‘Planim Pikinini Kaikai’ Long Rot Bilong Sabskripsen na Ol Nupela Magasin
1 Nem bilong singsing 133 long buk Mekim Singsing Long Jehova, em “Tromoi Pikinini Kaikai, Em Tok Bilong Kingdom.” As bilong dispela singsing em tok piksa Jisas i mekim long wok bilong kamapim ol disaipel, olsem wok bilong planim pikinini kaikai. (Mt 13:4-8, 19-23) Wanpela tok bilong singsing i olsem: “Ol gutpela tok yu bin tromoi long graun, mas lukautim gut long oltaim.” Olsem wanem yumi ken mekim wok bilong yumi long autim tok i kamap gutpela moa? Long rot bilong tilim ol sabskripsen, na tu, taim yumi bringim ol nupela magasin long ol man.
2 Kisim Stretpela Tingting: Yumi mas redi long bihainim kain kain rot bilong tilim sabskripsen. Long wanpela kongrigesen long ol ailan Andaman, ol i putim mak olsem olgeta wan wan pablisa i ken tilim wanpela sabskripsen long olgeta wan wan wik. Long ol miting, ol i bin givim askim long ol pablisa i tilim ol sabskripsen. Insait long wanpela mun tasol, dispela liklik kongrigesen i bin tilim 150 sabskripsen. Dispela namba i wankain long namba bilong ol sabskripsen kongrigesen i bin tilim insait long 2 na hap yia!
3 Yumi inap mekim dispela wok olsem wanem? Wanpela sista long Japan i bin pasim tok long tilim sabskripsen long ol man i kam lukim em, na long ol man i wok long stua, na long taim em i go lukim ol man em i save long ol. Em i tilim 72 sabskripsen, na planti bilong ol, em i tilim taim em i autim tok long kain kain taim na ples. Taim yu autim tok long ol haus, ating bai yu bungim wanpela man i tok: “Long olgeta taim mi save kaunim ol magasin bilong yupela.” I gutpela yu tokim em long olsem wanem em inap kisim olgeta wan wan magasin long atres bilong em yet. Taim yu mekim ol gobek, yu ken stori liklik long ol man olsem em inap kisim gutpela save sapos em i kisim ol magasin long olgeta taim long rot bilong sabskripsen. Planti man i no save olsem ol inap kisim ol magasin long dispela rot. Ating 3-pela mun bai lus na nau sabskripsen i kam kamap long posofis, olsem na yu mas tokim em bai yu kam lukim em bilong bringim ol nupela magasin i go inap long taim sabskripsen bilong em i kam.
4 Sampela taim ol man i no laik kisim sabskripsen, tasol ol i amamas long yu bringim ol nupela magasin i go long ol. Sampela gutpela samting inap kamap taim yu bringim ol nupela magasin i go long man, olsem: (1) Insait long olgeta tupela tupela wik yu go lukim man, dispela bai mekim na yutupela inap kamap gutpela pren. (2) Long olgeta taim yu wok long helpim dispela man long ol gutpela tok bilong Wastaua na Kirap! Dispela inap helpim em long kisim save inap helpim em long abrusim bagarap. (3) Long rot bilong ol tok yu kamapim, yu inap helpim dispela man na bai em i gat laik long kisim save long ol tok i tru bilong Baibel, na dispela inap opim rot long yu mekim Baibel-stadi.—1 Pi 2:2.
5 Rot Bilong Bringim Ol Nupela Magasin Long Olgeta Taim: Taim wanpela man i laikim ol magasin, tokim em ol gutpela gutpela stori olsem i save kamap long olgeta wan wan magasin na long olgeta tupela tupela wik yu bai amamas long bringim ol i kam. Taim yu lusim man, raitim nem na atres bilong em, det yu lukim em, magasin yu tilim, wanem stori bilong magasin yu bin stori long en, na samting man i gat laik long en.
6 Taim yu kirap nupela long mekim dispela wok, bringim ol nupela magasin long sampela man tasol. Orait, isi isi yu ken go lukim tu sampela man moa em yu bin tilim ol magasin long ol. Long olgeta taim yu go, raitim gut wanem magasin yu bin tilim na long wanem de stret. Raitim wanem ol tok yu bin toktok long en, na olsem wanem yu ken kirapim man long laikim tok i tru taim yu go lukim em gen.
7 Yu Ken Go Lukim Tu Ol Bisnisman na Ol Dokta na Loya Samting: Ol samting i bin kamap i makim olsem, ol papa bilong stua na ol dokta na loya samting, ol inap kisim ol magasin bilong yumi long olgeta taim. Long olgeta taim wanpela elda i save bringim ol nupela magasin i go long bikman bilong taun em i stap long en. Inap 10-pela yia olgeta, wanpela pablisa i bin bringim ol nupela magasin long wanpela man nau em i gat 80 krismas na em i papa bilong wanpela kampani bilong salim ol samting bilong wokim ol haus. Nau pablisa i stadi wantaim dispela lapun!
8 Mekim Ol Gobek: Taim yu kisim nupela magasin, kaunim olgeta stori bilong en. Painim sampela tok long ol stori em olgeta wan wan man long lista bilong yu bilong bringim ol nupela magasin ol bai laikim. Nau taim yu go bek, yu ken tok: “Taim mi kaunim dispela stori, mi bin tingim yu na olsem wanem dispela stori inap helpim yu.” Na ol pikinini tu inap tok: “Mi amamas long lukim yu gen. Ol nupela Wastaua na Kirap! bilong yu i kam pinis. Ating bai yu laikim dispela stori, nem bilong en . . .” Soim blok, “Long Wastaua i Kamap Bihain Long Dispela,” na dispela inap kirapim ol long wetim ol nupela magasin. Olgeta taim yu bringim ol nupela magasin i go long man, yu ken kaunim dispela olsem wanpela gobek bilong yu. Yumi no ken lusim tingting olsem yumi laik kirapim Baibel-stadi wantaim ol dispela man.
9 Go Lukim Ol Long Olgeta Taim: Yu ken bringim ol nupela magasin long ol man long wanem wanem taim i stret long yu—long olgeta moning namel long wik, long apinun olsem 4 o 5 klok samting, o long 6 klok samting, o long Sarere Sande bihain long wok autim tok. Sapos yu sik o yu go malolo na yu no inap go lukim ol, orait askim narapela pablisa long bringim ol magasin i go long ol. Long dispela rot ol man bai kisim ol magasin long taim stret.
10 Tupela rot bilong yumi planim pikinini kaikai bilong Kingdom em long rot bilong tilim sabskripsen bilong Wastaua na Kirap!, na long bringim ol nupela magasin i go long ol man long olgeta taim. Taim yu skulim ol long tok i tru bilong Baibel, ol inap pilim tru ol tok bilong Kingdom na bihain ol inap wok wantaim yu long kamapim ol pikinini kaikai bilong Kingdom.—Mt 13:8, 23.