Taim Yu Go Bek, Bai Yu Tok Wanem?
1 Yumi mas redi gut na taim yumi mekim gobek, bai yumi inap kirapim tingting bilong man na toktok moa wantaim em. Yumi ken redi gut olsem wanem?
2 Taim yu bungim man bilong haus long namba wan taim, ating em i bin stori liklik long famili samting bilong em. Ol Kristen tru i save tingim gut ol narapela man, olsem na taim yu go bek lukim em, ating pastaim yu ken stori liklik long dispela samting.
Sapos man i bin stori olsem em i tingting planti long pasin raskol samting, orait yu ken tok:
◼ “Taim mipela i bin toktok wantaim yu, yu tok olsem yu save tingting planti long pasin raskol i go bikpela. Sapos i gat sampela plisman moa, yu ting ol inap stretim dispela hevi?”
Sapos man i bin tok olsem em i tingting planti long ol kain kain samting i kamap nau long dispela graun, orait yu ken tok: ◼ “Taim yumitupela i toktok wantaim, yu bin tok olsem i no gat gutaim long graun. Yu ting ol hetman bilong graun inap kamapim nupela taim?”
Sapos man i tingting planti long pasin bilong ol man long tingim ol yet tasol, orait yu ken tok:
◼ “Taim mi bin toktok wantaim yu, yu bin stori olsem long nau planti man i bihainim pasin mangal. Yu ting God i gat wanem tingting long dispela kain man? [Larim man i bekim tok.] Long Efesus 5:5, Baibel i stori long dispela samting.”
3 Sampela narapela tok ol brata i bin mekim gutpela wok long en, em olsem:
◼ “Mi amamas long taim mi bin toktok wantaim yu, olsem na mi redim sampela liklik tok na bai yu ken save Jehova i tingim ol man i no gat haus o ples slip. Lukim tok hia bilong Aisaia 65:21-23.”
◼ “Mi laikim dispela tok yu bin mekim olsem ol man i mas i gat wanpela gutpela gavman, winim ol gavman bilong nau.”
◼ “Bipo yu bin kamapim gutpela askim olsem: God i orait long olgeta lotu?”
◼ “Yu tok olsem God i makim pinis ol samting i mas painim yumi, na dispela i bin kirapim tingting bilong mi.”
◼ “Mi wok long tingim ol tok yu bin mekim, na ating bai yu laikim dispela tok long buk Nambawan Man Tru i Winim Olgeta Narapela Man. [Kamapim sampela tok bilong buk long man bilong haus.]”
Sapos yumi mekim kain tok olsem bilong kirapim tok, orait dispela bai kamapim klia olsem yumi pilim tru ol toktok yumi bin mekim wantaim man bilong haus long namba wan taim, na yumi gat laik long toktok moa wantaim em.
4 Taim yu no go bek yet, tingim ol tok yu laik kamapim. Kamapim tok i stret long ol wan wan man.
5 Sapos yumi go bek lukim man, tasol em i gat wok, orait yumi inap mekim gutpela tok olsem:
◼ “Mi save yu no gat bikpela hap taim bilong toktok, tasol taim yu wok i stap, mi laik bai yu tingim dispela samting: [Kaunim Matyu 5:3.]”
O yu ken mekim tok olsem:
◼ “Mi raitim 3-pela tok bilong Baibel long wanpela hap pepa bilong givim long yu. Tasol mi save, nau em i no gutpela taim long toktok, olsem na gutpela sapos mi lusim dispela hap pepa long yu na taim mi kam bek lukim yu gen, yumi ken toktok wantaim long dispela 3-pela tok bilong Baibel. Mi no ken pulim bikpela hap taim bilong yu—inap 5-pela minit samting tasol.”
6 Sampela Askim i Gutpela Long Yumi Abrusim: Sampela askim em man bilong haus inap bekim “Nogat” long en na bai em i no laik putim yau long tok bilong yu, em olsem: “Yu kaunim dispela buk mi bin lusim long yu?” “Yu gat sampela askim?” “Yu tingim mi?” “Mi kam lukim yu, long wanem mi laik save, yu gat laik yet long toktok long ol samting God i laik mekim long dispela graun o nogat?”
7 Sapos yumi redi gut pastaim, bai yumi gat bikpela laik long go bek lukim ol man pastaim ol i harim tok, na bai yumi ken helpim gut ol.