Olsem Wanem? Yu Inap Mekim?
1 Ating yu laik save, ‘Mi mas mekim wanem samting moa?’ Sindaun 3:27 i bekim olsem: “Sapos wanpela man i sot long samting na em i askim yu long givim em, yu no ken tok, ‘Nogat.’ Sapos yu inap, yu mas givim em.” Olsem wanem? “Yu inap” mekim sampela samting moa na mekim wok painia haptaim o wok painia oltaim? Yu inap mekim olsem?
2 Buk 1993 Yearbook (tok Inglis) i strongim yumi olsem: Long Amerika long yia 1992, averes bilong ol painia oltaim na painia haptaim, em 106,031, na i olsem long olgeta 8-pela 8-pela pablisa i gat wanpela painia. Long Amerika long yia i go pinis, inap olsem 5,093 pablisa i kirap long mekim wok painia. Long Papua Niugini long yia i go pinis, averes bilong ol painia salim na painia oltaim na painia haptaim, em 374. Averes bilong ol painia oltaim na painia haptaim, em 194, na i olsem long olgeta 14-pela 14-pela pablisa i gat wanpela i mekim wok painia. Dispela i kamapim klia olsem planti pablisa i bin skelim ol wok bilong ol na ol i save ol inap mekim bikpela wok moa long wok autim tok.
3 Wok painia haptaim i wanpela rot bilong helpim yumi long mekim gutpela pasin long narapela. Long Epril long yia i go pinis, inap olsem 185 pablisa i bin mekim wok painia haptaim. Dispela em i gutpela tru. Na planti pablisa i wok long painim rot na bai ol inap mekim wok painia haptaim inap planti taim moa long yia.
4 Bilong helpim yu long save, bai yu inap mekim o nogat, pastaim yu mas skelim gut laik bilong bel bilong yu. (Mt 22:37-39) Aposel 20:35 i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” Em nau, man i givim bel long givim planti samting bilong spirit long narapela, em i gat stretpela laik. Bilong mekim gut wok pablisa o wok painia, yu mas i gat dispela kain laik.
5 Namba tu samting, yu mas tingim ol samting bilong yu long nau. Olsem wanem? Yu inap stretim ol samting bilong yu na bai yu inap mekim wok painia? I no olsem olgeta inap, nogat. Tasol long olgeta yia, planti tausen tausen ol i beten na skelim tingting na bel bilong ol yet, na ol i painim rot long mekim. (Kl 4:5; w-E 1977 pes 701) Olsem: Sampela famili i save makim sampela mun bilong sampela o olgeta long famili i ken mekim wok painia haptaim. Na sampela famili i save helpim wanpela long famili bilong ol, olsem lukautim em long ol samting bilong skin, na bai em inap mekim wok painia oltaim. Olsem wanem? Famili bilong yu i bin tingim ol dispela samting ol inap mekim?—Lukim Sindaun 11:25.
6 Pasin bilong helpim ol narapela long kisim save long tok i tru i mekim yumi belgut tru, maski yumi pablisa o painia. Yumi save, sapos yumi laik i stap amamas tru yumi mas mekim gutpela pasin long ol narapela, na yumi mas mekim moa yet sapos ‘yumi inap mekim’ olsem.
[Ol Askim]
1. Sindaun 3:27 i tokim yumi long mekim wanem?
2. Taim ol pablisa i skelim ol wok na sindaun bilong ol, sampela i kirap na mekim wanem?
3. Planti pablisa i tingting long mekim wanem?
4. Wanem samting i kamapim klia olsem man i gat stretpela laik long kamap gutpela pablisa o painia?
5. (a) Sampela famili i save mekim wanem na long sampela mun bai ol inap mekim wok painia haptaim? (b) Sampela famili i bin mekim wanem na bai wanpela o sampela long famili inap mekim wok painia oltaim?
6. Yumi mas mekim wanem na bai yumi inap i stap amamas tru?