Redi Long Senisim Toktok Taim Yu Autim Tok
1 Sapos yumi mekim kain kain wok long olgeta taim bai yumi amamas. Sapos yumi mekim samting long narapela narapela rot bai yumi amamas long mekim ol samting. Dispela tok i stret tu long wok autim tok bilong yumi. Sapos yumi no was gut bai yumi mekim wankain tok long olgeta haus na tok bilong yumi i kamap olsem tok nating. Sapos yumi kolim kolim wankain kirap bilong tok planti taim bai yumi les na ol man bilong haus tu i les long harim yumi. Olsem na yu mas redi long senisim toktok taim yu autim tok. Bai yu ken mekim olsem wanem?
2 Sapos yu save tok: ‘Moning. Mipela i toktok wantaim ol man long gutnius bilong Kingdom,’ gutpela yu ken tingim narapela rot bilong kirapim tok. Buk Reasoning i gat planti gutpela kirap bilong tok. Long pes 9-15 yu ken lukim ol kirap bilong tok long 18 narapela narapela bikpela tok. Na ol wan wan bikpela tok i gat tupela, tripela o sampela rot moa bilong kirapim toktok long en.
3 Sapos yu mekim wok long buklet “Tru God i Save Tingim Yumi?,” dispela kirap bilong tok i stap long pes 13 aninit long het-tok “I Stap Bilong Yumi/Amamas” i ken helpim yu:
◼ “Mipela wok long toktok wantaim ol man i tingim tru i stap bilong yumi long nau. . . Tasol planti man i laik save, Yumi inap i stap amamas tru? Dispela buklet i gat sampela gutpela tok bilong kirapim tingting bilong yu na bilong strongim yu.” Opim buklet long pes 25 na kaunim wanpela o tupela tok bilong paragraf 15 na 16.
4 Sampela pablisa—em ol yangpela na nupela, tasol ol strongpela pablisa tu—ol i save, taim ol i autim tok long ol man ol i ken mekim gutpela kirap bilong tok long ol liklik nius.
Wanpela yanpela pablisa i ken mekim wok long liklik nius “Amamas Wantaim Famili Bilong Yu” na tok olsem:
◼ “Mi laik soim yu olsem wanem God i ken helpim ol famili long stap wanbel na amamas. Mi laik givim yu dispela liklik nius nem bilong em, “Amamas Wantaim Famili Bilong Yu.” Strongpela pablisa i wok wantaim yangpela hia i ken mekim sampela tok moa sapos em i skelim olsem man bilong haus i amamas long harim.
5 Sapos man bilong haus i laik harim moa, ating strongpela pablisa i ken tok olsem:
◼ “Baibel i gat ol lo bilong soim yumi long wok bilong man, na meri, na ol pikinini insait long famili. God i bin kamapim famili, olsem na em inap tokim yumi long ol samting yumi mas mekim bilong famili i ken wok gut, laka? Yu gat wanem tingting long ol tok Baibel i givim long ol wan wan insait long famili?” Bihain kaunim Efesus 5:22, 23, 28-31.
6 Sapos yu tilim Buk Stap Oltaim yu ken kamapim klia ol gutpela samting i kamap long bihain olsem Kamapim Tok Hait 21:3, 4 i tok. Na bihain kaunim paragraf 3 long pes 155 long dispela buk. Askim man bilong haus olsem, Yu ting yumi ken bilip tru olsem God bai truim ol dispela tok promis bilong em? Sapos yu toktok liklik long sampela tok profet i kamap tru pinis, dispela i ken strongim man bilong haus long save God inap long blesim olgeta manmeri i stap long dispela graun.
7 Olgeta brata sista i autim tok bilong Kingdom ol i laik helpim wok bilong God na autim tok i tru long olgeta man na olgeta hap na helpim ol man i amamas long harim tok. Sapos yumi mekim pinis wok bilong yumi, yumi amamas long wetim Jehova long blesim ol wok yumi bin mekim. Tok yumi autim long ol narapela man i gutpela tru. Sapos yumi redi long olgeta taim yumi inap long senisim toktok bilong yumi taim yumi autim tok bilong Kingdom na skelim gut wanem buk o buklet o magasin samting yumi tilim.