Wok Painia—Wanpela Wok i Gat Planti Blesing
1 Jehova i laik bai yumi amamas long olgeta bikpela wok yumi wok strong long mekim. (Sav 5:18) Wok bilong autim tok bilong Kingdom na kamapim ol disaipel, em i bikpela wok tru, winim ol narapela wok yumi inap insait long en. Pol i bin tokim Timoti olsem: “Yu mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.” (2 Ti 4:5) Pol i strongim Timoti, na ol tok bilong Pol inap strongim yumi tu long givim bel olgeta long mekim wok autim tok. Sampela i givim bel olgeta long mekim wok bilong God na ol inap mekim wok painia oltaim. Gutpela sapos yu beten na tingim gut ol samting yu mekim, na askim skin bilong yu yet olsem: ‘Mi inap mekim wok painia o olsem wanem?’
2 Ol Samting Yu Mas Mekim: Sapos yu laik mekim wok painia, yu mas mekim ol samting i stret wantaim beten bilong yu. Yu mas lainim bel long laikim wok bilong Jehova na laikim tru ol manmeri. Mekim moa yet wok bilong autim tok na mekim ol gobek na Baibel-stadi. Skelim gut ol wok yu mas mekim na makim gut taim bilong mekim, olsem wokim gutpela sedyul, na bai yu inap bihainim. Askim ol elda na painia long givim sampela tingting long yu. Tingim gut na makim ol taim bilong autim tok na bihainim gut dispela sedyul. Bilong kirap mekim wok painia, yu mas bosim gut skin, na yu yet yu mas kirap mekim sampela samting bilong opim rot, na yu mas tingting strong long mekim. (1 Ko 9:23, 25, 27) Planti brata sista, winim 10,000, ol i bin mekim olsem na insait long sampela mun i go pinis ol i kirap mekim wok painia.
3 Sapos yumi putim sampela mak bilong winim na wok strong long inapim, orait dispela bai helpim yumi long lain gut long pasin bilong autim tok, na bai yumi mekim gutpela moa dispela wok. Olsem wanem? Yumi inap lain gut long pasin bilong kirapim tok wantaim man bilong haus o bekim tok long man i no laik harim? Yumi save mekim wok long olgeta buk samting bilong Sosaiti? Yumi gat Baibel-stadi na yumi helpim dispela man o meri long kamap strong long spirit? Olsem wanem? Yumi inap mekim wok painia helpim long nau na wok long tingim rot bilong mekim wok painia oltaim long bihain? Ol mak yumi putim bilong winim i mas stret long skel bilong yumi. Sapos yumi winim ol dispela mak, dispela bai helpim wok bilong yumi long autim tok i kamap gutpela moa na bai yumi kisim bikpela amamas.—1 Ti 4:15, 16.
4 Ol Blesing Bilong Wok Painia: Sapos yumi gat stretpela tingting na yumi mekim wok painia na yumi gat laik long kamap strong long ol samting bilong spirit, orait bai yumi inap kisim planti blesing. Olsem: Bai yumi bilip strong moa long Jehova. Bai yumi lain long autim gut ol tok bilong Baibel, long wanem, yumi mekim bikpela wok moa bilong autim tok na oltaim yumi mekim wok long Baibel. Bai yumi helpim gut kongrigesen, na gutpela pasin yumi mekim, em yumi wok strong long autim tok, dispela inap kirapim ol narapela long mekim bikpela wok moa long autim tok. Wok painia inap helpim yumi long tingim moa yet ol samting bilong spirit na dispela bai lukautim yumi bambai ol samting nogut bilong dispela graun i no ken pulim yumi.
5 Jisas i tokim ol disaipel bilong em, olsem: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt 9:37, 38) Long nau tu yumi mas i gat planti wokman, winim long taim bilong Jisas. Wok painia i givim rot long yumi long mekim bikpela wok autim tok, em dispela wok yumi mas mekim hariap. Dispela wok inap helpim ol man long abrusim bagarap. Sapos yumi givim laip bilong yumi long mekim wok bilong Jehova long olgeta de, bai yumi stap belgut na bel isi tru; no gat narapela rot bilong i stap gutpela olsem.—Snd 10:22.
[Ol Askim]
1. (a) Kaunim 2 Timoti 4:5. Pol i strongim Timoti long mekim wanem? (b) Gutpela sapos yumi olgeta i givim wanem askim long yumi yet?
2. (a) I gat wanem ol samting yumi olgeta wan wan i ken mekim bilong kirap mekim wok painia? (b) Kaunim 1 Korin 9:23, 25, 27. Pol i mekim wanem na bai em inap mekim wok bilong God long olgeta de?
3. (a) Ol mak yumi putim bilong winim i mas wanem kain? (b) Yumi ken putim wanem ol samting i olsem mak bilong winim? Sapos yumi winim ol dispela mak, dispela bai mekim wanem long yumi?
4. (a) Wok painia i gat wanem ol blesing? (b) Bilong wanem ol kongrigesen i amamas long ol painia?
5. (a) Kaunim Sindaun 10:22. Wanem gutpela tok promis i stap long dispela ves? (b) Olsem wanem tok bilong Matyu 9:37, 38 i gat bikpela truim long taim bilong yumi, winim taim bilong Jisas?