Mekim Gutpela Wok Long Taim Bilong Yu
1 Jehova i save tingim taim bilong mekim ol samting. Em i laik bai yumi tu i tingim taim bilong mekim ol wok. Em i helpim yumi long mekim olsem long rot bilong oganaisesen bilong em. Oltaim yumi mas “wok strong long mekim wok bilong Bikpela.” (1 Ko 15:58) Long dispela rot bai yumi inap mekim tru wok bilong Jehova.
2 Long olgeta wik, yumi olgeta i gat 168 aua long mekim ol wok. Olsem wanem? Yumi mekim gutpela wok long dispela hap taim? Ol samting yumi mekim i kamapim klia olsem yumi save yumi stap klostu long pinis? O yumi larim ol liklik samting i pulim nabaut tingting bilong yumi?
3 Yumi mas stretim gut ol wok—em bikpela samting. Planti ol i wokim lista bilong ol bikpela samting ol i mas mekim. Namba wan bikpela samting ol i raitim pastaim, na bihain long dispela ol i raitim namba 2 na namba 3 bikpela samting, olsem. Olsem wanem yumi inap save long ol samting yumi mas mekim? Baibel i tok, “yumi mas amamas long olgeta samting yumi mekim.” (Sav 3:13) Sampela wok i save kamapim ol gutpela samting tru, winim ol narapela wok. Tingim ol gutpela samting em olgeta wan wan wok bai kamapim. Tingim ol dispela askim: Sapos yu pinisim pinis wanpela wok, bai gutpela samting i kamap long dispela wok? Bai yu “amamas” long ol bikpela wok yu mekim? Sapos nogat, ating dispela wok i no olsem wanpela bikpela samting tru yu mas mekim.
4 Long Wok Autim Tok: Yumi amamas taim ol brata sista i kam long bung bilong autim tok long taim stret bilong en, na ol i putim gut yau long ol tok, na kwiktaim ol i lusim ples bung na go long teritori. Yumi laik autim tok, yumi no laik bai taim i lus nating. Pol i save, pasin bilong mekim stret ol samting em i bikpela samting. Em i tok: “Yupela i mas bihainim stret ol gutpela pasin bilong lotu.”—1 Ko 14:40.
5 Taim yumi autim tok, sapos yumi sindaun malolo inap longpela taim liklik, bai yumi inap lusim nating taim. Tasol sapos san i strong tumas, ating yumi ken malolo liklik na dispela bai givim nupela strong long yumi na helpim yumi long mekim yet wok. Yumi mas kisim stretpela tingting long dispela samting.
6 Baibel i tok: “Pisin i save long taim bilong kam i stap long wanpela hap na long taim bilong lusim dispela hap gen,” na ‘ol anis, taim i gat planti kaikai i stap, ol i save bungim kaikai na putim i stap bilong taim kaikai i sot.’ (Jer 8:7; Snd 6:6-8) Em nau, em rot bilong mekim gutpela wok long hap taim bilong yumi. Yumi tu i mas save long “taim” stret bilong mekim ol samting. Tru, yumi mas tingim gut taim bilong mekim ol samting, tasol yumi no ken strong strong tumas long mekim olsem. Yumi mas save long ol samting yumi mas mekim, na wanem taim yumi mas mekim dispela wok. Yumi mas skelim gut ol wok yumi mas mekim bihain na makim bikpela hap taim liklik bilong mekim, na sapos wanpela samting i kamap na pasim wok liklik, orait, bai i gat hap taim i stap yet bilong mekim. Na yumi mas redi long lusim sampela samting yumi laik mekim na bai yumi gat rot long mekim ol bikpela samting, olsem redim ol tok bilong miting na bilong autim tok.
7 Yumi laik kamap wankain olsem Papa bilong yumi long heven, em God Jehova. Em i lainim yumi olsem, ‘olgeta samting i kamap long taim bilong en yet.’ (Sav 3:1) Sapos yumi mekim gutpela wok long hap taim bilong yumi, bai yumi inap ‘mekim tru wok bilong autim gutnius.’—2 Ti 4:5.