Askim

◼ Yumi mas bringim wanem ol samting i kam long ol miting?

 Long olgeta wik, long ol miting bilong kongrigesen, yumi kisim ol gutpela tok bilong helpim na strongim yumi. (Ais 48:17; Hi 10:​24, 25) Tasol bilong ol miting i ken helpim gut yumi, yumi mas redi gut pastaim.

 Gutpela sapos olgeta wan wan long famili i gat ol dispela samting bilong ol yet: Baibel, buk singsing, ol buk yumi stadi long en long ol miting, notbuk, pen o pensil.

 Long Skul Bilong Wok Autim Tok, yumi mas bringim Sedyul Bilong Skul Bilong Wok Autim Tok na Buk Bilong Skul Bilong Wok Autim Tok. Ol dispela samting bai helpim yumi long tingim as tok bilong tok ol sumatin i mekim, na lukim ol tok wasman bilong Skul i kolim bilong helpim sumatin. Sapos yumi bihainim ol tok em i kamapim, dispela bai helpim yumi long mekim gut moa ol tok yumi yet i mekim long Skul, na ol tok yumi mekim taim yumi autim tok.

 Taim yumi go long Miting Bilong Wok yumi mas bringim nupela Wok Kingdom Bilong Yumi. Bringim ol buk na magasin samting yumi bai mekim wok long en long taim bilong miting, olsem ol samting ol brata sista insait long soim ol bai mekim wok long en. Ol elda i mas bringim buk Lo Bilong Yumi Bilong Mekim Wok Autim Tok.

 Papamama i mas was gut long ol pikinini bilong ol​—⁠ol i mas sindaun gut long ol miting na putim gut yau long ol tok. Maski pikinini i no save long rit, sapos em i holim Wastaua na ol narapela buk bilong em yet, dispela bai kirapim em long harim tok. Sapos yumi lainim ol pikinini long tingim gut ol buk i stori long Baibel, na long mekim wok long ol, dispela bai lainim ol long mekim wankain pasin taim ol i bikpela pinis.

 Sapos yumi bringim ol dispela samting yumi stori pinis long en i kam long ol miting, bai yumi kisim bikpela amamas. (2 Ti 3:17) Long dispela rot bai yumi inap ‘save gut tru long laik bilong God na bai olkain gutpela save na tingting i ken pulap tru long yumi.’​—⁠Kl 1:⁠9.