Bringim Nupela Magasin Long Man—Rot Bilong Kirapim Baibel Stadi
1. Bilong wanem oganaisesen bilong Jehova i kirapim ol pablisa long bringim ol nupela nupela magasin long ol man husat i amamas long ritim?
1 Planti man i no laik bai yumi stadi wantaim ol long Baibel, tasol ol i amamas long ritim ol nius bilong yumi. Olsem na inap long taim nau, oganaisesen bilong Jehova i kirapim ol pablisa long kisim ol nupela nupela magasin i go long ol man husat i laikim ol magasin bilong yumi. Sapos man i ritim ol magasin long olgeta taim, dispela bai kirapim em long laikim Tok Bilong God. (1 Pita 2:2) Ating bihain, wanpela tok em i ritim bai sutim bel bilong em na i kirapim em long stadi long Baibel.
2. Olsem wanem yumi inap kirapim laik bilong man i save kisim ol nupela magasin long stadi long Baibel?
2 “Givim Wara” Long Sid Bilong Tok i Tru: Yumi no ken lusim tasol ol nupela magasin long man. Stori liklik wantaim em na traim long kamap gutpela pren bilong em. Long dispela rot, bai yu save gut long em, ol samting em i laikim, na ol bilip bilong em, na dispela bai helpim yu long bihainim savetingting taim yu toktok wantaim em. (Snd. 16:23) Redi gut taim yu laik go lukim em. Sapos inap, stori liklik long wanpela tok bilong magasin na skripsa i stret long en, na givim wara long sid bilong tok i tru i stap long bel bilong em. (1 Kor. 3:6) Raitim long notbuk ol de yu bin go lukim em, ol magasin yu givim long em, ol skripsa na samting yu stori long en.
3. Yu mas go bek hamas taim long ol man i save kisim ol nupela magasin?
3 Bai Yu Go Bek Hamas Taim? Yu mas go wanpela taim long olgeta mun long lusim ol nupela magasin long man. Tasol sapos yu lukim olsem em i gat laik long harim tok o i gat wanpela atikol em bai laikim, orait yu ken go long narapela taim tu. Olsem, wanpela o tupela wik bihain long yu lusim magasin long em yu inap go lukim em gen, yu ken tok, “Mi kam bilong stori liklik long wanpela tok i stap long magasin mi bin lusim long yu.” Dispela bai kirapim laik bilong em long ritim dispela stori. Sapos em i ritim pinis, yu inap askim em long kamapim tingting bilong em na yupela i ken stori long dispela. O sapos man i amamas long ritim ol buk na nius bilong yumi, orait yumi ken go bek na soim em wanpela liklik nius, buklet o buk bilong tilim long dispela mun.
4. Sampela taim yu ken mekim wanem bilong luksave olsem man i gat laik long stadi long Baibel?
4 No ken wet long man bilong haus i askim yu long stadi long em. Yu mas go pas long askim em. Maski pastaim em i no laik stadi long Baibel, sampela taim yu ken stori wantaim em long hap “Bekim Ol Askim Bilong Baibel” long Wastaua na lukim sapos em i amamas long stori wantaim yu. Ating yu inap kirapim stadi wantaim em long dua bilong haus. Tasol sapos yu no inap kirapim Baibel stadi, yu ken wok yet long bringim ol nupela magasin bilong kirapim laik bilong em long stadi.