Helpim Ol Narapela Long Pilim Tru Ol Gutpela Tok Bilong Baibel
1 Jisas i inapim tru ol disaipel bilong em long ol samting ol i mas kisim. Luk 24:45 i tok: “Na em i helpim ol long tingting gut long as bilong ol tok i stap long buk bilong God.” Em i save, sapos ol i laik bai Papa bilong em i orait long ol, em i bikpela samting long ol i mas skul na klia gut long Tok Bilong God, em Baibel. (Sng 1:1, 2) Na i gat wankain as na yumi mekim wok bilong autim tok. Tingting bilong yumi em long kirapim ol Baibel-stadi, bambai yumi ken ‘lainim ol long bihainim olgeta tok Jisas i bin givim long yumi.’ (Mt 28:20) Orait, em hia sampela pasin bilong toktok em inap helpim yu taim yu mekim ol gobek.
2 Sapos yu bin toktok wantaim man long buk “Bel Isi na Gutpela Sindaun” yu ken stori moa wantaim em olsem:
◼ “Mi laik soim yu long sampela samting moa i kamapim klia olsem pasin bilong bihainim ol gutpela tok bilong Baibel em inap helpim yu. Planti man i hatwok tru long stap gut wantaim ol narapela, long wanem, ol i no bilip long ol tok ol i mekim. Yumi mas mekim wanem bilong kamapim gutpela pasin pren wantaim ol man i stap klostu long yumi? [Bihain long bekim bilong em, kaunim Sekaraia 8:16. Opim buk i go long pes 114, na skruim sampela tingting em ol i kamapim long paragraf 9-11.] Dispela em wanpela bilong ol gutpela tingting yumi inap painim insait long Baibel. Long narapela taim mi kam bek, bai mi soim yu ol gutpela tok i stap long Baibel bilong helpim ol man na meri marit long kisim bikpela amamas insait long marit bilong ol.” Stretim rot bambai yu inap go bek na stori moa long ol tok i stap long pes 145 i go 154, em i kamapim sampela gutpela tok bilong Baibel em inap helpim ol famili long i stap amamas.
3 Sapos yu bin toktok wantaim wanpela man i kamapim olsem em i laikim ol tok bilong Baibel, tasol em i no laik kisim sampela nius bilong yumi, ating sapos yu mekim kain tok olsem bai yu inap kirapim Baibel-stadi:
◼ “Mi bin amamas tru long liklik stori mitupela i bin mekim taim mi kam lukim yu long pastaim. Em gutpela tru long bungim wanpela man em i laikim tru tok bilong Baibel. Wanpela samting mi bin lukim taim mi toktok wantaim ol man i amamas long tok bilong Baibel em olsem: Klostu olgeta man i laik i stap long graun i gat bel isi na i no gat pasin pret long en. Sapos olgeta man i laikim olsem, bilong wanem ol kain kain pasin nogut na pasin bilong bagarapim ol samting i pulap long dispela graun?” [Larim man i bekim tok.] Kaunim 2 Korin 4:4. Tokim em olsem wanem God bai bagarapim Satan na kamapim bel isi na amamas long dispela graun inap oltaim oltaim. Kaunim Kamapim Tok Hait 21:3, 4. Nau yu ken tok: “Long narapela taim mi kam bek, bai mi soim yu sampela skripsa ol i kamapim long dispela liklik nius Husat Tru i Bosim Dispela Graun?, em i no gat pe. [Givim wanpela long man bilong haus.] Dispela liklik nius i kamapim klia i gat wanem as na yu inap bilip na wet long gutpela taim bai kamap long bihain taim dispela graun i no gat ol hevi long en.”
4 Sapos long pastaim man i harim gut tok bilong yu, orait taim yu go bek yu ken mekim tok olsem:
◼ “Taim yumi toktok wantaim bipo, yumi bin stori olsem i gat wanem ol gutpela as na yumi mas stadi long tok bilong Baibel. Sapos yumi givim bel tru long mekim olsem, dispela bai helpim yumi long pilim tru ol gutpela samting God i tingting long givim long yumi. [Kaunim Jon 17:3.] Mipela i bin kamapim wanpela pasin bilong stadi wantaim ol man long tok bilong Baibel na dispela i bin helpim planti tausen manmeri long save moa long ol tok promis bilong God na olsem wanem yumi ken mekim ol samting em i laikim.” Soim em long buk Stap Oltaim, na kolim ol sapta na ol het-tok, na soim em long pasin bilong yumi long mekim Baibel-stadi.
5 Sapos yu helpim ol man i gat gutpela bel long pilim tru ol gutpela tok bilong God long Baibel, em nambawan rot tru yu inap long helpim ol. Ol gutpela tingting na save ol inap lain long en taim ol i stadi long ol tok i stap insait long Baibel bai kamap olsem “diwai bilong givim laip,” na em inap mekim ol i amamas moa yet.—Snd 3:18.