Helpim Ol Long Harim “Gen”
1 “Mipela i laik harim yu i toktok gen long dispela samting.” (Ap 17:32) Sampela man i bin tok olsem, taim ol i harim tok bilong Pol long maunten Areopagus. Na olsem tasol long nau, sampela i redi long harim sampela tok moa bilong Kingdom em yumi bin autim long ol long namba wan taim.
2 Taim yumi mekim ol gobek, yumi save mekim bikpela wok bilong lainim ol man. Yumi save mekim ol gobek bilong kirapim tingting bilong man na bai em i gat laik long harim sampela tok moa. Pasin bilong redi gut pastaim bai helpim yumi long mekim gutpela wok. Pes 15 bilong buk Skul Bilong Wok Autim Tok i tok: “Redi gut pastaim. Tingim gut ol tok yu laik lainim man long en. Kamapim gut ol tok bilong Baibel. Tingim ol askim man bai kamapim, na redim bekim.”
3 Taim yu go bek lukim man i bin kisim liklik nius “I Gat Wanem As na Yu Inap Bilip Tru Long Baibel?” yu ken mekim tok olsem:
◼ “Ating yumi olgeta i laik save long wanem samting bai kamap bihain, a? Nau yumi stap long taim nogut, na yu ting wanem samting bai kamap? [Larim man i bekim tok.] Ol man i save tingting nabaut long wanem samting bai kamap bihain, tasol ol i no save tru, God tasol i save. [Kaunim Aisaia 46:10.] Baibel i tok profet olsem klostu nau bai wanpela nupela taim i kamap na yumi inap stap gut long Paradais. [Kaunim paragraf 3 long pes 4.] Mi laik stori moa long dispela gutpela tok promis.”
4 Taim yu go bek lukim man i bin kisim Baibel “New World Translation,” ating dispela tok bai i gutpela long mekim, olsem:
◼ “Taim mi bin kam lukim yu, yu bin kisim wanpela Baibel na mi bin tok promis long kam bek na helpim yu long mekim gutpela wok long en. Ating sampela taim yumi laik save, yumi ken mekim wanem na bai yumi inap pas gut wantaim ol narapela. Baibel i kamapim sampela gutpela tok bilong helpim yumi, na Baibel New World Translation hia inap helpim yumi long painim kwik dispela tok. [Opim long pes 1595 na lukim liklik het-tok “Love(s).” Lukim ol skripsa olsem 1 Korin 13:4; Kolosi 3:14; 1 Pita 4:8. Stori liklik olsem, sapos yumi bihainim ol tok bilong ol dispela skripsa, dispela bai helpim yumi.] Baibel inap helpim yumi long stretim planti narapela hevi tu. Narapela taim, mi laik stori long olsem wanem Baibel inap helpim yumi long painim rot bilong stap amamas na bel isi.”
5 O taim yu mekim gobek, yu ken tok olsem:
◼ “Taim yu kaunim Baibel mi bin lusim long yu, ating yu lukim nem bilong God i stap long planti hap, a? Planti narapela Baibel ol i no kamapim nem bilong God, olsem na long dispela samting, Baibel hia em i win tru. Tru, sampela man i pret liklik long mekim wok long dispela nem Jehova, tasol yumi mas save, longtaim pinis God i kamapim nem bilong em, na em i bin kirapim ol wokboi bilong em long ol i mas mekim wok long dispela nem bambai ol man inap save Jehova em i God tru i gat laip. Lukim dispela tok hia long Song 83:18.” Kaunim skripsa, na larim man i kamapim tingting bilong em. Sapos yu pilim olsem em i amamas long harim tok, orait, kamapim sampela tok moa olsem i stap long sapta 4 bilong buk Bikpela Tisa.
6 Yumi mas helpim man long kisim stretpela save long ol tok bilong Baibel—no gat narapela gutpela samting olsem yumi ken givim long em. Dispela save inap lainim man long pasin bilong pret long Jehova, na i kirapim man long em i mas wokabaut long gutpela rot God i bin makim long em. Sapos man i mekim olsem, em inap kisim laip i stap gut oltaim.—Snd 2:20, 21.