Mekim Wok Autim Tok i Kamap Gutpela Moa—Bringim Ol Nupela Magasin Long Man

Bikpela Samting: Planti man i save amamas long ritim ol nius bilong yumi tasol ol i no laik stadi long Baibel wantaim yumi. Ating ol i amamas long lotu bilong ol, o ting ol i no gat taim long stadi long Baibel. Tasol taim ol i wok long ritim ol nius bilong yumi, ol bai kisim laik long save long Tok Bilong God. (1 Pita 2:2) Ating wanpela atikol we i stret long ol o long sampela hevi bilong ol, na dispela i kirapim ol long senisim tingting bilong ol. Taim yumi go lukim ol olgeta taim na stori liklik wantaim ol, dispela bai mekim na ol inap toktok gut wantaim yumi na yumi inap save long wanem samting ol i laik save long en na tingting planti long en. Ating i no long taim bai yu kirapim Baibel stadi.

Rot Bilong Mekim:

Long olgeta mun, makim taim long bringim ol nupela Wastaua na Kirap! i go long man. Ating yu ken go lukim em long narapela taim bilong mun bilong kirapim laik bilong em long ritim wanpela atikol long magasin em yu bin lusim long em, o givim em buk samting em yu tilim long mun. Raitim gut ol samting long notbuk.—Lukim Wok Kingdom bilong Janueri 2014, p. 3.
Redi gut paslain long yu go lukim em. Taim yumi go lusim ol magasin long man, traim long toktok gut wantaim em na kamap gutpela pren bilong em, na long dispela rot yu inap kirapim laik bilong em long kisim save long God.
Luksave long ol rot i op long yu inap kirapim Baibel stadi. Sapos wanpela man em yu save bringim ol nupela magasin long em i askim yu long wanpela tok bilong Baibel, orait yu ken bringim i go wanpela buk samting i bekim dispela askim bilong em na yutupela i ken stori long en. Paslain long yu lusim em, kamapim narapela askim i stret long samting yupela i toktok long en, na bihain yupela i ken stori long en taim yu go bek. Sapos long olgeta taim yu go lukim em na yu save stori liklik wantaim em long Baibel o long wanpela buk bilong stadi samting, yu mekim pinis Baibel stadi. Olsem wanem? Yu bin givim buklet Gutpela Nius long man bilong haus na yu soim em pasin bilong mekim Baibel stadi? Yu bin soim em vidio Wai na i Gutpela Long Stadi Long Baibel? na Mipela i Save Mekim Wanem Long Taim Bilong Baibel Stadi? Maski pastaim em i no laik stadi, bihain em inap senis. I gutpela yu traim gen.

Long Dispela Mun, Traim Dispela:

Wokim lista bilong ol lain em yu save bringim ol nupela magasin long ol. Givim ol nupela magasin long ol na tokim ol olsem bai yu bringim ol magasin bilong narapela mun i kam.