Autim Gutpela Tok—Long Rot Bilong Ol Buklet
1 Yumi amamas tru long autim tok i tru long ol man na long tokim ol long gutpela tok bilong Kingdom. (Ap 15:3) Tasol yumi no gat bikpela hap taim tumas bilong mekim dispela wok. Jehova i gat gutpela tingting, olsem na long rot bilong oganaisesen bilong em, em i givim long yumi ol gutpela samting bilong stadi wantaim ol man long en. Yumi ken tilim long ol man i laik harim tok na bai yumi inap helpim ol long kisim sampela save moa. Taim yumi tilim ol dispela samting yumi mas mekim tok i stret wantaim Stori Bilong Mun, o liklik nius yumi bin mekim wok long en bilong kirapim tok.
2 Long mun Julai bai yumi mekim wok long nupela Stori Bilong Mun, “Rot Bilong i Stap Amamas.” Bai yumi mekim wok long sampela bilong ol dispela buklet: God Triwan, Stap Amamas, “Harim!,” Gavman, Tru God i Save Tingim Yumi?, Tewel Bilong Ol Daiman. Paslain long yumi go autim tok, gutpela sapos yumi tingim wanem tok yumi bai mekim bilong kirapim man long kisim buklet.
SAMPELA TOK BILONG HELPIM YU
3 Buklet Stap Amamas Oltaim Long Graun!: Ol yangpela i save laikim tru dispela buklet, na ol manmeri i no save long rit, ol tu i save laikim. Ol i raitim namba klostu long ol piksa na skripsa, olsem na bai yu no hatwok tumas long painim gen. Bai yu tok wanem bilong tilim dispela buklet? Taim yu kaunim pinis ol skripsa i stori long amamas, yu ken mekim tok olsem: “Ating yu laik i stap amamas tru long graun, a? [Larim man bilong haus i bekim tok.] Lukim piksa i stap long dispela liklik buk i kamapim tok bilong Baibel. Ol manmeri i stap amamas, a? [Opim buklet long piksa 49, na kaunim ol tok i stap klostu long dispela piksa.] Dispela liklik buk inap helpim yu long save, olsem wanem ol tok bilong Baibel inap helpim yu long i stap oltaim long graun na i stap amamas, olsem yu lukim hia long piksa. Dispela liklik buk em 30 toea.”
4 Yangpela pablisa i ken mekim liklik tok bilong kirapim tok wantaim man na bihain em i ken tok olsem: “Mipela wok long tilim dispela liklik buk long ol man, em i stori long ol samting God bai mekim bambai olgeta manmeri long olgeta hap bilong graun i ken i stap amamas. Lukim piksa i stap long skin bilong en, em piksa bilong ol manmeri i stap amamas. Ating bai yu laik save moa long ol dispela samting na lukim ol piksa na skelim ol tok bilong ol skripsa i stap long en, a? Sapos yu laik kisim wanpela, em 30 toea tasol.”
5 Buklet Wanpela Gavman Em Bai Kamapim Paradais: Dispela buklet i stori long Kingdom bilong God—em nambawan samting Jisas i bin autim tok long en na em nambawan samting yumi tu i autim tok long en. Tupela rot yu ken bihainim taim yu stori pinis long Stori Bilong Mun na yu laik tilim dispela buklet, em yu ken tok olsem:
6 “Ol manmeri i laikim tru Tok bilong God na bihainim, ol i ken tingting long i stap amamas long bihain, taim gavman bilong God i bosim graun. Dispela gavman bai kamapim paradais long olgeta hap bilong graun. Dispela liklik buk i stori gut long dispela samting, na sapos yu laik kisim, em 30 toea tasol. Lukim dispela tok i stap long pes 3 i stori long dispela gavman.” Kaunim paragraf 1.
7 O yu ken tok olsem: “Ol man i bihainim Tok bilong God ol i save stap amamas long nau, tasol ol i tingting long kisim bikpela amamas moa long bihain. Long pes 29 bilong dispela liklik buk, i gat sampela tok i stap bilong helpim yumi long save, olsem wanem ol man i bihainim tok bilong God ol bai stap amamas. [Opim buklet long pes 29 na stori long sampela bikpela tok bilong en.] Ating yu bai amamas long kaunim dispela liklik buk na kisim sampela save moa long dispela samting. Yu ken kisim long 30 toea tasol.”
8 Taim yu autim tok long dispela mun, ating bai yu inap tingim sampela narapela gutpela rot bilong tilim buklet. Yu mas redi gut, na taim yu wok long autim tok na tilim ol buklet, Jehova bai helpim yu long i stap amamas.
[Ol Askim]
1. (a) Jehova i gat gutpela tingting, olsem na em i bin givim wanem ol samting long yumi long rot bilong oganaisesen bilong em? (b) Yumi mas mekim wanem wok long ol dispela samting?
2. Paslain long yumi go autim tok, gutpela sapos yumi mekim wanem?