Helpim Ol Man i Harim Tok
1 Taim yumi tilim ol magasin na buk samting bilong yumi, i olsem yumi autim ol tok em Krais Jisas i autim. Olsem na yumi mas wok strong long go bek lukim olgeta man i laik harim tok.
2 Sapos yu bin kamapim wanpela stori long Kirap! em man bilong haus i laik save long en, orait taim yu go bek lukim em, kamapim sampela tok moa bilong dispela stori, olsem stori long wanpela skripsa i kamapim bikpela tok, na ol tok bilong wanpela o tupela paragraf. Sapos em i laik harim sampela tok moa, orait tokim em, wok bilong Kirap! em bilong helpim olgeta wan wan long famili. Olgeta wan wan Kirap! i stori long kain kain samting, olsem ol samting bilong lukautim graun na wara na win samting, na ol samting bilong mekim pasin o wok bilong yumi yet i kamap gutpela, na i soim yumi long rot bilong karim ol hevi bilong nau, na i kamapim sampela askim ol yangpela i laik save long en. Sapos man i laik tru long harim tok, tokim em, em inap kisim Kirap! long rot bilong sabskripsen—olsem insait long 12-pela mun bai em i kisim 12-pela magasin. No gat sabskripsen bilong Noga!, olsem na sapos man bilong haus i save long tok Motu tasol, tokim em bai yu amamas long kisim Noga! i kam long em long olgeta 3-pela 3-pela mun.
3 Olsem wanem sapos i no gat wanpela stori long nupela Kirap! em man bilong haus i gat laik long kaunim? Orait no ken lusim em hariap—yu ken mekim wok long buklet Ol Witnes Bilong Jehova Ol i Wanbel Long Mekim Wok Bilong God o pes 206 bilong buk Reasoning (tok Inglis) bilong lainim em long sampela samting moa bilong ol wok bilong ol Witnes Bilong Jehova.
4 Sapos yu tilim Wastaua bipo na yu bin mekim wok long 2 Timoti 3:1-5 na kamapim ol tok i stap long pes 2 bilong dispela magasin, orait taim yu go bek lukim man bilong haus yu ken mekim tok olsem:
◼ “Taim mi lukim yu bipo, yumi bin toktok long as bilong ol hevi i kamap long graun. Long nau planti man i no tingim moa God na ol lo bilong em long Baibel i makim stretpela pasin yumi mas bihainim. Dispela i mekim na ol man i no tingim gut ol narapela man olsem tok bilong 2 Timoti 3:1-5 i makim. Yu ting i gat gutpela as na yumi ken wetim gutpela samting i kamap long bihain?” Larim man bilong haus i kamapim tingting bilong em, na nau yu ken kaunim 2 Pita 3:13 na kamapim gut ol samting Kingdom bai mekim long ol man.
5 Taim yu mekim gobek, sapos yu save olsem man bilong haus i no amamas tumas long toktok wantaim yu long lotu bilong em long wanem em i ting em samting bilong em yet, orait yu ken mekim tok olsem:
◼ “Ol balus na telefon samting i mekim na nau olgeta kantri i kamap olsem wanpela kantri i gat kain kain lotu long en. Olsem na sapos man i save gut long tingting na bilip bilong ol man bilong narapela lotu, ating dispela bai helpim ol long toktok gut wantaim na long dispela rot bai pasin bilong bel nogut long man bilong ol narapela lotu i ken pinis. Yu ting olsem wanem?” Larim man i kamapim tingting bilong em, na nau opim buk Stap Oltaim long pes 8.
6 Gutpela sapos yumi wok strong long go bek lukim olgeta man i laik harim tok i tru na bai yumi inap helpim ol long bihainim rot i bringim man long laip oltaim.—Jo 4:23, 24.
[Ol Askim]
1. Bilong wanem pasin bilong i go bek lukim olgeta man i laik harim tok em i bikpela samting?
2. Sapos man i kisim Kirap!, orait taim yu go bek lukim em yu ken mekim wanem?
3. Yumi ken mekim wanem sapos i no gat wanpela stori long nupela Kirap! em man bilong haus i gat laik long kaunim?
4. Yu ken mekim wanem taim yu go bek lukim man i kisim Wastaua?
5. Sapos man bilong haus i no amamas tumas long toktok wantaim yumi long lotu bilong em, orait yumi ken mekim wanem?