Autim Gutpela Tok—Long Pasin Isi
1 “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kl 4:6) Em gutpela tok aposel Pol i mekim! Yumi mas tingim gut dispela tok taim yumi autim tok i tru long narapela man.—2 Ko 6:3.
TAIM YUMI GO LONG OL HAUS NA AUTIM TOK
2 Sapos yumi laik autim tok long pasin isi, yumi mas save wanem kain pasin yumi mas bihainim na wanem kain tok yumi mas mekim bambai yumi no ken sutim bel o skrapim bel bilong narapela man. Taim yumi go long ol haus na autim tok, sampela man i tok, “Mi gat wok.” Sapos tru man i gat wok, ating yu ken tokim em long kisim sampela magasin samting, na tokim em, narapela taim bihain bai yu kam toktok wantaim em. Sapos yu lukim olsem em i no gat bikpela wok tumas, orait yu ken tok, “Mi no ken pulim bikpela hap taim bilong yu.” Yu ken stori liklik, inap wanpela o tupela minit, long ol tok bilong Baibel yu tingting pinis long kamapim.
3 Sampela taim man bilong haus i mekim tok nogut long yumi. Tasol yumi no ken bekim tok nogut; yumi no ken “bekim pasin nogut long ol.” (Ro 12:17) Yumi mas mekim pasin isi na tingim tok bilong Sindaun 15:1, i tok: “Sapos man i belhat long yu, orait bekim tok isi long em, na bai belhat bilong en i dai.” Sapos yu save long tok Inglis na yu gat dispela buk Reasoning, yu ken lukim sampela gutpela tok i stap long pes 15-24 bilong helpim yu long bekim tok long pasin isi.
TAIM YUMI MEKIM GOBEK
4 Planti taim yumi save go bek lukim man i bin kisim buk o buklet samting, na em i no bin kaunim. Yumi ken kirapim ol dispela man long kaunim samting ol i kisim pinis. Bilong mekim olsem, long pasin isi yumi ken kolim sampela askim em bekim i stap long dispela buk o buklet samting em i bin kisim. Long dispela rot bai yumi inap kirapim tingting bilong ol na bai ol i gat laik long kaunim.
5 Planti taim yumi pasim tok wantaim wanpela man long i go bek lukim em na yumi go long taim stret olsem yumi makim pinis, tasol em i no i stap. Ating yumi bel hevi liklik, long wanem yumi lusim bikpela hap taim na strong long i go lukim em. Tasol taim yumi bungim gen dispela man, yumi mas mekim pasin isi yet. Yumi ken tokim em, “Sori, taim mi kam lukim yu, yu no i stap long haus.” Na yumi ken tokim em, bai yumi wok strong long i kam lukim em gen, na yumi amamas long toktok moa wantaim em long ol tok bilong Baibel.
TAIM YUMI MEKIM BAIBEL-STADI
6 Sampela man ol i no redim ol tok bilong stadi. Sapos olsem, orait yumi ken lusim liklik hap taim long lainim ol long pasin bilong redim ol tok bilong stadi. O ating yumi ken kolim sampela tok ol inap kisim save long en sapos ol i redi pastaim. Sapos ol i redim stadi bai ol i kisim kwik save na kamap strong.
7 Ating yumi stadi wantaim wanpela man o meri, tasol em i no kam oltaim long ol miting olsem em i mas mekim. Orait, ating yumi ken toktok wantaim em long tok bilong Hibru 10:24, 25 o Buk Song 133:1 na askim em, “Yu ting olsem wanem long dispela tok?” Sampela brata sista, ating ol yet i bin kisim kwik save na bihainim tok i tru, tasol ol i no ken les long man i isi isi liklik. Yumi olgeta i narapela narapela kain, olsem na yumi mas mekim pasin isi tru long sampela na yumi no ken les kwik long ol.
8 Pol i tokim Timoti olsem: “Wokman bilong Bikpela i . . . mas mekim gutpela pasin long olgeta man. . . . Em i mas wok isi na stretim tingting bilong ol man bilong sakim tok.” (2 Ti 2:24, 25) Yumi mas wok isi long “ol man bilong sakim tok,” olsem na yumi mas wok isi moa yet long ol man i laik harim tok na ol i orait long yumi stadi wantaim ol. Yumi mas mekim olsem tu taim yumi stadi wantaim ol pikinini bilong yumi o narapela long famili bilong yumi.
9 Taim yumi go long ol haus na autim tok, o mekim ol gobek, o mekim Baibel-stadi, yumi olgeta yumi mas bihainim pasin bilong Bikpela Tisa Krais Jisas, em i tok long em yet, olsem: “Mi save mekim pasin isi long ol man na mi save daunim mi yet.” (Mt 11:29) Yumi mas bihainim kain pasin olsem taim yumi mekim wok bilong autim tok na kamapim ol disaipel; yumi mas mekim pasin isi long ol man na bihainim pasin daun.
[Ol Askim]
1. Jisas i bihainim wanem gutpela pasin, olsem Matyu 11:29 i tok? Long wanem taim yumi mas bihainim kain pasin olsem?
2. Taim yumi toktok wantaim man, yumi mas mekim long wanem kain pasin? Bilong wanem yumi mas mekim olsem? Bilong wanem yumi mas mekim “gutpela tok tasol”?
3. (a) Sapos wanpela man i tok, “Mi gat wok,” na tru em i gat wok, orait yumi ken mekim wanem gutpela pasin isi? (b) Sapos em i no gat bikpela wok tumas, orait yumi ken mekim wanem?
4. (a) Rom 12:17 i mekim wanem gutpela tok bilong helpim yumi taim yumi go long ol haus na autim tok? (b) Long wanem kain taim i gutpela long yumi bihainim tok bilong Sindaun 15:1?
5. Taim yumi go bek lukim man i bin kisim buk o buklet samting na em i no bin kaunim, yumi ken mekim wanem gutpela pasin isi?
6. Sapos yu pasim tok wantaim wanpela man long i go lukim em na taim yu go em i no i stap, orait taim yu bungim gen dispela man yu ken mekim wanem pasin isi?
7. Yu ken bihainim wanem gutpela pasin isi bilong helpim man o meri long redi long stadi?
8. (a) Yumi ken mekim wanem bilong kirapim Baibel-stadi long i kam oltaim long ol miting? (b) Long wanem taim yumi mas save, yumi olgeta i narapela narapela kain?
9. Long wanem wanem taim yumi mas bihainim tok bilong 2 Timoti 2:24, 25?
This article is repeated in km 8/93.