilong testim memori bilong ol, olsem i stap long pes 31 long Kirap!
• Sampela taim, mekim samting i kirapim tru tingting bilong pikinini (Lukim “Studying the Bible—In the Zoo!” long Awake! bilong Mas 8, 1996, pes 16-19.)
• Skelim hap bilong Wastaua “Skulim Ol Pikinini Bilong Yu”