Wanpela Gutpela Wok Yumi Ken Mekim
1 Wanpela man i tok, save em i bin kisim long rot bilong kaunim Wastaua na Kirap!, dispela save i bin helpim em tru winim long taim em i skul 6-pela yia long yunivesiti. Planti man, maski ol i bin kaunim Wastaua na Kirap! inap sotpela taim tasol, ol tu i bin tok ol i laikim tru ol dispela nius. Yumi amamas yumi inap helpim kain man olsem long kisim ol dispela nius long olgeta taim, a?
2 Planti man i laikim tok i tru, tasol ol i no stadi yet. Tasol sapos olgeta taim yumi go bek tilim ol nupela Wastaua na Kirap! long ol, ating bai yumi inap kirapim ol long kisim sampela save moa. Yes, pasin bilong kisim Wastaua na Kirap! i go long man long olgeta taim i bin kirapim planti man long stadi long Baibel.
3 Taim yumi laik kisim Wastaua na Kirap! i go long ol man, sapos pastaim yumi kaunim ol dispela nius na tingim sampela tok yumi ken kamapim i stret long olgeta wan wan man i save kisim ol nius long olgeta taim, dispela bai helpim yumi yet.
4 Yu mas save, man i gat laik tru long harim tok o nogat—dispela bai helpim yu long skelim, bai yu putim nem bilong em long lista bilong ol man i kisim nius long olgeta taim o nogat. Sapos man i kisim nius em i gat bikpela laik long harim tok, yu ken tokim em, long olgeta tupela tupela wik i gat ol nupela nupela nius i gat ol gutpela stori long en, na em i ken kisim long rot bilong sabskripsen. Sapos em i no laik kisim sabskripsen, tokim em yu laik bringim ol nupela nius i kam long em, long 30 toea wanpela wanpela. Wok long painim rot bilong toktok wantaim man long ol tok bilong Baibel. Mipela i save bai yu amamas long mekim dispela gutpela wok.