Mekim Wok Painia na Tingting Long Mekim Oltaim
1 I gat wanpela wok yumi mas mekim na dispela wok i makim olsem yumi givim bel tru long Jehova na yumi tingting long kisim laip oltaim. Dispela wok em i wok bilong autim tok. (Ro 10:10; 1 Ti 4:16) Taim Jisas i singautim ol man i go bihainim em, em i tokim ol, ol i mas autim tok bilong Kingdom bilong God. (Lu 9:57-62) Taim yumi kirap bihainim Jisas, ating bai yumi no senisim wok mani yumi mekim, tasol tingting bilong yumi i mas senis. Nau yumi mas tingting olsem: Nambawan bikpela wok bilong yumi em wok bilong “tokaut long olgeta gutpela pasin [Jehova] i bin mekim” long yumi, na bilong kamapim ol disaipel tu. (1 Pi 2:9; Mt 24:14; 28:19, 20) Ol manmeri i givim bel tru long Jehova na dediket long em, long tingting bilong ol, dispela wok bilong autim tok em i nambawan bikpela wok ol i mas mekim. Planti, em ol i no gat samting i pasim ol, ol i kirap mekim wok painia na ol i tingting long mekim dispela wok inap oltaim.—2 Ko 4:1, 7.
EM I WOK BILONG AMAMAS
2 Wanpela painia i bin mekim wok painia inap 54 yia pinis, na em i tok: “Amamas mi bin kisim taim mi mekim dispela wok i winim tru ol hevi i bin painim mi. Sapos mi inap kamap yangpela gen, mi laik mekim dispela wok bilong litimapim nem bilong bikpela God, em Jehova.” I no gat wanpela wok mani bilong dispela graun inap mekim bel bilong man i amamas tru olsem wok painia i mekim. Sapos man i givim bel long mekim wok painia, dispela i makim olsem em i givim bel tru long Jehova, na em bai kisim planti gutpela samting long nau na long bihain tu.—1 Ti 4:8.
3 Man i mekim wok painia em inap kisim bikpela amamas moa, long wanem, em i wok long givim samting long narapela man. (Ap 20:35) Taim man i givim bel long mekim wok bilong Kingdom, em i save kamap pren tru bilong Jehova na Pikinini bilong em, Krais Jisas. (Lu 16:9; 1 Ko 15:58) Em bai stap bel isi na bel bilong em i no ken kotim em, long wanem, em i mekim wok bilong Jehova inap tru long strong bilong em. Painia i save stretim gut olgeta samting em i mas mekim, olsem na em inap mekim bikpela wok moa long bihainim tok bilong Jisas na tingim Kingdom wantaim stretpela pasin pastaim.—Mt 6:33.
4 Sapos yu tingting long kirap mekim wok painia, beten tokim Jehova long tingting bilong yu. (Mt 7:7, 8) Planti ol i kirap mekim wok painia haptaim pastaim, na dispela i helpim ol long bilip na wetim Jehova i helpim ol.
5 Sapos man i laik mekim wok painia, em i no ken ting em i mas i gat bikpela save o narapela kain strong. Tasol em i mas laikim tru Jehova na ol manmeri, na em i mas redi long lusim sampela samting em i laik mekim bambai em i ken helpim ol narapela man. (Mt 22:37-39; Fl 4:13) Wok autim tok inap helpim yu long lain long sampela pasin yu mas kisim bambai yu inap winim taim bilong Armagedon. Sapos yu mekim wok painia, dispela inap helpim yu long sori moa yet long narapela man, na bilip bilong yu bai kamap strong moa, na bai amamas bilong yu i go bikpela, na bai yu stap bel isi. (Ga 5:22, 23) Olsem na yu mas wok long kamap wanpela painia, na taim yu kirap pinis long mekim dispela wok, orait, tingting long mekim dispela wok oltaim!
[Ol Askim]
1. (a) Kaunim Rom 10:10. Wok bilong autim tok em i nambawan bikpela wok o olsem wanem? (b) Sapos man i bihainim lek bilong Jisas, em i mas mekim wanem wok olsem Luk 9:57-62 i tok? (c) Stori long sampela tok bilong Baibel i makim olsem nambawan wok bilong Kristen em wok bilong autim tok. (d) Planti Kristen i bin mekim wanem na ol inap mekim wok painia, olsem 2 Korin 4:1, 7 i tok?
2. (a) Sapos man i mekim wok painia, em bai kisim wanem ol gutpela samting em i no inap kisim long ol narapela wok? (b) Stori long sampela gutpela samting Pol i kolim long 1 Timoti 4:8.
3. (a) Taim man i mekim wok painia, bilong wanem em inap kisim bikpela amamas moa? (b) Luk 16:9 i tok wanem long pasin bilong kamap pren bilong narapela man? Em i tok long kamap pren bilong husat? Olsem wanem yumi inap i go klostu moa long dispela tupela pren bilong yumi?
4. I gat wanem gutpela tok i stap long Matyu 7:7, 8 bilong helpim ol man i laik kirap mekim wok painia?
5. (a) Sapos yu laik mekim gut wok painia, yu mas mekim wanem? (b) Olsem wanem wok painia inap helpim yu long winim taim bilong Armagedon?
This article is repeated in km 12/93.